【畸‧歌词】“忘记我不要紧　谁松手我握紧”　其实你只系爱自虐

最近唔少女仔“带埋”(绝对唔系逼！)男朋友入场睇《原谅他77次》，其实都几睇唔惯周柏豪嘅角色。话晒佢都系兵歌之王，见到周柏豪就自然谂起佢喺《六天》、《够钟》、《Smiley Face》入面有几惨。不过又不期然令人谂起，其实男仔有时都几无辜，周柏豪系戏中做衰人(虽然我唔觉得有几衰) ，就畀一众女士们唾骂。但谂返起佢啲兵仔歌，其实做好人又唔见得可以得到女士们嘅欢心㖞，甚至乎会觉得做兵好变态添！

咁多只“柏豪兵歌”入面，最痴线都莫过于《Smiley Face》。歌曲开头一句“还想邀请我　分析他个性”已经讲咗女神系有心仪嘅对象，你硬系要冲埋去都唔紧要，但你又要“无法对应　最后我交出了 A Smiley Face”，咁咪就系无性格啰！做兵最大嘅征兆就系无个性，真系讲句抵你做兵嘅！

不过，讲到最过份始终都系副歌部份“忘记我不要紧　谁松手我握紧”，系呀系好浪漫呀，但做水泡做到自得其乐系咩玩法呢？话就话“忘记我不要紧”，但系又要期望人哋感情不稳会返嚟你身边，咁你系想人哋忘唔忘记你呢？黑心之余又一时一样，精神分裂咩？

话就话所有付出都只系希望搏得红颜一笑，懒伟大咁话“亦不想　贪一吻　只想到某日当你寒冷　做你热能”“给欺负了　拥著我哭”，其实你脑海入面咪又系FF紧可以将对方一拥入怀，唔好话比我听你无谂住有下文呀？幻想咁多，将自己搞到成个悲剧人物咁，其实系你细胆呀？定系你纯粹钟意自虐呀？

讲到最尾终于露出孤狸尾巴“I wish I could be more than just a friend”，原来之前讲乜都假，结果都系想同女神讲：“系呀，我系想追你呀，不过你之前钟意其他人我咪放弃住先啰，而家你系咪OK呀？你OK我随时Ready架！”喂男人老狗唔好咁核突啦，你估女神听到会感动流涕定系会质疑你系咪真系钟意佢呀？其实钟意人咪讲啰，乜都话无所谓，让让下就一世架啦，唔通你谂住做兵真系可以拖到女神只手咩？