专访｜周殷廷谷底翻身上位 反对盲目追星︰偶像都会吸毒呃女仔
周殷廷（YANTING/ YT）近日宣布开骚，这个名字对某些人来说以为是新人，但其实他已经出道9年了。早在16年左右已访问过仍是新人的他，后来见YT消失于幕前，心想他可能已退出这个圈了，殊不知21年忽然间一曲《迟了悔改》突然爆红，更在YouTube累积过千万点击。
然后，笔者陆续见到很多人在连登讨论区、IG、网台叫他为“YT大哥”，说替他抱不平、觉得YT被低估等等，“复出”两年间，YT可说是“咸鱼翻生”成了不少年轻乐迷的新偶像。原来消失的几年，他经历了人生低谷，面对事业、爱情双重打击后，YT也彻彻底底变了另一个人，看完这个访问，你或许会明白为什么他进化成后生仔口中的“YT大哥”。
场地：Creobybrentwood
曾被击溃放弃歌手梦 等足9年终于开骚
访问中，YT不时讲起“命”这个字，他说以前不信命，认为命运就是掌握在自己手中，但经历过低潮，不由得他不认命，“命就系包含住你嘅努力、你嘅运气，你嘅所有嘢。每一样嘢，喺唔同时刻、唔同时机、做唔同嘅嘢，制造出嚟一个好巧妙嘅Design。”YT于九展Star Hall开骚，门票火速完售，换转以前肯定不会爆场，这大抵都是命运，以前明显时不与他，而现在，时机到了。
问到这个开骚机会是否等了很久，他说以前有人路过或在其他场合听到他唱歌、知道他是谁，与现时自己开个人演唱会是完全不同的感觉：“People come for You，and you only，呢样嘢由我15岁话想做歌手，但系我唔识音乐，我冇任何嘅乐器、乐理，到我识唱歌，然后一步一步，谂会唔会去到有一日可以拥有一个自己嘅个人演唱会，呢个谂法从来喺我心中，其实系一步一步嘅嘢，冇得话一步登天。”
事业爱情双重打击 惨遭拍拖16年女友抛弃
然而，他一度觉得自己歌手的命已经完结了，2018年，YT获公司告知不能再出歌，“𠮶时公司都话可能我哋资源要收紧，冇得出歌，唔系因为有咩问题，纯粹系一个游戏，每一次都输嘅时候，你会选择唔玩呢个游戏，在商言商我觉得系好Make sense嘅嘢，只系咁啱受靶嘅系我，可能会唔开心，但系logical嘅，所以我会接受。”
那段时期可谓屋漏兼逢夜雨，正当YT心想：“既然唱唔到歌，算啦，我返新加坡求婚啦。”时，拍拖16年的初恋女友却竟跟他说：“对唔住，我唔爱你喇。”一句说话将YT打落谷底，甚至快把他的人生击溃，“𠮶阵时我喺度谂，咁个人生系为乜，我人生有咩意义？我花费一生嘅时间话我要追寻个梦想，我做唔到，我以为陪伴住我可以一齐成长嘅人，喺我想像到嘅所有未来都有呢个画面，我冇咗呢个画面，其实我活嚟做咩？所有嘢都冇咗意义。”
因打击日喊夜喊 信心被击溃想过自毁
双重打击为YT带来行尸走肉的生活，他致电公司和所有合作伙伴，跟他们说：“我唔再返嚟喇，歌手呢个生涯、呢个命，对我嚟讲已经完咗。”当时YT每日陷入反思和质疑，他如此形容：“𠮶时我每一日起身喊，企喺度行路喊，瞓觉之前喊……我会喺街𠮶度行三四个钟，我喺度谂，我做错咗啲咩呢？点解我会睇得咁错呢？点解我会睇唔到我应该要睇嘅嘢呢？”曾经他是一个很难缠的人，相信很多人都听过他逐间逐间唱片公司拍门送Demo的故事，即使接待员收下Demo，他仍觉得不够，为了不让自己的作品石沉大海，他在门口等候，要等到有A&R（艺人制作部）的负责人亲自收下，他才肯罢休。YT曾说：“我唔系最叻𠮶个，但我系最唔会放弃𠮶一个。”
