卫兰出年一月再开演唱会　粉丝网上点歌红馆唱

卫兰虽然曾经被黎明取笑佢“肥过部电单车”，不过上天系公平嘅，所以赐咗一把靓声畀佢。自从转咗新公司，卫兰最近频频出新歌，简直系歌迷福音，而爱锡卫兰嘅一众乐迷纷纷喺“King Jer娱乐台”票选卫兰成为“最靓声歌手”嘅冠军。得到三千几票嘅卫兰不但止拍片喺网上谢票，仲同歌迷宣布咗一个好消息，就系佢再开红馆骚啦！

自从2014年开完《卫兰 Walking to the future 2014红馆演唱会》之后，Janice已经事隔三年无再开红馆骚，今次Janice同大家确认：“出年一月，我会喺红馆开我嘅个人演唱会。”出道将近十四年，数数手指，原来呢个已经系卫兰第四个红馆举行嘅个人演唱会，之前仲试过喺红馆开三面台！唔知今次有无机会开足四面呢？近期红馆档期咁爆都畀Janice攞到一月开骚，粉丝当然开心。不过更加令人兴奋嘅系，Janice呼吁粉丝可以随便喺网上点歌，到时会跟据民意喺红馆唱返比大家听，好快已经有唔少网民指定要点唱《如水》、《心乱如麻》、《大哥》呢啲大热作品。似乎近年歌手都兴玩网上点歌，有个咁民主嘅制度实在系令人鼓舞呀！

其实听靓歌就预咗架啦，不过深信更多人期待卫兰演唱会嘅Poster快啲见街就真。话晒卫兰仲喺A Music旗下嘅时候都发生过唔少“Poster灵异事件”，包括2009年推出精选专辑《Wish》嘅时候，以卫兰展示“超人体工学”瑜伽姿势作为封面。另外2014年嘅时候，《卫兰Walking To The Future Live》嘅演唱会Poster当中，卫兰亦离奇地由“电单车”身型瘦到变返出道时期咁Fit。唔知道转投新公司后第一个红馆骚嘅Poster又会唔会有新惊喜带畀大家呢？