黎明出月饼硬撼曾志伟？　卖饼都要抛金句

一年容易又中秋，食过五月粽，街上的广告就好似变面戏法一样，马上就换晒卖月饼，今年仲连黎明（Leon）都捞埋月饼呢瓣呀！Leon在Facebook就post了一张月饼相，并写住：“对月饼每人有不同口味！冰皮！莲蓉！豆沙！五仁！我父亲的挚爱，有人钟意老字号新包装，有人钟意创新或尝试新的口味。”

Leon又话小时候香港的中秋天气好好，可以坐在天台边听收音机，边食月饼，边赏月，现在却总是下雨：“到了今年我希望中秋佳节唔好落雨，可以吃着自创的明福侠紫无花果月饼！”Leon仲抛出金句话：“贵或平唔重要点都唔系天价！”、“好食我话但可能有人话唔好食，我都费事理佢总之我觉得好食健康应该信自己，这才是做人的应有态度！”

讲返个明福侠紫无花果月饼，到底系咩嚟呢？Leon都有post个product相，月饼罐上面例牌有个月亮，但似乎就冇嫦娥喇，奔月的应该是明福侠本人，连月饼都用咗明福侠打模，大大个Q版公仔好可爱。Leon话月饼听日就会开卖，虽然几钱都未知，但啲粉丝都已经纷纷留言话要买，系黎生嘅魔力啊！

话说用艺人做生招牌嘅月饼品牌都唔少，例如陈慧琳、张智霖代言嘅美心月饼、谂起曾志伟就会谂起嘅奇华月饼，谢霆锋自创嘅“锋味月曲奇”等，今年连黎明都加入战团，唔知可唔可以凭住健康嘅紫无花果月饼跑出呢？