倪晨曦意外有喜4年抱3　心情复杂：用咗好长时间去消化

倪晨曦（Elva）2020年与金融才俊吴嘉钊结婚，并育有两子，近日突然宣布三度怀孕，并晒出巨肚，令网民十分意外，因为在月初Elva分享出席巴黎时装周真空上阵的靓相中还未见肚，“藏肚”功力令网民相当震惊。

今日（19/3）Elva陀B现身浅水湾出席品牌活动，接受《香港01》访问时表示：“其实大家睇到时装骚啲相我系有执过嘅，但我想讲喺时装骚𠮶日系好多人，我又成日攞住个袋遮住个肚影相，好多朋友都唔察觉，当我出Po话自己有咗，佢哋都好惊讶。（BB几多个月？)而家6个月，预产期会喺6月份。（老公咁勤力想追个女？）哈哈，冇，呢个都系意外嚟嘅，我哋大家系冇计划嘅，不过我都用咗一个好长嘅时间去消化。（之前你话封肚唔生？）哈哈，系呀，大家都揾返之前我讲过嘅说话，我收返先，哈哈，因为呢个世界冇绝对嘅，所以而家我唔再讲以后生唔生呢件事啦。”

Elva开心续说：“其实呢胎又陀得几开心，因为冇咩唔舒服，唔知系咪长时间大肚嘅关系，系冇咩反应，而且我一直冇同大家讲，有一下我系好惊人哋会谂我点解可以长时间大肚。（你而家4年抱3！）系呀，我都唔知自己搏咩，我都唔明，但都开心嘅。（女王式享受？）其实我就觉得第一胎比较女王式享受多啲，因为到而家第3胎已经冇，因为两个仔都好多精力，我老公啲精神落咗喺佢哋两个身上，因为佢哋两个经常有好多纠纷，要我老公去排解，所以就少咗时间理我。就好似我去完时装骚18日返嚟，我老公佢系瘦咗成6磅，所以佢知我平时有几咁辛苦，哈哈！”