【专访】一种米养百样人 乐队逆流《乱世。说》用五首歌讲一件事
相信大家看过上一篇专访后，对重型乐队逆流有了一定认识。尤其明白到主音杰佬从事殡仪、Bass手阿Ken从事兽医助护，对生死有另一番体会，才衍生出逆流带文学味道的歌词，谈及“缘起缘灭”，以“花开花落”的意象形容聚散等等。事隔三年，逆流推出第二张专辑《乱世。说》，到底这次向听众带出甚么讯息？摄影：陈顺祯
逆流将于本月27日举行《乱世。说》音乐会，继首张专辑《续世。说》后，推出第二张专辑《乱世。说》，主音杰佬如此形容新旧专辑：“《续世。说》系一个序章，包含一啲对社会嘅谂法，一啲生活哲学，以及对周遭事情嘅抒发；而《乱世。说》系描述紧，一个晚上发生咗一件事，有5种带有唔同想法嘅人，到底佢哋各自嘅状态系点呢？系描述紧一个状态，而唔系我睇到啲乜就写出嚟要你去跟。”
鼓手阿燊补充：“面对社会时事，或者搭车望到咁嘅景象，会觉得唔健康，其实唔止香港，甚至全世界都唔发生紧咩事。但最后你系咪要跟网络上言论，或者剪辑嘅片段去认知一样嘢，咁点解你唔亲身去理解呢件事？你可以以上嘅嘢当参考，但唔系最终嘅答案，你系要去揾答案。”
相关文章：
【专访】殡仪、兽医助护都玩Metal？ 乐队逆流睇透生死创作音乐
【小剧透】《乱世。说》的五种状态：
《六呎之下》
“形容 一个准备参与冲突嘅人，佢系预咗死，心入面系有一种佢认为嘅正义要去追随，佢唔会怕失去生命嘅谂法。‘未怕 埋葬六呎之下’”
《飞砂》
“虽然我哋身边有好多嘢都控制唔到，觉得好无力，但系咪真系改变唔到呢？的确世界潮流、趋势等等事情我哋控制唔到，但可以控制自己嘅心态，正面去解决问题。”
《留‧离‧破 》
“佢有一啲矛盾，佢想跟住前面嘅去冲嘅人。”
《皇》
“一个人好想揾到自己嘅乌托邦，好想成为自己嘅主宰。”
《毋忘我》
“社会中生活得好攰嘅人，到底点解会为咗生活唔见咗自己呢？提醒大家唔好唔见咗你自己。”同时亦系杰佬的写照。(详见上一篇报道)
新专辑《乱世。说》中，只有《毋忘我》一曲从未曝光，大家想听就要等到音乐会当日听Live，逆流各人异口同声说：“呢只歌好有惊喜，听完毛毛管戙！”杰佬话：“有人话个编曲好似《别．离》，但又不尽然系，《毋忘我》多一种更歇斯底里嘅状态，而且系逆流第一次喺歌曲加入澎湃嘅弦乐。”阿燊补充：“同埋有女声和音，而且𠮶位女Vocal录音时系大住肚，个BB同佢一齐Scream，个画面几温馨呀！”
大家睇完新碟简介打咗个底，到音乐会正式听Live时应该会更投入当中的情绪。除了歌曲用了新的叙事手法，新专辑录音过程亦有不少趣事，逆流笑言今次录音“俾人捽得好甘！”
今次《乱世。说》邀请了三位监制操刀，Adrian Chan、Wilson Chow及Kin@Insitinct of Sight，阿燊形容三位监制是“负责品尝试菜”，大家互相沟通炮制最好的成品。杰佬补充这次寻找监制跳出了自己的comfort zone，他表示：“我哋跳出自己嘅comfort zone，因为几位监制会系咁‘捽’我哋，尤其系错vocal𠮶阵！”他续说：“Wilson讲过一句‘你污糟啲啦把声，俾多啲气声我’，𠮶时我就谂‘咁我咪漏气啰，点唱呢？’而Adrian又会话‘你唔觉你咁唱好o靓仔咩？沙少少、厚啲啲’，但系我用唔惯𠮶个位发声会唔舒服，但系佢会话‘啱㗎喇！唱Live同录音系两单嘢，你唱Live咁录音咪唔detail啰！’后尾谂番，好似又有啲道理㖞！”
虽然俾监制“系咁捽”，但逆流感激有他们的鞭策才令新专辑更成熟，阿燊话：“最紧要佢哋当我哋系friend，佢哋真系respect我哋嘅作品！佢哋大可以一句‘几好吖’就行开，同埋商业角度去讲，我哋俾到几多钱啫，真系好多谢佢哋！”
阿燊又话：“每次录完音最重要系𠮶餐宵夜，佢哋会讲笑话‘你次次交啲demo都咁复杂，你打鼓好叻咩？’你谂下如果佢哋同你唔friend会咁同你讲咩？真系好开心大家friend到合作到，可以有倾有讲做好件事。”
能够同监制做到friend的确唔容易，最估唔到系监制们会唔瞓陪你癫，阿燊话：“我哋都会捽Mixing个期，有一次佢哋凌晨两点几交第一个mix，我觉得争啲；之后4点几再俾一个，我都系觉得个snare争啲，6点几佢再俾！哗真系不得了！虽然我都系觉得争啲，不过会同讲‘你瞓先啦！’好开心佢哋会咁做，因为大家都想个成品快啲俾到大家听。”
睇完逆流讲新碟录音过程，相知大家终于明所有音乐人都会话唱片系心血结晶，更加明白每一张实体碟都别具意义。不过Band Sound现场演出都好重要，睇完Live再听碟回味先至够完整。不论你钟意咩类型音乐都好，希望大家都会入场亲身支持啦！