陈志云引被TVB封杀自身经历　替炎明熹被雪不值：听到忘本火都嚟

炎明熹早前被爆疑因不与TVB续约而被雪藏，之后她出席商场活动时，TVB更不派员采访，被指小气。近日李婉华与陈志云在YouTube直播中以“点睇饮水思源论”为题讨论事件，陈志云亦谈到当年离巢后，在公开活动被TVB冷待，经历比炎明熹更难堪。

陈志云当年是无线电视广播业务总经理，期间涉贪被廉署调查及起诉，遭无线即时停职，半年后他自行请辞，不过他的罪名并不成立，即使律政司再上诉至终审法院，最终都推翻了所有控罪，但他与TVB似乎不和平分手。节目中李婉华说自己睇炎明熹的新闻睇到毛管戙，难以相信2024年仍有“雪藏”呢支歌仔唱，“一个19岁，仲细过我个女嘅女仔，点解要咁？发生咩事呢？对佢嚟讲一定好大打击，明明系自己个女，佢当你系娘家，突然间有啲嘢唔俾佢出席，有啲场合TVB都唔派人去影吓你……”

陈志云就回应：“佢唔派人影你，个心当然好伤，但系佢派咗人，避开唔影你，你个心仲伤！我经历过。”他10年离开TVB，16年与叶童主演舞台剧《莎士对比亚》，很多记者到记招采访，TVB亦有派员，不过他说：“TVB有Crew， Backdrop见到我个样都避开，我个心真系好痛。我嘅个案同Gigi唔同，但系可能系因为我都系唔同佢续约啰，都系离开咗啰，但系使唔使咁？我唔知边个层次嘅人决定，算啦我唔再追究，但系呢啲动作真系唔需要，你就算影咗，返去剪走我啰，唔需要令人咁难堪。”

他指自己仍在TVB工作时，都曾提出过，中国人一向都觉得“好来好去”，“佢因为咩原因走都好，大家都唔好唔开心，大家唔开心，你唔知第日边个靠边个。你可能话一个艺员仔，我使唔使靠你呀？真系讲唔埋！”他说影视生态已经不同，很多海外影视作品要红亦不一定要靠TVB转播，为什么电视台不可以共存共荣，而要你死我亡，二人亦提到冯素波在离开TVB后接受《01娱乐》专访的内容，指波姐离巢时都明显不开心，陈志云笑说：“因为佢叫佢做个综艺节目发掘佢嘅才能，佢就把鬼火，做咗咁多年而家先嚟发掘我才能？”李婉华表示：“大部份人被访问嘅时候，一讲到TVB就有啲劳气，我好明白，佢哋对公司有感情，反而系公司冇感情，所以你话忘本论，你叫我哋唔好忘本，我梗系唔忘本，而家系你哋唔要我哋呀嘛。”

职场上虽说东家唔打打西家，不过她相信炎明熹当初只是纯粹因为喜欢唱歌、唱得好听就去电视台参加比赛，最终获奖，根本没想过往后要经历这些复杂人事关系以及合约纠纷，“佢自己都话并冇第三方接触过佢，揾过佢做任何嘢，亦都冇忘本，但系点解会有人话炎明熹就系忘本？”陈志云说，未能确认乐易玲口中的“忘本论”是不是指炎明熹，但公司签新人都好考眼光，“如果你真系摆好多资源落去，签长约都合理，我要等到你成熟嘅时候先可以攞到回报，所以你签七年、十年都好合理，你同炎明熹系咪签咁长？如果你唔系签咁长，你而家发觉佢有潜质，系你（当初）眼光唔好㖞。你觉得佢有潜质点解一开始唔签十年？你睇吓英皇一签签几多年，但系个个都捧到出嚟，咁系你自己有问题。”

之后陈志云再就“忘本论”发表意见，“佢觉得Offer唔啱，唔续约，忘咩本？你捧我嘅时候我冇付出㗎？系你畀咗机会我，令我俾人识，但系我唔系冇畀返嘢你，节目赞助商、快餐集团，你冇抽佣㗎？虽然乐小姐本来未必指呢个Case，但系叫人记住饮水思源，梗系记得饮水思源，你都要记住佢唔系完全冇付出。”他说父母对仔女是无条件的爱，但仔女大了不供养父母，被说忘本都可以理解，但公司对员工每日都在计算条件，投资$10希望赚到$20，又岂会是无条件？他指即使在政府做AO，头五年人工比外面私人机构高，但做到高层却比出面低薪，“佢真系投资咗落你度，你有咁嘅本质，我之前畀多啲你，高薪养廉，等到叻嘅时候我要你畀返我。”陈志云愈讲愈激动，他说：“你唔好同我讲忘本！你同我讲忘本，系咪好似我老窦老母咁无条件爱我先？如果系咁，我就真系忘本，听到忘本两个字火都嚟埋！”

李婉华认为今次事件对炎明熹来说，不完全是坏事，感觉她多了支持者，陈志云亦坦言，外界很多人对TVB印象差，“任何人黐埋去佢度，佢都唔要你，你几叻佢都唔钟意你，‘焖系TVB人嚟㗎，算啦！’”身为商业电台首席智囊的他就爆料，指商台其实都很疼锡Gigi，有用自己的方式保护她，“我哋都好担心佢嚟《叱咤》攞奖有人嘘，佢系小朋友，又真系唱得好，我哋都要刻意安排佢出一个位系冇人会嘘佢，譬如捞埋其他人出嚟。人哋唔系嘘佢，系嘘佢背后间公司。我喺TVB做嘅时候，出席啲场合都俾人闹得好紧要，甚至喺我面前摵烂我本书，话我无耻，抌低都有，但系我谂都唔系闹我嘅，系我代表TVB出嚟讲紧啲嘢啫，咁我袋紧个人工，我都要承受。”不过他始终觉得，大家都要互相体谅、帮助，尤其香港演艺圈要同其他国家和地区的影视行业竞争时，更要共存共荣。