【容祖儿演唱会】古天乐首live《今期流行》　回忆当年结缘电视城

容祖儿《PRETTY CRAZY》红馆演唱会第11场继续精彩，昨晚的嘉宾请来古天乐，近来他密密现身演唱会，但今次一样有惊喜，抱病上场已经好有义气，更献唱多年来从未live过的经典歌《今期流行》，怪不得一出场便让全场歌迷“叫到拆天”，气氛high到最高点！

又来到每晚最精彩环节之一的嘉宾时间，Joey这样介绍：“今日到底系边个好呢？畀个贴士大家，话畀大家听，呢一位系男神嚟㗎，我相信全香港呢冇人唔钟意佢嘅！佢由细到大都好锡我㗎！”又同歌迷夹定：“阵间音乐一起，大家喺适当嘅时间一齐做一个动作。”便为歌迷示范跳起《今期流行》的“拜神舞”动作，同时为大家揭晓嘉宾身份——古天乐！全场歌迷立即陷入一片疯狂，“记住呀，佢一阵上嚟大家就要一齐做𠮶个动作啦！”随即，音乐奏起，古天乐便鬼马地从升降舞台中出现，和Joey一起合唱《今期流行》。

虽然合唱时有少甩辘，但完全无碍台上台下的火热气氛，歌毕后祖儿用国语大赞：“帅呆了！帅呆了！欢迎我第11场嘅特别嘉宾，古天乐先生！呢啲真系颠倒众生呀！”又看着古天乐打招呼：“Hello～你好吗？”其实在唱歌时，已能从古天乐的声音中听到病意，但他仍然回答：“我好好！我讲句说话畀大家听先，首先我今日系病紧㗎下！”然后便看着Joey说：“第二件事呢，《今期流行》好似从来未喺live唱过㗎下！”Joey便激动接话：“系呀！佢系一辈子都冇喺现场演绎过呢一首经典金曲㗎！真系好锡我呀你！”再挑皮一问：“你系唔系前世欠咗我㗎？”古天乐宠溺一笑，再笑笑回答：“应该系啦！”十足十哥哥对着顽皮的妹妹，却完全拿她没辙。

Joey再开心地问：“你记唔记得你好多年前做过我演唱会嘉宾？”“咦，你当我老人痴呆症㖞！”古天乐的回答让Joey再笑了，并继续道：“我唔系，但我惊你咩啫，贵人善忘呀嘛！”古天乐便自顾自回憾说：“你上一次嘅演唱会呢，我有同你影咗一张相。”Joey当然不放过百厌整蛊古天乐的机会，便立即说：“系呀，𠮶阵时你好白嘅。”说到自己也忍不住笑出来，续说：“但你依家都唔系好黑～”古天乐补充：“你𠮶阵时同你阿妈去电视台。”Joey也细说回忆：“你𠮶阵时仲喺电视台度拍紧剧嘅，咁我就鼠咗入电视城度，竟然畀我撞到你㖞！咁我梗系唔会放过呢个机会啦，就系呢一张相呀，就畀我沟掂咗你啦！”又笑着解释只是开玩笑，自己当然不敢。说罢，古天乐便立刻瞇眼看着Joey点头说：“但系唔知点解，我有啲谷鬼气，仲话叫我戴ear mon，我都话唔好戴啦，我听唔到现场啲声音！”让Joey立即大呼：“唔系嘛！唔通今日啲观众太热烈喇！”古天乐便说：“唔系呀，我想讲，唱多次《今期流行》呀！火滚呀真系！”Joey闻言便吓得目瞪口呆：“你真系好钟意唱歌㖞！”古天乐便问：“咩呀？惊overrun呀？你系咪都搞多咗一场㗎啦！”Joey没好气的回答：“我唔惊！我畀你唱埋落去都仲得！”音乐便再次响起，二人再一次合唱《今期流行》。

歌毕，看到古天乐上气不接下气，Joey便说：“抖一抖先啦，最受欢迎男歌手！”古天乐又突然回气说：“呀唔系第11场呀，咁我知道呢11场你又未同大家影过相嘅！”Joey便解释与歌迷保持距离只因为被传染，然后更大拍马屁：“向来我都知道古天乐又顺得人又对人好，虽然佢外表好似好恶，但内心就好善良嘅，但佢又史无前例咁抢我个台啲咪讲嘢，又抢埋啲观众上台！”古天乐当然不理她，自己倒数和歌迷玩游戏，便挑选了3个歌迷上台合照，让全场歌迷开心到不行，又苦口婆心的跟Joey说教：“我同你讲，接触下人，大家开心啲咪好啰！”又装作忘记还有一首合唱歌，对Joey说：“喂，你冇咩要求，咁我走㗎啦！”Joey立即拉住他的手说：“咪住呀，你哋唔想再听多佢唱多一首歌咩？你咁钟意唱歌，不如唱多一首啦！”在歌迷和Joey盛情难却的邀请下，他便留下再合唱《男朋友》才离开。