专访︱莫文蔚6月红馆骚后告别大舞台 称见好就收：唔想死做烂做
“其实2018年我开始呢个Tour嘅时候，已经决定咗呢个就系Ultimate Tour，所以点解呢个名都叫做Ultimate Karen Mok Show，就系因为终极，亦都系最后一次，到时我所有本领都要攞晒出嚟。”三月底的深夜，乐坛天后莫文蔚（Karen）完成拍摄工作后，随即与宣传团队来到Sony Music的香港总部办公室，卸下华丽闪烁的长裙，换上轻便的灰色V领T恤，戴上色彩斑烂的花花图案口罩，与记者交谈大约40分钟。
眼前的Karen一脸轻松，没有Diva的气场，单纯以普通女性的身份回答问题，譬如为何如此狠心要告别大舞台？她坦然作为专业表演者，舞台就是生命，决定要亲手划上休止符，需要冲破心理关口。“我系为呢样嘢（舞台演出）而活，每次企喺𠮶台度都会出尽全力，That's My Life、My Passion！所以有呢个决定都要好有勇气先做到，但我好清楚知道，其实做每件事都要见好就收，唔好已经过咗你最好嘅时候你仲未醒觉，喺度死做烂做，咁系冇意思。”
作为专业艺人要将最好一面呈现给观众，所以更需要有一种自我审视的能力，随着年纪递增，开骚不开骚，体力、心态，还有家庭，统统都要考虑，既然站在台上时要有最佳状态，谢幕时也要华丽而优雅，己所不欲，勿施于人，Karen笑言：“唔通唱到60几岁仲著住对鱼网丝袜喺个台度咩？所有嘢都有佢结束嘅时候。There is a time for everything！”
撰文：游大东
为庆祝入行25年而举行的《绝色莫文蔚世界巡回演唱会》，2018年6月23日在上海举行首场，入场人数超过2.8万人，打破虹口足球场女歌手开演唱会的观众人数纪录。之后莫文蔚带领这个演出团队，往返全球多个城市，包括澳门、台北、北京、新加坡、巴黎、伦敦、东京、悉尼，合共45场，兜转三年，今年终于回到Karen的演艺事业出发点 ── 香港，于6月11日至12日在红馆连开两场，既是《绝色》世界巡回的终点站，也是Karen告别大舞台之前的最后一次演出，而这个“华丽大结局”的英文名称是“The Ultimate Grand Slam Show”，以网球界述语“大满贯”（Grand Slam）呼应她凭《呼吸有害》（无线剧《飞虎之雷霆极战》主题曲）横扫香港乐坛颁奖礼的佳绩，是故近日在网络疯传的“潜力图”，亦即Karen演唱会的造型，身穿彷似网球服饰的白色手工缝制短裙，配以鱼网丝袜和高踭短靴，摆出抽击动作的甫士，呼应上述主题。
歌迷等偶像红馆开骚 一盼16年
对香港粉丝而言，这次演唱会可谓“等得太久”，原定2013年纪念入行20载的《莫后年代莫文蔚20周年巡回演唱会》，因为父亲莫天赐（Alan Morris）离世，而要将香港站取消，“所以对上一次（香港开骚）系2005年！”16年后重返红馆，Karen却说要向大舞台“说再见”，听到这个消息，作为多年的忠实拥趸，忍不住要抽一口凉气，但她强调这次“告别”不是“退出”。“我唔系要退休，亦永远都唔会退休，我实在太钟意幕前演出，只不过我对于自己嘅‘下半场’已有其他规划，所以好希望可以喺香港呢个‘出发地’，为我嘅‘上半场’划上完美句号。”Karen承认，早于2018年筹备这次巡回之前，已立定决心，视这次演出为“The Ultimate”（终极）。
是甚么原因令Karen如斯狠心？毕竟现时她已年届50，身体状态固然是重要考量，心境变化也是关键，“各样嘢都要谂，同埋时势啦，都要Consider，我觉得冇理由……唔通点呀？唱到60岁，仲著住对鱼网丝袜喺个台度咩？所有嘢都有佢嘅（结束）时候，There is a time for everything！你唔可以去到畀自己Over咗𠮶个位，所以喺最好嘅时候，你就要完，即系我知道我要喺我（状态）最好嘅时候，我就要Quit，跟住去做其他嘢。”意思是，人生不应只有事业，尤其是10年前她已成为德裔初恋男友Johannes的妻子，生命来到这个阶段，她直言想留多一点时间予家人，“屋企同埋老公都系我人生好重要嘅部份！”