然而，成为了歌手后的星途却未如他所想，现实一盆冷水照头淋，YT已不再相信自己，“我觉得我得，但我事业唔得，我觉得我爱情揸得好紧，一定会有未来，我冇咗呢样嘢，只代表咗我嘅Vision（视野）出现咗问题，我睇嘅嘢系错，我睇嘅呢张纸系白色，原来佢唔系白色，我所有嘢要重新去Reframe（重构）。”当他深信是对的，却变成是错，他难免怀疑自己。而问到那段时期可想过离开这世界，他答：“绝对，绝对有想毁灭世界同毁灭自己嘅想法。”
因朋友儿子一句话落泪 重新振作回香港
每个人都会有失意的时候，觉得眼前这个难关大概怎样都跨不过去，然而，有时候开窍或想通，可以只是一霎眼的事。讲到当日如何从低谷重新站起来，靠的竟然是好朋友儿子的一句话。在新加坡那段时期，YT一心做返个普通人，生活就是帮朋友凑仔、一齐整饼，“有一日我接佢小朋友放学，一打开门佢话‘Uncle！’跟住揽住我，𠮶阵时我开始喺度喊，我个Friend问点解你喊，我话呢个应该就系我爸爸接我放学嘅时候嘅感觉。我话我要返去，所以我同咗我𠮶段关系嘅另一半讲，我曾经系你嘅爱人，但系我仍然系我父母嘅仔，仍然系我阿哥个细佬，我要返去揾我屋企人，然后我就返咗嚟香港。”
YT手上有很多戒指，原来全部都有意思，他说：“我觉得人生之中要有好多嘢去抓住你，去令你知道人生有好多唔同紧要嘅嘢，我成日话有三样嘢系任何钱同荣耀买唔到嘅，健康嘅身体，爱你嘅家庭，同埋平静嘅心态。”手上的戒指正正代表他的哲学，在YT最失意时，他从好友、家人、哲学上找到答案，对他来说，这些亦是教他应付不同情绪的武器，帮助他时常提醒自己。
当谈到是否因为那段难过的时期已经过去，放下了、释怀了才能坦然把这段往事道来，原来亦与手上的戒指有关，YT说戒指象征著正义、勇气、平衡、智慧四种美德，“我每一次都会讲真话，最真诚嘅嘢，好赤裸地攞出嚟。系咪好痛苦？好痛苦，但系我成日同人讲‘The truth will set you free, I am now free.’”说实话，很难相信YT是“A1”（单身，只拍过一次拖），甚至被人狠飞，他却说今时今日认识他的人，不了解未跌倒时的他，也不明白他的阴暗面。
反对粉丝盲目追捧偶像 自揭从小阴暗面
尽管他说得上是不少人的偶像，他却严正地反对大家盲目追捧任何明星、歌手作偶像，认真有点“倒米”，“大家睇到只系你想投射出嚟心中嘅一个模样，但你嘅偶像系咪真系如你所想？系咪真系咁孝顺？系咪真系咁乖？真系冇做坏事？系咪冇吸毒？系咪唔去呃女仔上床？每一个人都有呢样嘢。佢唔畀你知，我哋投射到佢系一个天使，我觉得唔应该，所以我成日都同人讲千祈唔好盲目地去追任何明星、歌手，任何人都好。”他告诫大家，可以欣赏一个人的才华、手艺，但要理性地知道一个人是否值得自己崇拜，别被自己的大话蒙骗到。
换言之，YT也不怕人知道，自己都有阴暗面，他续道：“我极度极度之愤怒，我系有一个想毁灭好多嘢嘅愤怒。”原来他自小被欺负，小学时因言语不通被欺负，同学说：“你好似狗呀，唔好跟住嚟啦，好烦呀！”、到中学想打篮球，老师说：“你垃圾㗎㖞，点打篮球呀？”而之后他想做歌手，梦想一样被践踏、耻笑，他说：“我好不愤、好嬲，我觉得我好想毁灭你哋呀，但其实唔系因为佢哋错，系因为佢哋啱呀，我真系未够好，个问题系出于我嘅自尊心。”
痛定思痛换来人生转变 摆脱自以为是、自我中心
经历巨变后，YT终于意识到自己最大盲点就是自尊，他因自以为是而接近一无所有，后来终于学懂接受、放低执著和自我，也学懂听别人的话，他用揸船来形容人与人的关系，“原来身边嘅人唔系我船上面嘅一个船员，以前佢哋离开，我会问点解你走啊？点解你跳船啊？你系我船员嚟㗎，我会好心痛，但系我发觉唔系㖞，原来佢系一只船，我系一只船。我哋有幸喺今日一齐行，去到有一日你揾到你更开心嘅方向，你更想去嘅地方，你去𠮶度，我真心祝福你，由心底里我希望你好。我继续行我嘅，你继续行你嘅，我哋人生当中有一个好好嘅美好回忆。”
