足球女将专访3｜七问七答谈香港女足　“只想联赛有进场仪式”

ViuTV节目《足球女将》播映期间成为城中热话，从24个由零学踢波的萤花女将身上，我们总能找到一些共鸣——日夜苦练却察觉自己未必是最有天份那个；明明不是职业球员却很着紧一切；无论如何只要跟队友一起踢波就满足的心情。
在《足球女将》终极战播出前，我们邀来萤花足球队翼锋、场地单车前港将马咏茹（Vivian），和出任萤花女足守门员教练、香港女足代表梁蔚雅（Lay）来一场对谈：两人身份彻底相反——球员、教练；精英运动员、兼职运动员。
最后一集，也是这个访问的核心部份——曾是体院精英运动员的马咏茹，在体验过半年兼职足球员的生活后，有什么感受？梁蔚雅作为女子足球员，在香港，“职业”并非选项，她羡慕全职运动员之余，对女足也仍有期盼。今集直接以两人的对话，探讨精英、业余和香港女足。
（本文为《足球女将》访问系列的最后一集，共三集）

《足球女将》专访系列：
第一集：马咏茹曾拒绝接拍　从足球领悟“1+1＞2”
第二集：爱哭的龙门教练　梁蔚雅感谢萤花：令人唔踩女足

Q1：Vivian以前仍是精英运动员时，对香港足球有什么看法？之前半年过着业余足球员的生活，有什么体会？

Vivian：细个𠮶阵……对唔住啦，我觉得足球喺香港，真系唔系个超劲嘅运动。当然都佩服所有运动员嘅，但系𠮶时就觉得足球都唔系咁劲，点解咁多人支持？我哋单车仲劲啦！但系踢咗之后，我就发现，其实足球真系好难，大家唔好成日笑英超𠮶啲人咩踢得唔好，话佢又甩咗，好鬼难啊大佬！

真系做咗先知道，真系唔容易。佢哋（女足）唔系精英运动，但因为佢想踢足球，需要做好多其他嘢去support呢件事。朝早训练，中间返工返学，跟住夜晚再去训练，𠮶种辛苦，除咗训练上辛苦，系心理好辛苦、好攰，但系你又好想做。

Q2：觉得全职运动员的生活，和业余运动员最大的分别是什么？

Vivian：全职有好多人帮你安排，你一定要做好、一定要有表现，你都唔会容许自己做唔到，因为你个压力系嚟自全世界都帮紧你，而且你成个人生就系做紧呢件事。平时训练，有车送你去单车馆，跟住食嘢，返到体院已经知道要食乜，再返去（宿舍）瞓觉。

Lay：好幸福啊……

Vivian：

我觉得兼职好困难，因为你要自己控制、安排好多嘢，但系样样都要做到。所以我觉得大家困难嘅地方唔一样，但系我今次真系第一次感受到，如果喺香港做个兼职运动员系点样嘅，个感受系，（向阿Lay说）你哋好辛苦。

Lay：之前我啱啱读返个大学学位，接触到好多精英运动员，知道佢哋嘅生活系，朝早起身落canteen（餐厅）食嘢，餐单有营养师跟；之后出去训练，训练完就返嚟写纸仔book物理治疗。

Vivian：系呀系呀！

Lay：跟住再食嘢，跟住就瞓觉……当我知道原来个对比可以咁大嘅时候，一定好渴望可以咁样，见到女子足球员同全职运动员个分别，令我发现自己奴性好重。

Q3：香港女足只得业余性质，阿Lay会羡慕全职运动员的生活吗？

Lay：都有非常羡慕嘅。第二次去亚运会（2018年雅加达亚运）时，完咗我哋嘅比赛，要留多几日先走到，就睇下其他项目，发觉原来精英运动员系可以唔使谂其他嘢，唔使谂读书、唔使谂返工，生活嘅帐单都唔使点谂，因为住喺宿舍。

