【容祖儿演唱会】与Dear Jane合唱约定再合作　Joey搏尽撞瘀耳仔

容祖儿《PRETTY CRAZY》红馆演唱会已进步到一大半，十场以来的嘉宾环节都好评如潮，叫歌迷对于接下来的嘉宾名单都期待不已，昨晚在Joey介绍嘉宾出场前，都忍不住先嘉许自己：“今次大家都觉得我好有品味，拣啲嘉宾呢又靓仔啦、又靓女啦、又唱得㖞！”才为歌迷介绍近年合作密切的Dear Jane出场，更以Jane式合唱了《不许你注定一人》和《习惯失恋》。

“朋友有好多种，有啲系一见如故，而Dear Jane同我就系一拍即合，第一次合作、由Howie帮我写嘅《心之科学》就有好好嘅成绩！”Joey更打趣问他：“你系唔系特登写畀我㗎先？”静默一秒后，Howie立即点头回答：“系呀！其实我系想写首女仔歌，咁我写首女仔歌即系自己唔唱得啦，咁畀女仔唱，边个唱最好？梗系畀Joey唱啦！”Joey听到后立即欢呼：“点解Dear Jane咁红咁识讲嘢！”阿Tim便笑着说：“你系第一个话我哋识讲嘢！”

后来，他们又分享过去合作趣事，当然少不了Joey请助手记下Dear Jane的开骚日期，主动请缨去做嘉宾，Joey更嫌弃阿Tim说得不清楚，亲自解说一次：“第一次《心之科学》演出在澳门，我就请咗你哋做我演唱会嘅嘉宾，咁我哋做band her（rehearsal），当时就收到风你哋3月16号做骚，跟住我就话，见佢哋好似含住泡嘢又唔讲㖞，我就自己话‘帮我3月16号mark个期啦，我要做佢哋嘉宾呀’。”Jackal便立刻解释：“因为我哋band房少女仔上嚟呀嘛，突然之间你咁样讲一讲，我哋都好紧张㗎嘛！”Joey回答：“你知唔知呢其实我都好少男仔朋友㗎，我身边嘅人全部都系阴气好重㗎！”Tim便邀请：“大家一齐玩啦！”Jackal也加入邀请：“不如唔好咁乱啦，即系有阵时就你做我哋嘉宾，依家又我哋做你嘉宾，不如我哋约定啦，嚟紧我哋再写多首歌好唔好？”Joey随即大声说好：“系咪真㗎！既然第一次呢个《心之科学》咁好成绩，不如我哋就开拓呢个教育系列呀！《心之科学》、《心之体育》…”就这样约定好下次合作！

全晚演出都十分顺利，原来Joey在日前演出时，不小心被人工智能mic stand反弹撞到耳仔，她也拍下受伤照片，于Instagram与歌迷讨拍：“支人工智能mic stand真系越跳越起劲，寻晚返到屋企发现只耳仔瘀咗，唔怪得知跳紧𠮶阵觉得有一下痛痛地啦，好彩唔系冚亲个咀咋，唔系就吓亲大家啦，继续一切顺利！”而好姊姊阿娇也立刻留言叫她要小心：“耳仔多灾多难，小心呀祖祖。”