【畸．歌词】“由这一分钟我一生就只有你”　呢件事真系好恐怖！

唔少以爱情为题嘅广东歌词听落去都令人“冧滋滋”，尤其男歌手主唱嘅情歌，好多都系讲“我有几爱你，我无咗你唔得”嘅绵绵情话。林子祥《分分钟需要你》当中嘅歌词写得好，“你似是阳光空气”，要不是郑国江将呢个咁露骨嘅想法包装得咁好，谂落成件事都几痴汉。入返正题，广东歌当中，词人应记唔止一功，而系好多好多功，因为佢哋往往都可以将一啲好恐怖嘅想法，包装到大家听到都觉得受落，尤其女士们更加会听到湿了眼眶。但系各位男士们，停一停，谂一谂，睇真啲歌词，其实当你唱比你嘅女伴听，而佢又听得如痴如醉，但最终你根本又唔可以好似歌词内容咁浪漫嘅时候，随住剧情走向，你哋分分钟为自己设计出最完美嘅陷阱。

其实有啲歌唔系个个人都有资格唱比伴侣听，你本人如果唔系咁浪漫嘅时候，你女朋友真系会好失望。唔信？我唔直接答你，我用例子答你。好似侧田嘅《三十日》咁，劈头第一句就系“逐晚倒数为见你准备”，哗吹水就系咁讲啫，咁得闲逐晚倒数，逐晚去准备？你估你睇紧“电车男”咩？揾一晚唔洗OT都偷笑啦！到你女神发现你为左准备见佢而失去咗一个晋升嘅机会，你估佢𠮶刻会谂啲咩？唔洗讲都心照啦。

去到副歌，最动人嘅一句“由这一分钟我一生就只有你”更加离谱。系，我承认男人专一起上嚟，真系会希望24小时都陪住女神。不过作为女神嘅你有无谂过，“由这一分钟我一生就只有你”呢句唔系个个人都做到架！除非呢个男仔好似华英雄咁，命犯天煞孤星，咁你就可以期望一下佢一生就只得你一个嘅，不过到时你可能要为自己祈个祷先，呢个人注定冇“父干”架喇㖞，而且...免得佢最后都仍然系天煞孤星。其实当你唱完《三十日》比女神听，万一佢问返你：“吓？你约我之前唔准备架？你又话你一生净系得我一个嘅？点解我揾你陪我你又唔得闲？”你可以点答？唔通你话：“其实句歌词都系打个比喻啫。我当时嘅意思系话我心里面只有你一个，不过其实我都要同阿爸阿妈食饭，要听下兄弟诉苦，上司叫我开OT我都无得拒绝嘅。你会体谅我架可？”

好！我又当你话讲钱庸俗。讲返啲浪漫嘢“只想可拥著你 然后吻你 让你惊喜”，喂大佬，你估咁就叫浪漫架啦？咁顶多都只系男人嘅浪漫啫。女神同你讲浪漫，你唔系好似张志明咁搞返场大龙凤追返余春娇都唔算浪漫啦！听都听得多啦，浪漫少不免要用钱堆砌，唔买返扎花、Book返间高级餐厅烛光晚餐、再直落食返件Lady M，唔通真系陪你食谭仔行公园咩？比日资公司收购咗唔代表高级架，唔好咁天真啦！如果你单纯到觉得每次出街就“拥著你，吻你”就叫做惊喜，我真系劝你返屋企。

最出事其实都系去到“游历世界让你惊喜”呢一句，下巴轻轻懒浪漫嘅一个承诺，往往换来万劫不复嘅后果。讲真，正常人喺香港打份工，我当你两万几三万蚊一个月，几个月去一次日本都无乜问题嘅，不过你预左唔好贪小便宜买平机票，一阵畀人掟落机打到流鼻血就GG。你生得矮冇乜所谓，生得高又坐得辛苦，未出发就一肚气。

好喇，讲到游历世界，就真系要环游世界，你去亲都东亚地区，再唔系就返大陆，你个世界唔会得咁细挂？去欧洲虽然话可平可贵，但断估都唔会晚晚住民宿、餐餐食面包啦，到时你只会变成喜记老板，走出嚟大叫“那有钱？”，就算你顶得顺，重点系，冇假！转个头你女神同你讲：“你唔得闲呀？Adrian话请我去马尔代夫玩㖞。”咁你只能够同自己讲：“帽事嘅！”

去旅行就预咗储唔到首付啦，冇楼又唔够“兴奋”，回归现实把啦。

所以话，有啲歌真系唔系人人唱得起，除非你系一个富二代，得闲就返Daddy间公司帮下手，阿爸阿妈就工干多过食饭，朋友个个都喺外国发展，得闲先返嚟聚下旧，最好有架私人飞机，想几时飞就随时飞。咁你就可以试下唱呢首歌去氹你女神嘅，不过送歌黎讲，送钱可能仲实际。

奉劝各位女士听到男伴听住呢首歌都唔好太多幻想，歌仔呢家嘢真系听下算啦，其实男伴为你花尽心思，唱歌比你听都系为咗搏得红颜一笑。如果你听完真系以为“由这一分钟佢一生就只有你”，我只能够讲一句：“你唔好咁天真啦，你估男人真系唔洗返工咩？”