香港中学老师组织富士山登山团　教练难忘八合目“轮街症”无眠夜

玛利诺中学今夏举办日本富士山登山游学团，带20位香港学生攀登高3776米的日本最高峰富士山。负责带队的陈圣方老师、罗德泰老师及山艺教练梁梓浩最难忘在八合目山屋的那一晚，晚饭后陆续有学生求助，表示不适，加上考虑天气后，他们决定半夜取消登顶。学生总会有令老师教练激气的地方，但他们都很满意学生在登山中表现出来的坚毅及团体精神。

陈圣方及罗德泰几年前与另外3位老师一起登上富士山顶，观赏日出的御来光。他们觉得中学生都有能力登顶，感受同样的经历，所以在2019年开始策划这个富士山游学团。不过，疫情令到计划一再延期，至今年才能实现。计划包括一级山艺及旅游日语课程，学生在年初完成这两项课程后，通过面试，才能获选入今夏的游学团行富士山。

为了令登山更安全，他们聘请了两位日本的登山向导，另外负责一级山艺课程的教练梁梓浩亦一同前往。虽然老师三令五申装备的重要，又带学生去行山店买装备，但一到五合目，学生还是轻视了山上的天气。梁梓浩说：“一落车，个个老师都系咁著风褛，佢哋（学生）仲系两手揈揈话‘冇嘢呀’。”

当日天气较差有风雨，有学生装备不足，要在五合目的行山店马上添置遮风挡雨的装备。陈圣方说：“天气唔好，事前担心佢哋唔够装备，担心佢哋太辛苦上唔到。我已经谂定，万一中间有两三个顶唔顺点算呢？可能要揾个同事陪佢哋落山休息。”

所有学生坚持行到上八合目山屋

上山不久，陈圣方发现有位女学生面色有点苍白，亦有几名学生行得较慢，有点堕后。不过，令陈圣方担心的事没有出现。他说：“佢有少少贫血，上去过程好慢、好辛苦，块面白晒，但佢冇讲过唔想上，佢最多话要抖一抖。”

亦有位女学生身材娇小，陈圣方形容“细粒到怕佢俾风吹走”，但她一直默默地行上山，没有抱怨疲倦。他说：“上山对啲男仔、篮球队冇大问题，但对最尾堕后嘅两三个同学仔系辛苦嘅，但冇讲过唔想上。呢样嘢系我估唔到。”学生坚持不懈，行得快会等待行得慢的，状态好的会照料身体不适的，相信都令老师老怀安慰。

在互相照应下，一行人安全抵达约海拔3200米高八合目的山屋，老师可以松半口气。登山经验丰富的梁梓浩叮嘱学生要慢慢吃晚饭，“学生惯咗掹开个口就扔晒啲嘢入口，我叫佢哋咀嚼多两下先，因为个胃啲血未到，加埋又有啲高反（高山反应），但啲小朋友都冇理啦，霹雳啪啦咁食。食完已经有人唔舒服。”

晚上多名学生高山反应不适

吃完晚饭6时多，大家准备上床休息，凌晨1时起床攻顶。对于陈圣方、罗德泰及梁梓浩来说，这一晚根本睡不着，也没有可能睡到。陈圣方说：“大概7点几8点，已经有小朋友过嚟，‘陈sir，我有啲唔舒服’。我自己未试过高反，唔太清楚点处理。Sunny sir（梁梓浩）好好，佢都唔休息嘞，即刻起身照顾𠮶啲同学。”

回想当晚，梁梓浩笑称“好似轮街症咁”，他说：“我摊低冇耐就有人敲我床边，佢头痛啦，有少少想呕，接住嚟有5个都系咁。大部分嘅问题系缺氧，佢哋唔习惯深呼吸，氧唔够。”

梁梓浩表示那几位学生的高反症状不算严重，他说：“有样嘢佢哋好聪明，有听我哋讲，一有唔妥就即刻揾我哋。做得好好，因为有啲嘢你觉得佢小小事唔理佢，就会变得好严重。”

那一晚，梁梓浩照顾那几位有高山反应的学生，用血氧仪监察住他们的心跳及血氧。他说：“个含氧量，嚟到𠮶阵得六十几，‘你冇嘢呀嘛？我仲惊㖞’，夹住佢，叫佢好用力呼吸，之后上到八九十，我先安心啲。就系咁长期监察住5个、6个学生，结果连部机都冇晒电，但我有带后备电嘅。”

应付求助的学生外，几位老师及梁梓浩还一直留意天气。梁梓浩说：“我全晚见证住陈sir（陈圣方）冇乜点瞓，以为佢玩手机，其实佢望住个天气报告，希望快啲变A，但一直都系C。”网上有富士山登山天气指数，A为最佳天气，C则为最差。

有日本登山向导建议分批，身体状况许可的攻顶，不适的留在山屋休息。梁梓浩马上拒绝，他说：“我哋20个人上，就要20个落，唔会分开。分开系唔理智做法，对于班中学生嚟讲，要话畀佢哋知，要同一齐上、同一齐落，咁先至开心。你话你有遗憾，大家都一样。”

在这次放弃登顶的决定上，梁梓浩喜见学生的成长，他说：“佢哋会考虑埋有人唔舒服，而唔系自己想做乜嘢。佢哋学多咗嘅唔系技术层面嘅嘢，反而心理同认知上学习紧要。”

当老师在通讯群组发出取消登顶的讯息后，有学生表示不满。罗德泰记得那位同学很喜欢四驱车，特地带了一架模型车上山，希望可以帮四驱车跟山顶的牌子合照。罗德泰说：“佢嘅反应系相当大，‘有冇乜搞错’、‘唔登顶咁嚟做乜’、‘以后都唔嚟’、‘你哋搞亲都唔嚟’，好大反应，将之前山艺班教过嘅嘢抛诸脑后。佢哋年轻人有情绪，你讲乜都冇用。”

凌晨4时，一行人离开山屋，准备下山，在没有期望下见到富士山的日出。罗德泰说：“听到佢同一番说话，‘唔上顶都几好㖞’，系同一个学生，隔咗几个钟嘅变化。返到学校事后分享会，佢喺感想都有写感谢老师、Sunny sir同咁多位同学嘅陪伴。呢啲咪系学习。”

梁梓浩记得曾经问过学生一个问题：“你觉得系交功课畀老师𠮶一刻学到嘢，定系做功课嘅过程学到嘢？佢哋都好快答到系中间嘅过程，佢哋好明白事理。登顶最多影多张相，上山过程学到嘅嘢一定比登顶𠮶一刻多。”

梁梓浩也说：“呢啲系真真正正嘅体验学习，唔需要学校同佢讲要做啲咩。”

山艺教练：不建议弹丸登山

此外，疫情过后，今年出现登富士山的人潮，愈来愈多人选择即日来回的“弹丸登山”，梁梓浩不建议这种做法。他说：“唯一嘅天敌就系大自然嘅天气，好多人就系轻视咗天气。点解日本政府叫你唔好玩弹丸登山？因为你冇带够装备，高估自己体能，低估环境变化，去到高海拔2500米以上就会有高反，仲要好耗氧咁跑上跑落，冇返咁上下训练系唔得。”

在今次的旅程，他见到有弹丸登山人士打算入山屋避雨但遭拒，他说：“点解弹丸登山唔系好做法？当天气一转，你冇地方可以躲避。山屋话闩门就闩，话冇位就真系唔俾你入。”