众故事│谢安琪与麦浚龙合作三年不再执着：粉丝话未见过我咁唱歌
谢安琪（Kay）2016年推出单曲《山林道》后，决定全面休养。之后麦浚龙（Juno）积极邀请加盟，并构思长达三年的《the album》音乐企划，最终Kay于2017年首肯加盟唱片公司幻国文化，提前复出。
在此之前，其实他们已在《罗生门》（2015）结缘，建立一定友情基础，所以展开《the album》音乐企划时，他们不需要花太多时间磨合。回望过去3年，Kay和Juno彼此渐见默契，亦令Kay本人在歌唱事业上有冲击：“以前唱歌，有心理压力，有啲真系先天条件，以前唱歌，演出之前好怕做好多访问，因为担心我把声唔好，但喺呢个Project里面我唔再执着。”
撰文：刘传谦
采访：游大东、刘传谦
摄影：叶志明、罗子扬
剪接：陈尚欣
谢安琪服装提供：Ports 1961
化妆：Kris Wong
发型：Sing Tam
众故事｜谢安琪认8分钟《合唱歌》宣传有难度：唔系特登做咁长！
合作模式渐变 先顺应后从心
Kay起初应邀加盟，工作上决定先顺从Juno意见，后来经过沟通深入了解对方及故事发展后，她明白自己在工作上不需要跟着别人步伐：“成个故事系佢构思，对于我休息之后嘅‘复出’，佢都有好多睇法，有好多嘅计划。复出好似系佢邀请我，将我带入嚟呢间公司，但系当行嘅时候其实系一齐行啰，中间就算有啲嘢要解决、处理，我哋都系倾。”
去到今天，Kay和Juno即使没有时时刻刻讲出口，亦已知道如何迁就对方。“好似录《合唱歌》，我去唱咗，佢听；佢听完又会配合我唱，我再听返佢配合我唱嘅版本系点样，我又有调节；我唱返，佢又听返……其实𠮶个过程大家都会好知对方会点做，或者做啲乜，然后互相配合。”二人合作频率高，难免意见不合，但Kay认为大家都希望把事情做好：“我哋都好顾及大家嘅感受，听对方想点样，然后喺中间揾方法。”能在音乐上合作无间，Kay亦直言相当难得。
放下声线执着：可能有日好攰咁唱《囍帖街》
透过参与《the album》音乐企划，Kay对于唱歌亦更有信心。她承认，以往演出时，心理压力很大，因为曾经多次爆肺非常担忧，另一方面又过份追求完美声线：“譬如我爆过肺咁多次，（以前）真系连跑步都跑唔到！”是故，她未加入“幻国”时，演出之前甚少接受访问：“如果唱歌前已经讲好多嘢，把声好攰，我会好惊一阵间嘅演出唔好。”
然而在这3年来的开窍期，Kay对唱歌有另一种体会，她以《我在阳台上看你》解释：“（呢首歌）表达呢个女人（浦铭心）嫁咗畀一个人（董折），日日望见佢喺楼下唔返屋企，总之喺楼下系咁食烟，都唔想返嚟屋企，（呢个状态）点会系好精神嘅声呢？其实唔同质感嘅声都有意思！”
Kay亦渐渐放下对声线的执著：“可能有啲人，都系会追求咁多年都要唱返同一种（声线），但年纪大咗，有时同一首歌你喺今日唱，就系（基于）你今日（声线）嘅质感，（将来）你唱返同一首歌，味道系会唔同咗。当年系好听，依家都系有另一种好听。”她现在更珍惜每一次状态不同而出现的演绎味道：“𠮶日嘅状态唔同，你𠮶日先会唱到𠮶种味道，咁唔系一定代表攰嘅声就系唔好听。可能就系有一日我好攰咁唱《囍帖街》系你未听过嘅，其实都可以好好听。”
香港市场节奏快 用三年制作《the album》“奢侈”
《the album》专辑内歌曲派台次序并不一定与碟内呈现的时序一样，往后乐迷或会因为某一首歌，而重新再看一次这段故事。不过在节奏急促的音乐市场下，完成长达三年的音乐计划，而且背后还有规模庞大的制作，由创作、录音、拍摄MV、撰写文案， 而所有歌曲互有关连，Kay认为相当“奢侈”：“一首歌里面就好似讲咗个大主题，下一首个就已经要讲第二啲嘢。所以你用3年时间去好仔细咁讲一个故事，唔系个个都有咁嘅耐性去追。”
对于浦铭心与董折的故事，歌迷一追便三年，但Kay仍然看好日后会有更多乐迷加入：“可能有啲人之后会因为某一只歌，又会追返呢个故事。”能在这个音乐计划参与其中，Kay亦觉得很有满足感：“其实呢件事好难做㗎，但系好值得做。”
而歌迷对自己近年来的评价，亦是Kay继续参与计划的动力：“好多歌迷会觉得‘我未见过你咁样唱歌’、‘我觉得原来你咁样唱歌好好睇同好好听’、‘我未听过你呢把声’、‘我直头未见过你呢种状态’，呢啲都系好难得。”