彭发接林明祯电话认错　唔见护照被质疑讲大话：我开始有啲信

导演彭发、陈苡臻和谭淇淇今日（14/12）齐齐现身奥海城出席电影《手机见鬼》宣传造势活动，大会透露陈星妤因脚伤而未能出席，而女主角林明祯继续未见踪影。对于林明祯就放飞机缺席首映礼后，昨日（13/12）首次现身出席公开活动，亲自回应事件，她指与主办方有联系，同时也有跟导演通过电话，更指导演笑容满面接受道歉，又承认自己失误没有赶上电影的首映会，觉得非常抱歉。

彭发接受《香港01》访问时表示：“前日佢透过马拉方面与我联系，佢系好有诚意打畀我同我道歉，我都同佢讲大家都系做嘢啫，我就话要真正道歉嘅人唔系我，应该系要同相关宣传人员道歉，因为为佢哋添上咗好多麻烦，如果你当晚睇到佢哋嘅手机，系被人炸到要熄机。同埋事后佢哋系要好多嘢补救方法，而我知事后佢哋已经系冇咗赞助，某程度上对投资方都系一个损失。而我都有同佢讲，过咗去嘅都唔紧要啦，大家都要继续好好咁生活，如果第日仲有机会合作嘅话，就尽力配合多啲啰，而佢都向我承诺，佢本护照都会绑喺身。（算唔算原谅咗佢？）我觉得都要原谅嘅，始终都系一个工种嚟啫，又唔系杀人放火，咁同埋佢已交出咗一份诚意，而佢都有向传媒承认错失，咁我又觉得值得原谅。”

被问到林明祯有否讲出事实的真相？彭发表示：“佢都系咁讲话唔见咗本护照，但我就觉得一个大话讲一次，就或者系假，但系去到发酵咗咁多日，佢仲讲紧呢一样嘢，反而我开始觉得有啲信，咁我唯有咁样谂啦，咁佢冇咗本护照就出席唔到嘅。（佢话唔见护照，当时身处香港？）咁我又冇问佢喺唔喺香港呢啲问题，亦都冇喺电话度，问佢因咩事后又出现返喺戏院，我自问都冇理会，而我觉得过咗去就算啦。（林明祯称打畀你道歉时指你态度笑容满面？）咁当时我系有笑声嘅，唔通喊咩，始终大家都系成年人都系工作啫，始终都要面对好多事，唔需要停留一个位上。”