HIT歌先要有个爆歌名？　填词人陈咏谦：歌名可以令首歌起死回生

正所谓“人唔怕生坏命，最怕改坏名”，可能连歌曲名字都一样。最近就发现，原来有唔少hit过嘅歌曲，都系以“给自己”而作为歌名嘅开头，而且反应叫好叫座。例如：王菲嘅《给自己的情书》，梁咏琪嘅《给自己的情歌》及李宗盛嘅《给自己的歌》等等，首首都唱到脍炙人口。你可能会谂，佢地三个都系天王天后级，加上唱歌好听，所以唱乜都红。但系钟舒漫嘅《给自己的信》，Keeva麦家瑜嘅《给自己的命书》，光良嘅《给自己》等等，其实都有不俗嘅成绩。

究竟哩啲歌会hit系因为用上自己第一身所以特别有Feel，特别有共鸣？还是“给自己”哩类歌名嘅歌有一种奇妙嘅吸引力？

被誉为黄伟文接班人嘅填词人陈咏谦接受访问嘅时候就有自己嘅一套睇法：“我又唔系好认同“给自己”就一定HIT，不过我觉得以前‘给自己’嘅歌曲唔多唔少都系因为王菲嘅《给自己的情书》而开发出嚟，因为哩首歌真系太hit。我谂‘给自己’哩类歌名会令歌迷去听嘅原因，系同香港文化有关。香港系一个较压逼嘅城市，年青人无乜机会同自己倾计，好多年青人都唔识得表达自己，所以哩类型嘅歌就会变成一种同自己展开对话嘅工具。”

陈咏谦：“古语有云‘人唔怕生坏命，最怕改坏名’，哩句说话我好认同。一间餐厅都要有个好嘅招牌吸客，一个好嘅时装品牌都要有一个型嘅logo，当然歌名都唔例外。一首歌，如果歌词平庸，但一个hit到人嘅歌名，可以令一首歌起死回生，改错歌名亦可以令哩一首再感动人嘅歌石沉大海。就好似JW嘅《矛盾一生》，其实歌名本来叫《矛盾》，但谂咗好耐，《矛盾》嘅个名好似唔够响，唔够力，就咁叫《矛盾》应该唔会hit，点样可以戏剧啲，点样可以再令人有歌曲嘅意景？我再谂一谂，要你矛盾一世先够伤，要你矛盾一世先够强烈，所以最后到派台当日嘅朝早，我就将《矛盾》变成《矛盾一生》。”

“讲到今年个trend我仲未睇到，今年最hit嘅两首歌《长相厮守》，《原来只因深爱著》，歌名都唔算好特别，但系都hit爆，所以话呢当你见到个靓嘅女仔嘅时候，你理得佢个名叫做Mary又好Margret都好，样够靓，你最后咪一样会沟！所以希望香港有多啲靓女啦！”陈咏谦说。

“其实歌名就系标题党”

至于问到香港灸手可热填词人梁柏坚就觉得“给自己”系列爆红有另一个见解。梁柏坚表示：“真系无谂过点解‘给自己’系列嘅歌会红，可能系因为‘给自己’都系女仔歌，比较容易有女仔market，同埋哩类歌歌名好catchy（抢耳）。其实歌名就系标题党，因为而家网民听歌唔会听哂一首，只会听一段，所以我觉得哩个年代要改歌名，要够古怪，够catchy，够slang（俚语），因为依家歌名就等于hastag。”