神耆小子｜尹诗沛朱斐斐街头打到仆地　飞到成地系Bra画面震撼

无线热播剧集《神耆小子》昨晚（20日）一集，饰演鲁娟的尹诗沛（Nicole）演出非常抢焦，剧情讲到鲁娟对阿勇（萧正楠饰）展开猛烈追求、并设局约会阿勇共进晚餐；平时多以“四眼马尾”宅女造型示人的鲁姑娘，特意悉心打扮化浓妆和换上Bling Bling低胸连身裙，惟“大Red”Look吓亲阿勇！后来鲁姑娘藉住酒意当街揽住阿勇都不特止，更乘机嘟起“大Red唇”意图啜爆阿勇，眼明手快的阿勇即时左闪右避，混乱间鲁姑娘不慎倒地，场面搞笑。

之后惨遭阿勇拒绝的鲁姑娘到胸围店买新Bra，打算重整旗鼓扮靓啲攻陷阿勇的心，岂料期间撞正死对头珍珠（朱斐斐饰），珍珠寸爆鲁姑娘说：“你B（Cup）咁Cute呀，我个胸又唔听话喇，之前着开个Size唔啱喇，依家要A、B、C、E呀！”被寸的鲁姑娘心有不甘，与珍珠上演“街头MMA”，互扯头发兼互相推撞，更搞到成地都系Bra，两人最终打到仆落地，鲁姑娘更碌出马路差点被车撞，疯癫指数爆标！

爆萧正楠忍唔到笑搞到NG

对于Nicole饰演的傻更更鲁姑娘，不少网友觉得她既单纯又可爱，形象讨好兼入屋，亦有网友指现实中的Nicole是索女一名，今次收埋靓样扮宅女，认真大牺牲。Nicole受访时笑言：“唔觉得鲁姑娘系一个丑角，佢系一个比较朴素、好简单同埋好专一嘅女仔。”讲到与阿萧合作，Nicole笑言：“同阿萧拍嘢好衰㗎，佢份人好搞笑，但又成日忍唔住笑，所以因为忍笑搞到成日NG。”

尹诗沛意外咁多动作戏 朱斐斐着太少布碍事？

谈到昨晚一集连续仆落地两次，Nicole笑言：“估唔到呢套喜剧出奇地多动作场口，今次应该系仆得最多次数嘅一套剧！”Nicole又谓很喜欢与斐斐捞乱骨头这条线：“我哋两个一见到面就好多斗嘴，又成日畀佢用身材挞我，我又经常毫无还击之力。”Nicole还透露了与斐斐街头激战的花絮：“去到现场先同斐斐度动作，女人打交通常都系扯头发同扯吓啲衫，但佢实在（著得）太少布，唔可以扯佢啲衫，因为太容易走光，同埋佢咁少布挞落地，都好惊佢整亲。”Nicole预告今晚（21日）一集将全素颜上阵，她说：“呢场戏系讲Kelly（傅嘉莉）教我扮靓，因为佢会帮我块面推油，所以就连粉底都冇得搽，为咗配合番𠮶场戏，最后都系全素颜上阵。”