黎明是但噏庆回归　小春︰真系唔够佢嚟　张智霖︰今日学到好多嘢

今年七‧一周围都有回归Show，其中一个就有黎明、张智霖同陈小春一齐在中环海滨活动空间举行《开心幸运里》活动，而三位就以“幸运轮唱团”之名上台献唱怀旧金曲。近年大家钟意听Leon讲嘢多过唱歌，因为每次都有新鲜爆笑口感。今次回归Show，可能气氛够热烈，而且又返到自己呢个中环主场，同小春Chilam闲谈时下下爆Seed，搞到两位完全接唔住，只好苦笑！

又流行经典50年？

这次音乐会，三人以香港的经典金曲为主题，唱尽前辈们的作品，所以音乐会一来，先以林子祥脍炙人口的歌曲《三人行》作开场，Chilam 先单独出场，紧接小春，最后有Leon。为贯彻亲民主题，三人以轻松造型现身。虽然昨晚曾一度落大雨，但天公造美，一开场即停雨，三人亦感谢观众没有因大雨而离开。

接住由Leon 献唱陈百强的《有了你》及《深爱著你》，作为向一代巨星致敬。Leon又提到小时候到清水湾，经常见到好多大哥哥，车内的收音机经常播住这首《有了你》，同一时间，他边讲边行到身后的钢琴坐下“自弹自唱”，当观众放声尖叫时， Leon突然自爆︰“我只是扮嘢！”真系畀佢玩透，不过现场所见，真系似模似样，呃到下人。

小春帮囝囝补祝生日︰Leon︰“小朋友冇乜时间观念”

讲完唱歌，到番正题“讲嘢”，当晚Leon心情大好，歌与歌之间劲多分享，但就因为太好笑，眼见陈小春同张智霖都有点难招架。话说小春先多谢黎明邀请他来唱这个Show，虽然自己个仔生日都不介意，但Leon就秒速回应︰“咁细个，冇乜时间观念嘅！”

到张智霖上台，因为他是在二人合唱《友情岁月》时中间插入，Leon便追问他何解咁迟？Chilam发挥搞笑精神，食住小春个话题，话因为妈妈又系今日生日，所以刚才在后台致电祝贺先迟上台，但断想不到Leon连咁又接到︰“系，因为伯母嘛，所以好有时间观念。”唔知头唔知路的Chilam，一脸无奈暗说︰“等我谂下先……呀系㖞！（扮谂得通）”

去到最后，小春表示今次玩得好开心，跟Leon说下次再有这些机会一定要预他，Leon爽快答应话好，不过仲有下句︰“下次一于将人生一啲开心同唔开心嘅事延长，变成舞台剧同大家分享一次，譬如我扮记者，你打我。”这个杀著，搞到小春措手不及，只好苦笑地答︰“我唔兴㗎喇！而家，我唔兴㗎喇！”不过Leon都好好人，帮小春兜番︰“有时记者朋友都有错，不过揾食啫，但千祈唔好持住揾食系一道圣旨。”又一句金句，令在旁的Chilam都忍不住叹句︰“我今日学到好多嘢呀Leon！”听落似一则戏言，但Leon都认真回︰“大家Share下啫！”以为认真便输了？Leon认真便全胜了！