夏韶声入纸申请开演唱会未获回复　批红馆“大细超” ：好唔公平

“香港摇滚之父”夏韶声（Danny）今日（18/3）现身尖沙咀出席香港文创互动发展协会发布会，他受访时爆料指自去年11月入纸申请红磡开2场告别演唱，到现时仍未得到回复，感觉不受尊重：“或者我睇住个镜头咁讲，你哋不如问吓红馆点解喺我哋呢批嘅艺人同你哋攞期系咁难呢？我攞咗期好耐。我由11月申请到而家系冇回复，我想讲呢个唔系第一次嘅事。”

夏韶声续说：“我之前开过3次红馆，每次要同佢申讲攞期，都系石沉大海，佢哋点样运作我唔知，纸我就签咗，点解我要喺度同大家讲呢，系因为我唔想再唱歌，所以我就想攞呢个场，对得住我嘅粉丝，开一场告别演唱会之后同大家讲拜拜。所以我就等紧佢哋几时会批。（会唔会再追当局？）主办者都一路帮我追紧而且佢哋都好嬲，佢哋都叫我应该同传媒反映呢个问题。（会唔会觉得自己名气唔够？）唔觉得名唔名气，你唔识我咩？哈哈，我哋喺度嘅时候你都未出世，如果用名气唔系我哋讲有几多名气，你哋自己去度。今次呢次系咪叫投诉，或者系。因系主办者话如果我唔讲佢哋主办方都会讲，点解咁耐都话俾我哋知究竟攞唔攞到期，但就有啲人就每年都可以喺红馆开嘅，呢个系咩环境呢？好似侧埋作一边㖞。（觉得唔公平？）当然唔公平，由2千年到而家都系咁，每次我哋呢批人去攞期一定好困难嘅，呢样嘢系众所周知。”

被问到“我哋呢批嘅人”的意思？Danny表示：“我哋呢批人最近嘅有叶振棠，我指我哋80年代蒲出嘅人。我想问而家系唔系我哋嘅世界呢？仲系，因为我哋仲企咗喺度，香港好特殊，而家走向年青化，偶像化，仲犀利过我哋80年代嘅场面，就系睇到香港就系咁啰，变咗对我哋呢批艺人好唔公平。”