专访︱莫文蔚细诉5首广东旧歌的故事：希望作品唔会被时间淘汰！
上回讲到，将于六月举行的《绝色莫文蔚世界巡回演唱会香港站2021》，莫文蔚（Karen）届时会为香港观众度身订造不一样的“终极歌单”，“今次返嚟香港，好多之前冇机会唱嘅广东歌，都会摆入去今次呢个骚，所以Rundown会有好多调整，加咗好多广东歌。”
所以来到专访的第二部份，话题焦点顺理成章围绕Karen唱过的旧广东歌，先由记者亲自挑选5首作品：《潮湿》、《妇女新知》、《幻听》、《透视》和《瑕疵》，再让她分享当年跟创作相关的经历与回忆。
碰巧今年是收录《潮湿》的广东大碟《全身莫文蔚》推出25周年，就由当年那幅震撼六百多万香港人、至今仍然是本地乐坛唯一一张流行歌手背部全裸入镜的唱片封面照说起，Karen笑言这是她与时任专辑创作总监的林海峰一手策划。“当年个脑成日都有呢个唔著衫、趴喺梳化嘅Image，（我知自己）终有一日系要影幅咁嘅相！”一个够胆谂，一个够胆影，结果成就这帧经典之作诞生。
撰文：游大东
专访︱莫文蔚6月红馆骚后告别大舞台 称见好就收：唔想死做烂做
#1 《潮湿》（1996）
来潮最易令人疲乏 湿得太过份 共你这么爱情就似 春天空气里头 是太翳焗而浓密 偏将我贴实 共你这么爱情就似 春天的感觉潮和𣲷
“《全身莫文蔚》真系好前卫，型到爆！其实一开始已经决定咗要咁做（唱片硬照与歌曲风格），因为𠮶阵时（1996年 ）相比台湾作风，香港其实都几保守，好多嘢都话太前卫，啲人唔会接受，而滚石唱片就好大胆，所以签咗呢间公司之后，自己有好多嘢都想试，有好多Ideas，咁难得（有此机会）梗系做啦。”
“喺香港有冇话乜嘢系唔得？总之你系新人，如果你系靓靓女女，第一击就一定系周慧敏𠮶只（标准），一定系走‘玉女’路线，冇第二只Formula㗎，到你之后掂咗喇，你就可以开始表露真我，做第二啲形象，所以初初1993年出道嘅时候（获星光唱片发掘，推出大碟《Karen》），我系被迫扮玉女，啲头发要挛挛哋（鬈曲），著条圆台裙，唉，捉到鹿都唔识脱角嘅，我只脚咁靓，有咩理由著条咁大嘅圆台裙遮晒？”
“总之去到滚石嘅时候，就已经急不及待将我最Yeah𠮶一面释放出嚟，而《全身莫文蔚》（背部全裸）呢个Concept系我Propose嘅，因为我同Creative Director，即系林海峰谂紧呢只碟嘅成个Image，我就同佢讲，我个脑成日都有个Image，就系唔著衫，趴晒喺个梳化度，（我觉得）总有一日我系要影一幅咁嘅相，我就同阿Jan讲咗呢件事，佢就话：哗，唔系嘛？系就嗱嗱声即刻影喇。咁就出咗呢张相，当然‘全身’系食字，意思系重新出发，再加埋呢张相，其实成件事系好完整，啲歌又咁新颖前卫，总之尽量去做。”
“《潮湿》呢首歌竟然系李宗盛写嘅（另一位作曲人是梁伯君），一听，咦，乜咁High嘅？即系原来佢都有狂野嘅一面啰。其实𠮶阵时我仲系咁新，基本上可以同边个合作、唱边个（创作）嘅作品，我都真系𦧲饭应，愈唔一样就愈好啦，我次次都想试新嘢。首歌应该系讲一段男女关系，其实我当时亦未咁识钻研歌词，总之有我就唱，好似一个演员咁，有剧本就会去演，而我系钟意呢首歌，觉得所有嘢都好‘劥’（猛烈）、好正、好有型。”
