外国行山露营产品难适应湿热天气 邱季良创本地品牌服务香港人
邱季良（Angus）自小喜欢行山露营等户外运动，长大后投身制造业，为外国户外品牌处理代工生产（Original Equipment Manufacturer、简称OEM），90年代自立门户，成立公司，继续专注OEM。邱季良为外国品牌营营役役多年，一直有个创立香港户外品牌的梦想，至2007年下决心成立“Re:echo”。
邱季良认为香港有能力创造并有市场空间发展自己的户外用品品牌，而且香港人一直走在亚洲户外运动潮流的尖端。他表示外国品牌产品在尺寸及用料上未必适合香港环境，所以致力设计本地化的运动上衣及睡袋等，鼓励更多港人行山接触大自然。
Angus是香港户外用品装备的老行尊，1984年入行打工，为The North Face等知名户外品牌处理OEM。他笑言那时工作量很大“做到傻”，但结识到很多外国品牌的高层，他说：“我做𠮶间公司好大，但得我一个有兴趣做户外用品，所以公司接到所有嘅户外客都系揾我。”
少年时爱上行山 加入民安队
Angus在学生年代最喜欢上山下海，“读书唔得但玩就得”，结果帮到他的事业发展。他续说：“八十年代行山只系少数人嘅活动，我就系少数钟意玩行山，又玩爱丁堡（爱丁堡公爵奖励计划，现称香港青年奖励计划），参加民安队。我唔识造衫，我剩系识玩睡袋、帐篷，但公司三百几人都冇人有兴趣做，所以就交畀我。”
10年打工生涯后，Angus在1994年成立公司，靠积累的人脉争取到美国品牌Mountain Hardwear的代工，并将产品引入香港销售。他至今仍难忘该品牌的露营装备，但同时发现有些外国产品与香港市场格格不入。
外国品牌产品不合港人身形
他举例说：“John（香港著名攀山家曾志成）有次去阿拉斯加行唔知咩山，问我有冇赞助。我同Mountain Hardwear老板讲声，送件down suit（羽绒夹乸衣）畀佢。外国啲大只佬好大只，佢哋嘅细码已经54吋胸，𠵱家睇番件衫咁鬼阔嘅。外国人种文化唔同，最明显系服装尺寸唔同，睡袋都系。”
“我以前差唔多全世界嘅睡袋都造过晒，美国佬普通装82寸，长装88寸，82寸系咩概念？浪费重量又唔暖，睡袋要贴身先暖。外国会唔会就香港造细版睡袋？唔会。”身形短小精干的Angus说：“我咁嘅身材，买个短嘅都过长啦！咁点算？以前老师教睡袋系一定过长，要你塞件衫入去。”
装备寸尺以外，香港的天气也跟欧美大不同。Angus说：“以前代理Mountain Hardwear，美国夏天嘅T恤，佢哋夏天一早一晚都好冻好凉，所以T恤用料好厚，拎嚟香港卖，其实唔啱著，个个都话好鬼热。”
Angus提到外地的Gore-Tex防水产品在香港湿热的环境未必做到透气，变成不舒服的“外有外湿、内有内湿”。他说：“喺外国，我可以行山一日都唔湿，但喺香港，未行都已经湿咗。外国唔使用到咁高透气度（嘅布）都做到，因为天气干燥。喺外国你入面湿咗，开拉链吹一阵都干咗七八成，但喺香港唔可以。”
防水容易 透气才是关键
他顺道介绍穿在身上的防水褛，他说：“防水透气好多品牌都做到，而我嘅角度系点样喺香港做到？防水好易，透气先系关键，在于薄膜嘅窿，其实畀多啲钱就得。我𠮶时买（防水透气布料）17蚊美金一码，Gore-Tex先12、13蚊一码布，𠵱家防水透气布3、4蚊，但我呢种仍然系17蚊。”
Angus补充，要明显做到透气效果，还需要配合地形风势，他说：“行山先感受到，上到高地会有风，同埋行山唔行得快，虽然中间过程会出汗，但上到山脊位可以干到。你喺市区行系干唔到，平贵都冇乜分别。”
故此，Angus一直想创立品牌，生产切合香港人需要的户外用品。再者，Angus认为香港人为外国品牌代工生产多年，有知识、有人脉、有实力去创造及营运属于香港人的户外用品品牌。