之前读教育大学，课程系奥委会资助，见到有精英运动员揸啲车咁靓嘅，我觉得出奇，跟住又好多赞助、广告，我哋都仲系讲紧，一年可能赞助一两对手套，我都幸运啲，好早期已经有一个自己由细好钟意嘅手套牌子赞助，已经好开心。

当然会有少少羡慕，但系我觉得唔好谂太多，专心做返我自己嘅角色，因为可能自己做紧嘅嘢，系为紧之后嘅人，我都慢慢考教练牌，想将我识嘅嘢交畀佢哋。

Vivian：你一定要行咗先嘅，先会有之后嘅事。好似我哋咁，都系因为以前有宝哥（黄金宝）赢咁多奖，因为张敬炜（2006年亚运记分赛夺金），先有单车馆，佢哋一开始都冇资源，个个打十号风球、揸住架车，自己踩出去（训练）。

其实我哋系十号风球、黑雨都要练，水浸我都要行出去（体院），冇嘢阻止到我训练！我最钟意训练！我最钟意单车！

Lay：（大笑）个速度就系咁练返嚟！

Vivian：我哋咁幸运，可以留喺体院，或者有自己嘅单车馆、资源多，系因为前人做咗好多好多嘢，喺好刻苦嘅环境之下都攞到成绩，先有我哋后面咁幸福、更加容易做成绩。

Q4：做了足球员超过20年，阿Lay觉得多年来，香港女子足球有什么变迁？

Lay：个变化系一定好大，因为我踢得太长时间，由初期我哋仲着紧男子队嘅衫比赛，每次都可能系著唔同号码嘅衫比赛。𠮶个年代，Facebook都未有。

到依家大家可以有自己嘅波衫、女子队嘅部门、管理，又有媒体报导，以前系零，YouTube都有啲YouTuber拍下啲纪录片，今次呢个电视节目（足球女将），一开始我觉得系诈骗，无理由电视都会想做女足嘅节目，但再多埋呢样嘢，我就觉得好好。

全球嘅女子足球嘅水平高咗好多、人口都多咗好多，由以前未系亚运项目到变咗亚运项目，由以前无喺香港踢过主场比赛，到喺香港踢主场比赛，由就算踢香港主场比赛都系得自己亲朋戚友，慢慢有球迷跟住，由无直播变有直播……叫做见证到好多呢啲嘢。

女子联赛以前真系得甲组，而家有甲，乙，丙组，再有青年队嘅比赛。咁，我觉得成件事系好好嘅，但系我哋要再做嘅，就真系要再尽快收窄同其他邻近国家嘅水平，唔可以满足。

Q5：你认为香港女足要进步，最需要做的是什么？

Lay：我自己觉得可能系联赛先，会唔会可以喺好啲场地去踢呢？一啲国际比赛或者大型啲嘅比赛，用真草场得唔得？因为我哋嘅联赛依然仲系彷真草。上年足总杯决赛安排到真草场，但系去咗一个半个月冇打理嘅真草场，啲草好长，基本上系cover（盖过）咗成对波砵的背面，啲波唔去㗎，咁点踢呀？

但我哋一出去踢国际赛，第一，国际赛都系踢日头，因为台湾嘅联赛都系踢日头嘅，我哋仲系踢紧夜晚，仲要尾场系（晚上）9至11，咁已经好大分别，加埋场地分别……

同埋人哋真系会有个列队进场仪式，连萤花最后一战都有一个进场仪式。但系香港嘅联赛，好啦，球证只系会吹鸡，话“出嚟啦”。可唔可以先有呢啲形式化嘅配套，会令人想再积极啲，女仔有形式，就会好想做好件事。球场喺季初系划咗球员区、教练区、后备热身嘅地方，去到季中又捞返埋一齐，又冇人管㖞。

好简单，净系想有个进场仪式，场地唔好改，喺返FTC（足球训练中心），可唔可以有呢啲？点解要去到足总杯决赛先有？譬如而家好似九龙湾（公园）重新铺过草地，系咪真系book唔到呢？希望多啲嘢可以望到，多啲明确嘅方向，唔使话我哋出到国际赛，唔知列队系点。