#2 《妇女新知》（2000）
今日我嚟教大家整甜品 首先用滚水冲开Expresso粉 再摆啲Lady Fingers落去浸到腍 另一方面将啲蛋白搅一阵 起泡就加啲Kahlua再搅匀 最后两样倒埋一齐整到一层层 恭喜你咁就完成咗个Tiramisu 一个世界驰名嘅意大利甜品
“《妇女新知》系得意嘅，我又未试过Rap，所以当年收到呢首歌嘅时候，会问：得唔得㗎？唔知㗎㖞！咁就试下啦！成件事系好玩，因广东话嘅Rap（当年）已经少啲，仲要Rap嘅嘢系好过瘾，最正嘅就系Wyman（黄伟文）将整Tiramisu𠮶段嘢（食谱）写咗落去，因为我真系识整Tiramisu。”
“故事系我初初返香港入行𠮶阵就已经识Wyman，𠮶阵时佢仲系（商台）DJ，因为我喺意大利读书嘛，大家都对我嘅读书生活好好奇，跟住我话当年一去到意大利，第一样嘢学识嘅，就系啲同学仔教我整Tiramisu，我就将（过程）形容咗畀Wyman听，点知佢一直记住呢件事，到（多年后）佢写呢首歌畀我，就将呢样嘢写咗入去，当年Tiramisu喺香港仲系好罕有，加上首歌系透过买嘢去表达同一个男人嘅关系，又有形容港女（作风），成件事真系好精彩。”
#3 《幻听》（2001）
丝质的被单摩擦黑兔毛背心 男烧衣主角吐出一句一句南音 和金嗓子拥吻 水龙头剧震 谁于珍妃井里 喊哑了灵魂 讲真我只不过想我们结婚 凭积分赠饮 怕解雇便冻薪 查询班机请按 那忍看长平自刎 王昭君满腔悲愤 母亲节愈来愈近
“《一朵金花》呢张唱片系好High，比起《全身莫文蔚》再High啲，又系喺滚石啦，佢哋好玩得，因为当时同伍佰已经好熟，之前同佢喺台湾合作过（1998年合唱《坚强的理由》），所以决定要做只广东大碟之后，唱片公司就同伍佰讲：伍佰老师你帮Karen做只广东碟啦，你想点玩都得，总之你谂得出就做啦，自由度真系好大！”
“我记得当时我哋仲喺湾仔嘅‘唐楼’（由罗大佑开设），（录音室）系顶楼𠮶层，对住维港海景，成只碟就系喺𠮶度录，滚石成日都用，咁就好High、好Experimental嘅一次。讲起伍佰，我觉得佢直头系神级，Rock当然冇人唔知啦，但系佢将Rock加入电子音乐元素，变咗系一样之前冇人做过嘅嘢，仲要全部都广东话㖞，啲火花真系（爆到）霹雳啪喇，成件事冇好刻意去Plan，但就系碰撞到呢件事，总之就系凭感觉去做，去尽佢。”
“我又冇去考究林夕嘅歌词入面有咩讯息，但𠮶个Groove系好正，好好Feel，同埋啲字古灵精怪，我都唔知唱乜，所有嘢都系讲《幻听》呢个Image，所有嘢都系九唔搭八，但又Blend埋一齐，首歌好Colorful，每次开Concert都走唔甩，一定会唱。”
#4 《透视》（2003）
世界没有孔雀 你会看到知更鸟吗 世界厌弃钻石 你会发觉沙的美好吗 若是现在问你 欣赏我吗 或是纯粹观赏我吗 长裙极黑愿望极蓝 不想身边的你看漏眼 红鞋极花寂寞极难 十万件衫穿不上心间