以下的一番话，可说是毕生受用的哲理，YT讲到做人不应逃避自己的阴暗面，而是与它共存，“我哋要Integrate我哋嘅阴暗面，唔好避咗佢，因为咩为之一个好人，好人系需要有阴暗面，而佢可以抗衡、控制到佢，佢先有一个选择嘅权利去做一个好人。如果你从来冇阴暗面嘅话，你只系一个冇选择过嘅人，你只系一个天真嘅人，你唔可以称之为一个好人。你天生系坏，但系你透过自己嘅能力去令到自己变得好，呢个先系好。所以我好接受我嘅阴暗面，如果冇呢样嘢佢唔会畀到个选择我去做一个好嘅人。”
解释“YT大哥”起源 与大小YouTuber合作原因
变得成熟、谦卑的YT，近年在网上各大知名与不知名的YouTube频道“老是常出现”，哪怕频道订阅者人数不多，YT一样乐于受访或合作拍片，叫他数数《三生有幸》宣传期做了几多个访问，YT说：“唔记得，过去两个月系Non-stop每一日都返工开工，而一日坐低有5至7个访问，咁就你当7×30×2啰，都无限咁多条片咁滞。”几百个访问中，YT说有部分是自己邀请的，身兼导演、Marketing、创意总监、歌手等岗位的他，不时dm各大YouTuber及专页，他说：“我纯粹同佢讲：‘我好欣赏，好钟意你嘅Content，好想同你合作、向你学习你Channel嘅嘢，你唔需要Promote我，我只系上嚟睇吓你点做。’”他说自己当初都受过一些大Channel帮助，是自己幸运，所以都想用余力帮助其他小Channel。
讲到合作得最多的频道，必数JFFT，问到为何上完JFFT的节目会多了“YT大哥”之名，他说自己上去做分享，“讲咗好多经”，大家就觉得他好似大哥哥，但“YT大哥哥”比较不顺口，于是便变成“YT大哥”。其实他曾经有点抗拒的，“我唔觉得有任何人应该要叫大哥大哥，咩大哥啫？你做咩大哥，你照住人哋？你做过啲咩？凭咩要人哋叫你大哥，我觉得呢样嘢唔好，但系如果大家真心觉得呢个系我大哥，咁我就要做一个大哥嘅榜样。”因此他常常以兄长般的经验，把一些自己年少时未想通、现时学懂了的道理分享畀年轻的网友。
真名上连登面对Hater 结局逆转成功圈粉
除了YouTube和私讯，连登也是另一个YT与网民交流的渠道，他甚至用真名“Yanting周殷廷”上连登，成功推到爆Post。虽然他几乎全程用英文，但识自嘲识玩胶，令平时的键盘战士和Haters都马上“笠水”，YT就说，其实都有闹自己的留言，不过结局最终却逆转，他说：“有一个闹我，话‘周殷廷，算啦！废㗎！《迟了悔改》都弹唔起，收档啦！’我好记得佢讲呢句说话，然后我好正面亦都好直接咁覆佢，我话‘Hey brother’，我希望如果有朝一日你遇到人生最低谷嘅时候，你唔好觉得呢个就系最后一次，而呢一次冇嘅话就会输，废，因为如果你咁样嘅话，你一世都唔会走出呢个低谷。我希望你会记得、明白到，就算几低，都会过去，都会有希望，而我希望我可以令到你相信呢样嘢，我唔希望你会有呢个低谷，但系我希望如果有朝一日真系咁发生嘅话，你唔好放弃，And then he tells me, I am now your fan.”
尽管靠讲经成功圈粉，不过“逢红必反”是连登定律，见他新歌上了YouTube热门首位、旧歌又破千万Views、演唱会又秒速卖完飞，连登果然开始有风向说“觉唔觉得YT Overrated？”面对这即将发生的危机，YT笑说自己从未上过神坛，又谓：“如果佢哋反嘅时候，我会好开心，我会更加大大力上连登冚返佢哋转头，呢个就系我期待嘅画面，我成日话我最鄙视就系连登仔，当然我就系最大嘅连登仔，所以我好enjoy呢个游戏。”
请按下图睇更多周殷廷专访靓相：