“唔应该再行Tour呢个好旧嘅模式！”
去年世纪疫情爆发，Karen长时间与丈夫留在英国伦敦，原定3月在香港举行的演唱会亦要延期，眼见超恶病毒冲击全球，亦令她对于舞台演出有另一种新的体会。“每次我做Tour（《绝色》已是入行以来的第7次巡回演唱），都会觉得，咦？可唔可以有第二种方法同大家分享音乐呢？系咪一定要带住成班人、成队Crew，几十个人，每个礼拜系咁飞嚟飞去，啲器材系咁运来运去，之后搭个台，搞一晚骚，好正，好开心，然后拆，满地垃圾，好多嘢都要掉，You Know？而家我系Create好多Wasted，浪费紧好多资源，虽然系做咗一场好骚，但音乐应该可以唔系一定需要用咁嘅方式去Share，特别系而家经历过疫情之后，大家都好习惯Through Online去分享好多嘢，又有咁多VR技术，好多好先进嘅嘢，我哋其实可以做到，所以我唔系唔唱，只系要换一个方式去Present我嘅音乐，我觉得唔应该再系行Tour呢个好旧嘅模式，可能系Live Online去几十个国家，但系Reach到嘅人系仲多，我宁愿放多啲精力喺呢方面研究点样做。”
预告香港站会唱好多广东歌
过去巡回演唱40多场，Karen的歌单都是以献唱国语歌为主，但回到老家香港开骚，总不能不唱广东歌吧？她承认这个“终极歌单”会有点不同。“喺世界各地走咗40几场后，今次返嚟香港，好多之前冇机会唱嘅广东歌，都会摆入去今次呢个骚，所以Rundown会有好多调整，加咗好多广东歌。”她说，这些年来一直有粉丝向她点唱，所以今次在红馆的舞台上都会尽量“找数”。“譬如好多人咁多年都会问：喂，你几时返嚟香港开骚？我唔理呀，你到时一定要唱《太多太多》（收录于2010年推出的《宝贝》专辑）呀！仲有旧啲嘅《潮湿》（收录于1996年《全身莫文蔚》专辑）、《一朵金花》（2001）入面嘅《冬至》，呢啲都系热门点唱。”然后我以粉丝身份问，会唱《到了晚上》吗？“哗，呢首少人提，咦～咁样真系唱唔完㗎㖞，咁多歌！”
以《因一个人而流出一滴泪》答谢香港歌迷
每个红馆骚都有一首主题曲，今次Karen的《绝色》世界巡回亦然，是由Coey Young作曲、周耀辉填词、Karen与麦浚龙联合监制的广东歌《因一个人而流出一滴泪》，这是继《瑕疵》（2015，收录于专辑《Addendum》）的合唱后，她俩再次合作。“呢首歌又系佢自己无端端自己爆出嚟！”Karen笑谓，去年夏天，因为伦敦疫情严峻需要封城，每天只能够“宅”在家，“过紧二人世界，日日喺度煮饭焗面包，完全冇谂过搞唱片嘅事，突然收到Juno Text（发短讯）话有只歌叫我听下，佢话一听到Demo之后，就好似听到我把声喺度唱，觉得除咗我之外，谂唔到有边个适合唱，咁听完之后又觉得真系几正，就有啲心动。”
歌迷痴心一片 自觉好运
《因一个人而流出一滴泪》长约5分钟，旋律荡气回长，勾起Karen的想像，“呢首歌本身嘅磁场，系几系一首演唱会嘅歌，好Grand，好似要爆发你嘅Power，我觉得可以用一只咁嘅歌，好用力咁同观众讲声多谢，因为咁多年嚟，我成日都唔喺香港，理论上大家应该忘记我㗎啦，点会咁多年后仲会记住，仲好恨你返嚟？（同我讲）返香港开骚啦、快啲出广东歌！咁热血嘅？对你咁痴心一片嘅歌迷可以喺边度揾呢？好感动，I'm so lucky！”
恰巧这首歌都是以“痴心”为主题，让她想起《西游记大结局之仙履奇缘》（1995）其中一幕，当年她饰演的白晶晶，进入至尊宝（周星驰饰）的内心窥探，发现紫霞仙子早在至尊宝心里留下一滴泪，这滴泪印证一段刻骨铭心的爱情，“其实一滴眼泪，经已足够表达你𠮶种珍惜，我觉得呢滴眼泪系包含（对歌迷）所有嘅爱，我隔咗咁耐之后返嚟，歌迷仲依然等紧我，但我又唔觉得我会停留喺呢度，以后唔会走，我认为我嘅音乐会继续带我去唔知边度，我冇Plan，当我要离开（香港）嘅时候，我会留一滴眼泪，希望就算我唔喺大家身边，我都会记住大家，亦希望大家记住我。”