Vivian：如果咩都唔知，你会觉得自己根本唔系一个嚟竞争嘅队、唔系嚟赢，只系嚟体验下、玩下咁嘅感觉，因为我咩都唔识，我系应该要输，但其实唔应该系咁。

Lay：我觉得感受到人哋将你摆喺咩位置，系好紧要，或者你感受到个赛会或者球会，或者观众点睇你去到边个位，系好紧要。

Q6：对Vivian来说，现在足球在你生命里又是什么位置？

Vivian：我觉得我仲会踢……我觉得开心，开始用到个波嘅时候，就觉得足球系好玩，有冇比赛踢就再算啦，但我觉得踢波都几好。以前做过欧国杯（评述），𠮶阵时系唔识踢，只识睇个波入定唔入，有时英格兰踢咗成场都唔入波，就觉得闷到黐线，踢到凌晨六点钟都未入，我睇到你咁夜，你仲唔入！

依家识睇佢地点样企位，成个睇波角度唔同咗，识睇就发现其实系好睇。以前我唔明点解啲男人咁钟意睇波呀，乜鬼睇咁耐？90分钟好鬼长，单车两秒钟、最多咪两分钟完，咁先刺激㗎嘛。

足球嘅美丽之处，系入面好多人去令呢件事成功，你见到一个人入波，其实有好多人帮佢，助攻又好、后面后防做得好，前场先攞到波。所以，我觉得足球系带咗畀我一个新嘅知识、新嘅灵魂。我而家啲球例好熟㗎，唔好再吹我越位呀！好嬲呀！

Q7：阿Lay为何一说起女足就很易哭？

Lay：系做完啱啱呢个节目嘅“黑房”，我先谂点解自己次次都会喊呢，我觉得系因为真系见证住有啲嘢，由冇到有，再出去其他地方嘅时候，见到个差距、分别。之后，我就每次都觉得呢啲好感动，同埋每次都再提醒自己，我真系好钟意做呢样嘢。

我喺节目讲“我哋唔系全职”，𠮶句我就开始喊，好多人话佢哋都睇到喊，先知原来咁多人觉得我哋好辛苦。大家都真系几辛苦，又返工又各样，陈咏（诗），（张）炜琪𠮶啲，佢地都好辛苦， 尤其是炜琪，佢身兼多职，但所有焦点都喺佢度；陈咏又系踢到40岁。

但我地都系得出咗结论，就系大家都好钟意呢样嘢。

呢样嘢系有变好，但有啲嘢系可以再做多啲，见到其他地方点解进步得咁快，我哋系有进步，但系好似已经安于现状。

我人生好大部份、每样嘢都系谂咗足球先，我决唔决定读个Degree嘅时候，我要睇下个时间表，究竟我可唔可以踢波先？我返呢份正职（保险从业员）都系因为可以踢到波，所以过往摆咗好多心机落去咁，所以就每次讲嘅时候都咁。

Vivian：咁样嘅生活，我系过咗半年，但其实阿Lay系过咗廿几年。佢真系好辛苦，佢真系要好钟意呢件事，先可以继续去做。而我觉得，你揾到一件你好钟意嘅事、你好钟意嘅运动，系一件幸福嘅事。

Lay：我系守门员，呢样嘢令到我有时喺生活上遇到一啲难题或者困难，都系用返点样喺个网执返个波出嚟、然后嗌返啲队友“再嚟再嚟”嘅心态，令自己可能喺𠮶三两秒重整返，有时应对返生活一啲难题，咪当呢个系一个波，喺个网执返出嚟，𠮶下就完咗，要同自己讲，继续啦，我哋再嚟啦。

所以，足球点解占咗我咁大部分？因为我连一啲生活嘅困难，难题，或者遇到开心唔开心嘅事，我都系用踢守门员嘅心态去应对。

对足球嘅概念，已经渗入咗你成个人生。