【叱咤】靠大家集气上红馆 Supper Moment：好似悟空出元气弹咁
昨晚叱咤颁奖礼惊喜一浪接一浪，单单是开幕表演Supper Moment X 触执毛 X谢霆锋这个阵容已经够屈机，仲要见到霆锋再次攞起结他弹《活着ViVa》，“单线Solo”再现舞台，真系回忆返晒嚟！无论现场观众或是睇电视直播的乐迷，同样隔住个mon都感受到𠮶份热血！
乐队Supper Moment连扫3奖大丰收，不单再次夺得“组合金奖”，并且3度蝉联“我最喜爱的组合”金奖，成绩相当令人鼓舞，再次印证乐队音乐是“文化”，而非“潮流”，夹Band都有出头的一天。
在庆功宴接受访问时，Supper Moment一讲起与谢霆锋夹《活着VIVA》，顿时化身小fans一样非常雀跃，而且结他手阿鸡为“单线Solo”平反：“唔好再话单线Solo易弹，你要弹得准系超级难！”
阿达又话：“外国咪有千人夹《Smell Like Teen Spirit》嘅，我谂我哋呢个case《活着VIVA》呢首就系香港嘅《Smell Like Teen Spirit》！”
Sunny：“头先喺台上面真系好激动！点会谂到谢霆锋就系喺你隔篱，同你‘1、2、3’一齐起歌弹𠮶段guitar riff！就好似《国产零零漆》𠮶套戏讲‘苦练十几年嘅轻功水上飘，终于可以大派用场喇！’哈哈！”
如果眼利的乐迷都会留意到，阿鸡与Mike都放下PRS及Gibson，换上Ibanez结他，与当年谢霆锋所拿的结他同一个牌子，原来是他们刻意安排用来记念《活着VIVA》呢首歌，阿鸡话：“我同阿Mike（触执毛结他手）都夹好咗，记念番当年认识Ibanez结他就系因为谢霆锋！”
阿鸡更重申，唔好睇少“单线Solo”一啲都唔易弹：“我想重申一样嘢！个单线Solo一啲都唔容易！你要弹得准140 bpm嘅16分（音符），兼且空弦同揿落去都要准系超级难！所以唔好再话呢个Solo易，一啲都唔易！”Sunny补充：“同埋呢个Solo真系编得好精彩，大家讲到依家都仲记得真系好劲！”
相信眼利嘅乐迷都留意到，阿鸡同Mike特登用Ibanez结他衬番《活着VIVA》。(黄国立摄)
另外，Supper Moment得奖时提到希望能够进军红馆，那现在进程如何？Sunny话：“都系申请紧，有好多嘢都未落实，因为头先喺现场见到大家嘅能量好大，所以希望借大家嘅能量帮我哋集气，希望可以成功争取到呢个场地去做！”阿鸡笑言：“好似悟空出元气弹咁，要大家帮手集一集气！哈哈！”
今年何谓香港乐队重要的一年，大众对乐队愈来愈重视，那他们会否觉得颁奖应该分设“乐队”与“组合”奖项？Sunny话：“呢个唔只系乐队同组合，其实可以谂埋分类型，我自己队乐队铁树兰都有出席颁奖礼，系玩重型音乐嘅，希望慢慢推演落去可以分埋类型嘅话，咁就系一个完整同埋健康嘅生态！”
最后提到他们的“兄弟Band”ToNick今年同样大丰收，Supper Moment亦同样很感动：“因为我哋一齐经历紧呢样嘢，由几个人嘅演出，到50、100、1000人，甚至今日一齐攞奖，系一个好大嘅推进！希望我哋引起嘅少少火花，可以令其他夹Band嘅人可以继续行落去！”