一直渴望创立香港户外用品品牌
“我𠮶时见到世界嘅户外大品牌都系香港嘅agency（代理）帮佢哋，香港人就帮佢哋嘅设计拎去生产。𠮶时大家都将生产搬去国内，香港系第一批人入国内开发，可以话系开荒牛。啲人吹捧外国产品咁好，劲都识飞，其实全部都系我哋造，香港人搞嘅。”
“香港人玩行山、露营、户外其实喺亚洲都算行得前，好似越野跑，以前好多新活动都系香港行先。其实香港有市场，但冇自己品牌。我做咗呢个行业咁耐，又识生产，又涉猎好多大品牌嘅销售流程同管理，我可唔可以将呢啲经验拎去做品牌？我最想嘅动力系，香港应该要有个好嘅品牌。”
经过多年的酝酿，Angus于2007年成立“Re:echo”。
Re:echo首批产品中，包括一件适合曾志成身材的down suit。Angus笑言：“系为John而造，因为唔会有其他人买。虽然冇value（商业价值），但我觉得要造，因为代表我哋系专业嘅攀山品牌。”
在Angus发展Re:echo的路上，总有John的身影。两人相识约30年，互相尊重及欣赏，虽然他们走着不同的攀山路，但方向一致，希望为港增光。John对攀山的热情，令Angus相信香港人都需要专业登山用品。当Re:echo推出新产品，Angus会拜托John测试。当John外出攀山远征，Angus就会为他提供装备，例如可以承受-40度低温的睡袋。
赠Re:echo股分予曾志成
Angus谈到两人的情谊：“后尾好熟，我就话畀啲share（股分）佢。我诚意邀请佢成为我哋一分子，反正有新嘢就揾你测试，你去trip我又支持你，不如你都有埋ownership（拥有权）？一齐打造香港品牌。”
Angus近年多次赞助香港人攀登珠峰，包括资助近30万装备给2019珠穆朗玛中国香港攀山队。他还会为尼泊尔的雪巴人提供装备，甚至出真金白银帮雪巴人建屋。他说：“我同John有样嘢好似，想make the dreams come true（令梦想成真）。”
John有没有邀请过你一起爬雪山、攀珠峰？Angus笑道“当然有”，但他补充“唔好搞我”！
Angus表示年轻时也有攀山梦，但到三十来岁，他面对现实而放弃了，因为他每次到海拔3000米以上的高地就会有高山反应，而且他难以接受一个月不能洗澡。他说：“行山交畀你搞掂，我做个品牌同你爬山差唔多，挑战都系一样，点样创造新产品，打入市场，都系由零开始。”
成立Re:echo有15年，Angus最喜欢自家设计的睡袋，他卖花赞花香地说：“我嘅睡袋有个zoom（放大缩小）嘅功能，可以按需要缩短6至8寸，全世界冇见过，呢个系我原创，系个贴心嘅设计。”他还很满意自家研发的T恤，排汗快干，很适合香港市场，全靠他从台湾找到一款既薄又耐用的布料，“我未必再揾到另一只布取代佢”。
Re:echo产品难销往欧美
不过，Angus承认失败的产品更多，“我造10件嘢，有两件成功，我已经当赢咗，所以我话唔见晒啲钱就系咁解。我有啲十年前旧货都仲喺仓度。”Re:echo的产品能否往外地销售？“你指卖出去？系零，真系冇。”一来产品尺寸符合香港人身材就代表难以满足欧美人士的需要，二来其他亚洲地区仅视Re:echo为一个地区细品牌。
“你讲要赚钱的话，当年做OEM相对稳定啲，简单啲。我将OEM赚返嚟大部分嘅钱用嚟做自己品牌，其实唔见咗好多钱。如果我唔做自己品牌，我𠵱家应该可以唔使做，做咗（自己品牌）𠵱家就要继续做。”
“如果单纯考虑赚钱，做品牌未必系最好嘅选择，因为要处理嘅嘢会多好多！”
“做品牌，首先因为想有个香港品牌，亦希望透过呢个品牌推动大家接触多啲大自然，反思多啲。行山最好就给予人空间去反思，反思后面就系进步。”