【专访】森美13岁儿子爱睇政治嘢：我要同佢哋讲，屋企冇民主㗎！

广告成日都话“子女好与坏，在乎沟通与关怀” ，讲就识讲，你估易呀？
天底下最难搞的其中一个难题就是亲！子！关！系！太Close又唔听你教，太严又会有隔膜，到底想同孩子做朋友系咪真系比登天更难？
森美今年书展推出处男亲子书《提早跟孩子做朋友》，综合十几年凑仔经验，话你听做个有霸气又亲民嘅家长其实唔难！
摄影：龚慧

森美今年书展一口气出三本书，将过去的专栏整理分类做三个题材，《做鱼毛都要做得享受》讲享受生活，《暖男之规条》用理性分析爱情、《提早跟孩子做朋友》就讲亲子关系。生活同爱情森美就成日都讲㗎啦，但亲子？真系好罕见㖞。

以前喺节目冇讲过小朋友同屋企，写文都尽量唔写，主要系屋企唔钟意啦，有时写作点都会有夸大成分，小朋友啲同学睇到，会话我啲仔仔女女，到依家大个喇，佢哋开始明就可以写下，但有时写啲佢哋唔啱嘅嘢，佢哋都会唔钟意㗎。

森美早年甚少讲家庭事，甚至因此被误会瞒婚，实情是为了保护家人，到现在囝囝已经13岁，来年将到外国升学，囡囡9岁亦算是已懂事的年纪，在与太太达成共识下，家庭话题总算“解封”。

屋企要行家长制

森美坦言读中二囝囝已经好早熟，好喜欢看新闻和时事，甚至认得所有立法会议员：“我细个识鬼咩，所以我都会同佢哋讲政治、讲自由，譬如自由系喺边度用。”森美停一停，继续说：“我要同佢哋讲屋企冇民主㗎！”

又话出书教人同子女做朋友？咁咪即系讲一套做一套？冷静啲，森美所言是有根据的：“我会教佢哋民主系社会制度，系一齐定立一个目标，再去一齐生活嘅。”打个譬如就是如果一家五口，三个儿子都爱食雪糕做晚餐，岂不是餐餐食雪糕？后果可想而之。

排除了民主，森美认为家中最适合推行的，始终都是家长制度，当然家长制只是为了方便落决定，还有在仔女做错事后作出惩罚：“如果行朋友制，你谂下朋友喺你做错事之后会做咩？一齐错啰，所以我讲得好清楚㗎，屋企只有定立政策时先有家长制度。”

请仔仔绯闻女友食饭

成日都话依家啲小朋友越来越醒，所以要实行家长制同时又保持朋友关系，也是家长要学的相处艺术，森美其中一个做法就是投其所好，囝囝钟意打机就同佢打机，钟意睇电视就一齐电视，仲会时不时关心小朋友的感情状况。

我成日都问囝囝有冇爱情。

森美同时自称是一个“好Open”的爸爸：“我成日都问囝囝有冇爱情，有时佢有啲传绯闻嘅女仔，我会请佢嚟我屋企食饭。”他笑言自己三年班就写第一封情信，中二就开始拍拖，所以总是很担心囝囝将爱情“衾埋”：“因为越系衾埋就越易将爱情神化，神化咗就好易觉得𠮶样嘢冇办法解决，但我又唔会刻意问，越问佢就觉得你烦，越烦佢就越唔想讲你听。”

谈到“中学生不应谈恋爱”这个“本世纪最大争议”，森美就觉得当孩子有爱的感觉时就应该无法阻止：“不过相处方法可以教到佢，我觉得几多岁去拍拖就冇时间限制，几多岁有性生活就要教喇，呢个有影响嘅！”