“《透视》呢首歌都算系我入行以来一首好重要嘅作品。（系你入行以嚟第一首四台冠军歌）系咩？WOW，系呀？！我都唔知呀！（后来经理人向她说，是知道有这件事）呢首歌系霆锋写畀我，一来我真系识佢，二来𠮶段时间我哋系邻居，住喺半山区同一幢大厦，当然唔系成日都见到佢，因为我都唔系成日留喺香港，总之识佢好耐。”
“当然唔系因为佢系我邻居，所以先有《透视》，记忆中亦都唔系我特登叫佢写首歌畀我，好似系佢话佢作咗首歌畀我，听完之后真系觉得好正，真系好用心去写，同埋周耀辉写嘅第一句歌词已经好劲，‘世界没有孔雀’，咁都谂得出真系好正。（点解咁样认为？）可能系你唔会谂到一首广东歌会有句咁嘅歌词，听嘅时候好震撼！”
#5 《瑕疵》（2015）
K: 早知道谁也有很多不美好 J: 十分想将恶习全部也制限住 K: 只需要还有美好那面蒙蔽住 J: 但始终本性未能抑压 一次 K: 要是病态渐露出请记住漂亮时 J: 还是我也想偷偷靠此 证实顽皮极你亦会宽恕 K: 或怀念某次 J: 盼你能明白用这诡计也有一点羞耻 K: 谁人用爱炼药将你治愈 J: 要爱我有阵时不易 K: 不舍得不宽恕
“关于《瑕疵》，旋律好靓，线条好丰富，我都唔知点解当初Juno会揾我（合作），我觉得呢首歌系一首好犀利嘅作品，即系（以往）冇呢啲咁嘅合唱歌，但我觉得合唱歌就系应该咁（处理），唔系就咁唱啲Harmony（和声），或者系你一句我一句，而系好似《瑕疵》咁，𠮶对Couple，大家对于同一件事都有唔同谂法，彼此会跟住旋律，有佢游走嘅方向，有时得我自己，有时又会（同男方）合埋一齐，啲字会叠埋一齐，跟住又会各自讲其他嘢，Wyman啲歌词真系写得好靓！”
“所以当我一听到呢首歌嘅时候，我系哗咗出嚟，心谂香港几时开始有啲咁高级嘅作品，好高级，真系好高级。至于录音方面，我哋一齐喺Studio录，录晒我唱嘅部份先，当然Juno都喺度啦，因为佢系监制，佢系Hands-on所有嘢，跟住到佢录。（所以今次演唱会都应该会唱？）得我自己一个就难唱啲啰，哈哈！”
“广东话我讲一世㗎嘛，唔会唔记得！”
记者作为莫文蔚的忠实拥趸，一直认为香港市场待薄了她，笑言假若20多年后的今天，Karen才正式出道当新人，她在乐坛的路一定会发展得更好更顺利吧？对此她不以为然，认为际遇如此，只能顺其自然地将事情做到最好，没有最好的时机，亦没有最坏的时机。“我觉得所有嘢都系整定嘅！好多人都同我讲，话《全身莫文蔚》呢张唱片，已经25年前喇，但而家你拎番出嚟听，都会觉得啲歌点解仲咁‘新’嘅？点解而家仲咁啱听嘅？”
Karen认为，作为一个专业的艺人，不应将视野只停留在某个时刻、某个地方。“我觉得作为一个Artist，一直都希望我嘅作品系唔会因为时间而被淘汰，希望可以一路Live On（存在），就算而家嘅Generation听到我以前嘅歌，都可以被感动，或者听得明，或者有Feel，我觉得呢样嘢系我想做到，做到先叫成功。”所以无论唱哪种语言，都是顺势而行，“我唔系太在乎用咩语言去唱，即系广东话、国语同英文，都系可以Reach Out到唔同观众。”她又指，不会因为自己少讲、少唱广东话而生疏，“唔会，点会呀！广东话我讲一世㗎嘛，唔会唔记得，或者讲得渣咗，呢件事唔会发生喺我身上，哈哈！”