卢巧音演唱会惊喜浪接浪　郑秀文撑场：有咩用得着我嘅就用啦！

卢巧音昨晚于旺角麦花臣场馆举行《RE:TURN Candy Lo Concert 2017》尾场，已经9年没有在香港开骚的Candy发挥超水准，而且《三角志》、《深蓝》、《垃圾》、《落地开花》、《天下》等等无论主打或Side Track作品都唱齐，一次过满足晒乐迷愿望。演唱会还邀请到Sammi郑秀文作嘉宾，大唱《喜欢恋爱》及《不要惊动爱情》，为乐迷送上惊喜提早庆祝圣诞。

见到Candy玩得咁放，相信各位乐迷都好开心！(江智骞摄)

卢巧音与郑秀文以一红一黑造型登场，先合唱《喜欢恋爱》，两位靓声不用多介绍，加上台风稳阵，一开口便抓住乐迷耳朵，只专注狂歌声之中，无暇举机拍摄。唱完《喜欢恋爱》后二人拥抱，Sammi兴奋大叫：“应该要俾啲掌声卢巧音系咪呀！”随即掌声欢呼声四起。

Sammi又话：“其中好有意思就系，知道你过去两年都有啲经历，有啲状况。呢啲状况我都曾经经历过，睇完你嘅访问我都有好大感触！嚟到今日见到你健健康康，行返上个台我自己都好开心！好感动！有咁多fans支持你掂㗎喇！”Sammi又讲笑话：“其实我唔介意做嘉宾，我觉得其他歌手有咩用得着我嘅地方就用啦！我系好开心㗎！”然后唱出《不要惊动爱情》令全场再次欢呼声连连。

Sammi惊喜现身，唱出《喜欢恋爱》及《不要惊动爱情》。(江智骞摄)

Candy在演唱会拿起结他翻唱了Nirvana的《All Apologises》和Lady GaGa的《Million Reasons》，一支木结他加一把人声亦足够压台，尤其以抒情的方法演绎《All Apologises》能令观众静下来，专心思考歌词的讯息。

近年爱上跑步的Candy在台上分享她的改变，她感触话：“人系需要打破自己纪录，我都43岁喇，依家唔做嘅话，我惊到盖棺𠮶日......会后悔。”乐迷闻言立刻“啋！”、“长命百岁呀！”Candy豁达回应话：“人总有一日会死㗎啦。”分享过自己的心声后，Candy唱出《天下》、《纪念品》、《烦》及《800伴》为演唱会划上句号，她又话：“我朋友＿点只800个呀！”感激各位乐迷支持。

完骚后Candy接受访问，被问到今次演唱会后是否代表将全面复工？她表示：“其实之前都冇话停过工嘅，只系之前做幕后嘅嘢比较多，做完个骚觉得信心返番嚟，所以可以继续做关于音乐嘅嘢！”那选择年尾这个档期是否有特别意义？她说：“真系咁啱啫，原来个骚系下年先搞，咁啱有啲投资者同埋有期，就问我同阿叔（何兆基）；之后我哋都觉得ready所以就试下啦！”

另外，今次演唱会的乐手都是Band友，如秋红的结他手阿曦与Andrew，Cassette的主音Aeolus担任和音，这个阵容是否份外有亲切感？Candy表示： “其实系㗎！因为今次队band个个都识嘅，尤其band leader小明识咗好多年，又系我老公（Sammy）嘅老死，变咗沟通会方便啲，唔使就住就住惊对方会嬲。”

Candy选择翻唱《All Apologies》及《Million Reasons》是否代表着自己的心声？她表示：“其实系因为自己好钟意呢两首歌，同埋想将《All Apologies》送俾Kurt Cobain，虽然佢走咗喇，但都希望佢喺上面听到。而且呢两首歌都代表到城市人嘅心声，情绪病唔只系我哋呢行先有，其实我听身边好多人都有，都好紧张，所以希望大家会俾多啲爱心，唔好吝啬一个拥抱。”