【农夫贴地团．有片】试过一日食一餐︰宁愿悭啲使都唔想父母担心
嚟紧星期四，就系农夫开Show，歌手们开Show通常都会改返个富理想又优雅的演唱会名，咩“beautiful life”、咩“Classic Moment”之类，即使最终目标都系想赚钱，都好少讲到咁明。不过农夫就老实得多，今次个唱开宗明义叫《等钱洗世界巡回演唱会》，最终有冇巡回就唔知，但“等钱洗”就坚到冇朋友。“01娱乐”会一连3集，同两位倾下旧史，睇下到底有几等钱使？第1集先同你讲饮讲食，回想最穷时，可以食到几平几尽？摄影︰黄国立
著19蚊Tee出Show
近年农夫的确大红，不单止有剧拍，连港姐大骚司仪都有主持过，人气急升收入大增，所以演唱会定名为“等钱洗”都系得个噱头啦，而家唔等啦。不过要两位讲返初入行挨世界的日子，原来都几多辛酸，虽然今日听返你得啖笑，但都笑中有泪。
C君说︰“而家筹备演唱会谂下著咩衫，以前农夫出Show边有衫？都是在出口店买件白Tee，印象中19蚊就有交易。然后买支粗的箱头笔，画个公仔就话系农夫队Tee。”两件衫夹埋都系38蚊，加埋支Marker，50蚊有找，而当时二人画上身的就是只熊猫。“好似在疴尿定点，至于点解要用Marker？贪佢就算唱到流晒汗都唔甩色嘛！”
相关文章
【农夫贴地团．有片】重游188同你讲玩 老板最钟意首“芒亨歌”【农夫贴地团．有片】乐迷效法歌词辞职追梦 陆永︰唔使照做嘛！
“人哋庆功包场食火锅，我哋系食一哥火锅！”
歌曲《456 Wing》有这样一句︰“我Rap到户口跌到双位数”，问返陆永有冇咁夸，原来系真，而且两个人穷到要从食去入手悭钱。C君说︰“食方面我们好讲究，好讲究地点样唔食。”两位甚至劲过霍金，超越《时间简史》的概念，用时间去医肚饿。陆永说︰“只要晏少少起身，再晏少少才食第一餐，就可以食到一个早餐连晏画连下午茶再带少少早晚饭的一餐。食完都6点几，朋友7点叫食饭你真系食唔落。”
今时今日悭餐饭是为了买乜买物或者去旅行，但两位强调当时不是要悭，而系手头得咁多，你想用多都冇。C君说︰“最常帮衬系当年7仔推出个XX茶楼的10蚊蒸饭，豉油仲要任你拎，我拎到好似要饮一样。”去到需要食好一点的时候，例如首次出Show后庆功，经理人DJ Tommy就带两位食好啲，食一哥火锅。“人哋庆功包场食火锅，我哋系食一哥火锅！我们仲要排队的，好正。”
讲到拎综援咁，因为当时真系冇乜收入，更加唔想要家人接济。C君说︰“我们不是穷到冇饭开，只不过走去做音乐，已经令家人好担心，连家用都俾唔到，就无谓再问家人拎钱用啦，否则只会令他们更加担心你，更加唔想你玩音乐。”今时今日生活有改善，唔使餐揾餐餐清，但两位都好珍惜这种坚贴地的锻炼。陆永说︰“这种训练，令我们想点样抽，都离不到地呀！”
《农夫等钱洗世界巡回演唱会》日期︰2017年11月9日 - 14日 （共6场）票价︰HK$580 / $480场地︰旺角麦花臣场馆