李婉华于TVB人工极低著街边衫拍剧 喊住倾约开名爆某高层态度傲慢

炎明熹早前被爆疑因不与TVB续约而被雪藏，之后她出席商场活动时，TVB更不派员采访，被指小气。近日李婉华与陈志云在YouTube直播中以“点睇饮水思源论”为题讨论事件，李婉华说：“几廿年前同几廿年后嘅TVB原来都系一模一样，佢哋个制度一系用雪柜雪藏，贪我哋唔够新鲜、唔够防腐呀嘛？”之后就讲起当年因为嫌TVB人工太低无法生活，续约时见到合约条件时，在高层面前当场落泪，然而这位高层态度极之傲慢，事隔多年李婉华亦不介意开名。

李婉华80年代考入香港演艺学院，是演艺第三届学生，读了一年就被TVB发掘参演实况剧《香港的月亮》，之后甚至有电影公司等邀请她入行，而她最终决定放弃学业加入TVB。第一份合约为期五年，当时李婉华与港姐杨宝龄、李美凤、邱淑贞等一同被力捧，几年间已攀升上一线。

合约第四年时，TVB就与李婉华倾约，陈志云说：“你咪好啰，有人同你倾，有好多冇人同佢倾呀，静鸡鸡就走咗，你仲有用得嘅价值。”李婉华形容当时生活其实很拮据，工时长，收工很多时都已没有巴士地铁，要搭的士，而置装亦是另一开支来源，“已经喺花园街𠮶啲揾，都系入不敷支，好睇唔好食。𠮶时仲要啱啱出道，（公司）化妆品又整到块面好多粒粒，又要去睇医生。”

她提到倾续约时的经过，陈志云追问之下，她就直认跟自己倾约的是时任无线艺员部经理赵崇文，对方在电视台位高权重，操生杀大权。李婉华指自己第一份工就是返TVB，对TVB好有感情，当对方娘家一样，根本冇谂住走，不过她续说：“我真系冇忘本，但系新嘅合约，十年唔使讲，仲要加幅系小到真系不得了！睇到条件眼泪就流，𠮶时负责𠮶位先生，赵生，就咁掟份约畀我，我一睇就流眼泪，我就话‘其实你个加幅咁样，我真系冇办法，我而家要借阿妈钱使，我suppose要养佢，畀家用，而家要问返佢攞，我前景系点呢？’我好想继续做，公司畀好多机会我，我根本就唔系一个钟意讨价还价嘅人，但系问题我要基本生活，结果倾吓倾吓都冇话No、冇话Yes，就咁就雪。”

李婉华指当时TVB好似觉得她很反骨，不过她就表示自己好忠心，又谓：“忘唔忘本唔系我哋话事，有时我都好希望基本生活到嘅、合理啲嘅条件啫，签咗你，我卖咗身咁滞，出面所有工作都唔属于我自己，所有嘢都系公司。”陈志云问，当时赵崇文见到她哭有何反应，李婉华透露对方“冇乜反应”，亦冇递上纸巾，“我系咁喊，系咁喊，系咁喊，我好容易喊，又唔知点同佢倾，佢话‘系咁㗎喇，你自己谂吓啦！’我根本都唔想走，亦都冇其他Option，当时好多好好嘅监制、好好嘅剧，我好多嘢好想试，我觉得冇人可以帮我同佢倾，我经理人就系你哋，你话点我基本上就系点啦，我话‘你畀我生活到就得㗎喇，我买衫都买唔到，𠮶时真系去女人街买衫……’”她说当时都有一定知名度，即使不是要著什么大牌子的服饰，但都不想太失礼。

陈志云曾是无线电视广播业务总经理，他闻言也有点惊讶，又有解释电视台运作和死症，“呢个问题萦绕咗好耐，最后我离开之前，呢个问题仍然存在。一方面啲人捧咗出嚟，你好想自己用，但系你都要放佢喺出面揾食，或者放佢去大陆拍剧，因为拍一套剧等于你喺TVB拍成年，佢可以生活到，佢会明白我喺度就为名气，出面就揾钱。”其实当时李婉华已非寂寂无名，陈志云听完她讲的情况都问：“捧你要资源，但系你都已经一线，点解经理人唔帮你揾sponsor？”李婉华就解释，当时借衫都要睇人面色，又说：“一套剧得几套衫，所以要自己买，着得好寒酸，我唔敢去旅行，结婚之前都冇去过日本。”

李婉华透露，当时原本正拍摄《卡拉屋企》，结果剧组夹硬写她移民，又邀请多位新血加入希望没那么难睇。离开TVB后，李婉华就靠自己在台湾、内地等闯荡江湖，她再批评赵崇文：“签约𠮶时姓赵𠮶个态度都好傲慢，当咗我系叛徒，我只不过唔应承你呢张约，我走咗之后佢态度非常之唔好，变晒脸。”她与陈志云再讨论TVB的雪藏文化，陈志云说：“𠮶时佢够雪刘德华，人哋今日攞银紫荆，有用吗？”李婉华指，自己身边认识很多大卡士的艺人，对TVB的印象都不好，离巢后不愿意再食回头草，陈志云补充：“佢永远觉得佢益你，你冇益过佢，𠮶时刘德华同我讲，亦都同过好多人讲，佢觉得一只手指可以捧起你，一只手指可以捽死你。”

李婉华在影片最后再说，想不到TVB制作模式与人事依然几十年如一日，狠批：“对于而家仲系用返我哋二、三十年前𠮶种对艺人或者内部，都系一样咁官僚、傲慢，我真系好surprised。我都冇做咁多十年，仲系听到同一样嘅嘢，仲有雪柜嘅？仲要有人话佢忘本嘅？以前粤语长片先听到啫，而家仲听到呢啲嘢。我哋唔能够进步，就因为仲有呢啲咁陈旧、不合时宜嘅制度，仲喺度做紧。”陈志云就认为，很多决定未必是高层亲自下旨，虽然一时三刻亦不可能改到TVB的模式，但他希望旧东家都可以留意下。