【农夫贴地团．有片】重游188同你讲玩　老板最钟意首“芒亨歌”

农夫贴地团嚟到第二集，上集讲食，今集就同大家讲玩。农夫二人最爱的玩意叫打机，仲要系揾平机打。好似当年会流连湾仔的街机舖“机城”，2蚊一铺“拳王”可以玩大半日。又因为经常买Game，买到同188的机舖老板高佬做埋朋友。所以农夫就亲自带路，同大家回忆下个人打机史。摄影︰黄国立

打机就是生活一部分

拍摄当日可以用夜访188来形容，因为已近9点，高佬话呢个钟数较少人，先倾到偈。几位认识了有10年，由买实体碟到后来Online过数WhatsApp个Code，见都唔使见。同高佬倾得埋，因为佢为人老实。C君说︰“佢好有良心，会讲你知边只Game热炒中，劝你迟啲先买唔好食炒价。”陆永说︰“因为佢系唔会见识得你就唔用炒价卖俾你。”

农夫跟高佬混熟时，有经历过《Final Fantasy》的热玩期，C君觉得呢只Game好抵玩，花你几百元就玩足大半年，除番匀都悭唔少。除了屋企打，两位又会去机舖揾平机打。C君说︰“以前有间叫‘机城’的舖头，2蚊就玩到铺《拳王》，技术好的话可以玩到好耐。”

网民自制“芒亨歌”《猎人之歌》MV

相关文章

【农夫贴地团．有片】试过一日食一餐︰宁愿悭啲使都唔想父母担心

【农夫贴地团．有片】乐迷效法歌词辞职追梦　陆永︰唔使照做嘛！

“芒亨”救婚姻

打机可以好纯粹地是一个玩意，但两个机迷加一个Game佬，走埋一齐竟然悟出一套关乎感情世界和亲子交流的理论。陆永说︰“之前我哋个化妆师，老公有打芒亨（Monster Hunter），好怪个老婆唔陪佢打，于是我哋尝试诱导佢，结果个老婆真系上瘾，佢老公知道后不知几开心，简直系‘芒亨救婚姻’。”当时的“芒亨热”更加系旋风式入侵C君的生活，甚至创作了一首简称“芒亨歌”的《猎人之歌》。高佬说︰“我少听佢哋，唯独最记得系首芒亨歌！”可惜叫老板献唱两句又唔制。

其实两位近年都少咗买Game，高佬都明白，尤其做了爸爸的陆永，一定忙好多，但佢又大胆预言，在不久将来，陆永一定会返来再帮衬！高佬说︰“迟一点吧，迟一点你就要改为陪小朋友打机，转玩一些儿童游戏如︰《孖宝兄弟》，到时又就会由这里重新开始。”相信这是一个成长循环，到时陆永两个女大个，可能会自己去揾高佬买Game都似。