邓兆尊撑何伯使钱锡何太　大爆三位红颜知己反应：觉得系衰人

无线《东张西望》近日有关76岁何伯娶46岁内地妇（新何太）的忘年恋报道，成为全城热话，一向左拥右抱三位红颜知己的邓兆尊，近日亦在节目上分享睇法，笑称送礼情节熟口熟面：“我怀疑佢抄我。”又力撑何伯钟意点使钱就点使，但三位女伴则觉得新何太是衰人。虽然大家食花生食得爽，不过兆尊就建议何伯，不宜再接受《东张》追访！

根据《东张》报道，除了送金表、珠宝外，何伯与新何太新婚不久后，女方即提出想要100万搞饮食生意，而五名子女却觉得新何太动机不单纯，细女比何伯早一步从银行联名户口中提取了450万养老金。

报道一出后，网民都偏向企何伯仔女一方，但何伯新何太坚称自己是真爱，何伯指自己睇得好清楚，新何太是老实人一个。节目中两位又透露当日在街市相识，新何太煲汤给何伯饮，煲出真感情，对于被指煲“迷晕汤”、“喺汤加伟哥”，何伯就话：“点会迷晕汤？越饮越精神 ，后生仔唔够我嚟。”新何太又反驳，报道指她穿金戴眼、身上行头超过36万一事其实是假的，更自揭手袋、首饰大部分都是A货，除了何伯送她那如流星锤般大，价值约10万的龙凤鈪。

当主持人梁敏巧问，若何伯冇钱，她会否打工养何伯，新何太回答：“会，我一定会揾到生存方法。或者我返大陆，摆地摊喺街边煎牛扒俾人食，我都会带埋佢。”《东张》访问了街市附近档主，他们指新何太第一日摆档已好进取，讲明自己失婚想揾男人，又出动花旗参水、果皮水攻势，“猎物”亦不止何伯一个，极有“钓鱼”之嫌。

事件成为全城热话，一向左拥右抱三位红颜知己的邓兆尊，近日亦在节目上被问起对事件的睇法。他现身YouTube Channel“田豪祖3宝”直播，接受曾志豪、贵花田访问，直言自己和几位女伴都有关注，“有有，不嬲都有睇，我怀疑何伯系抄我，佢买𠮶啲嘢咁似我买𠮶啲嘢嘅。（龙凤鈪？）我冇佢咁叻。（金表？）试过嘅试过嘅。”但他就以打高尔夫球作比喻，指自己“入洞”后才会送礼物。

网民普遍觉得何伯蠢，邓兆尊却撑他：“你自己揾返嚟嘅钱，你钟意点使咪点使，我去澳门赌一铺一百万嘅都得啦，我自己揾㗎嘛，我使快咗同使慢咗冇分别。我会撑何伯！”不过他的几位红颜知己，就一面倒觉得何太是衰人，“就算第三个都系咁讲，煲汤呢样嘢，好简单讲句，我识好多内地嘅人，好多时佢哋为咗攞身份证，会结婚之类，打后就离婚，呢个系一定嘅，之后就揾自己钟意嘅嘢，到佢哋呢个年纪揾个伴好应该，睇错咗啲啫。”

主持问兆尊可否分享如何防止被女人呃钱，他却觉得没有贴士，“有个女仔冲埋嚟揾你，你都知道佢居心系点样，你睇到㗎嘛，做咗咁多年人点会唔知？（你同何伯讲嘅嘢一样！）不过我食咗睇吓好唔好食先，好食咪再嚟帮衬啰。”曾志豪叫他帮一帮何伯，他却表示：“唔使我帮啦，而家佢已经帮咗自己，佢得四千几蚊，如果个女仔真系咁爱佢嘅话，会照顾佢啦，包埋佢食住，系咪先？一日三餐包晒，三餐一‘笃’，包晒，有得饮汤㖭。”

曾志豪不停追问，邓兆尊遇女仔埋身时，会不会设观察期，他则透露自己的做法是：“你愈要我愈唔畀，你唔要𠮶啲，我就会畀。你有冇钓过鱼？你Chok吓Chok吓条鱼就好容易上钓。点上钓呢？视乎条鱼聪唔聪明。（你系咪要观察至少半年？）我系俾人Chok呀，我系条泥鯭。（何伯算快定慢？好似一年内）听讲几个月咋，你有冇去过码头钓泥鯭？勾条油炸鬼落去，一Chok就中，何伯就系呢啲。”

何伯在访问中指，根本不论自己与何人一齐，仔女都会反对，邓兆尊认为这番话经过长久彩排，表示：“经过太太训导同埋彩排咗好耐先会讲，唔系冇理由讲得咁清晰，隔篱𠮶个唔驳嘴。”但他始终觉得，何伯到这个年纪，追求什么都不是一般后生可以理解，觉得他冇做错，而言谈间他建议何伯不宜再受访。

主持人问，事情愈闹愈大，觉得最后会点收科，兆尊回答：“唔好再做访问啦，你哋唔够TVB玩㗎，做足成半年无谓啦！（TVB系咪会死咬？）梗系死咬啦，而家先讲紧买嘢，下一集就讲公屋，逐集同你慢慢玩，一个话题可以玩一个礼拜，成个半年都系何伯啦！福禄寿都扮啦！（有冇可能做做吓，为咗流量开始变得唔真实，有啲假？）唔系开始，一定系假。你睇啲镜头都知啦，讲讲吓嘢影吓只手、讲讲吓嘢摸大髀，已经将话题攞定畀你，导演已经叫摄影师影边度边度，落咗Order要做啲咩，出嚟嘅时候多嘢讲啲。”曾志豪认为，电视台报道完，拍拍屁股可以走，但对何伯一家的影响却不会于短期内停止，邓兆尊也直言：“输晒！”