【专访】收林敏骢歌词险中招　何超仪：佢第二句就写粗口畀我！

何超仪这名字，早在90年代的演艺圈已是响当当，不论在电影界还是音乐圈，她也是一位奇葩。奇葩，是因为她从不随波逐流，没有因身处的圈子而变得圆滑，相反，一个艺术家多多少少也是需要一些棱角。1996年，四大天王横行，广东歌仿佛只有情歌的年代，何超仪的《何家淑女》却在玩迷幻，当然就如预期中没有大热，但也找到其定位及听众。再到2013年开始，何超组成Josie & the Uni Boys，走向更Hard Rock一点的道路。早前推出《何飘移》，在何超自己口中，她形容为是“精神分裂啲、黐线啲”的作品。摄影：黄国立

到底《何飘移》有多“黐线”？何超表示由班底开始，已经是一个“黐线”的故事：“拍《全力扣杀》嘅时候识咗大师林敏骢，但我又好挂住Wyman，两个都系才子。于是我就同Wyman讲大师应承咗我填词，点知Wyman反而同返我讲‘不如两个一齐填啦！佢未试过咁样Crossover，几得㖞！’咁我谂住呢两位大师一齐合作都够黐线啦，点知Wyman仲畀返意见我‘其实我都觉得你几变态，除咗做演员，又要做行政、推广、拓展市场，你会唔会觉得你个人有啲精神分裂呢？’跟住佢哋就谂咗一个有极端精神分裂嘅女仔出嚟，写咗呢首《何飘移》畀我。”

听着何超的解释，可能大家会发现歌中描述的女生，多多少少也有她的影子在其中：“一个人格就系有钱、把口唔收嘅八婆，不过佢个心就好软。而另一个呢，就系一个好内敛嘅女仔，神经质到踢到旧石都会向自己问一千个问题。而佢哋都系失败在爱情手上。歌词入面有一句我好深刻嘅，因为两位大师填词嘅时候就一人一段，林敏骢填第一段，第二句佢就写咗句粗口畀我。”原来歌曲中的一句“心肺　齐凝固似蚝”有着相当深奥的隐喻在当中，何超解释：“我收到份词嘅时候都唔知头唔知路，好彩录音之前Wyman叫我问一问。大师就话‘即系你受情伤，心肺自然绞作一团，好似女性嘅生殖器官咁，个蚝字就系解做阴部啦！’幸好我问一问，否则唱了也不知什么一回事。大师邀请我去佢个人作品展唱呢首歌嘅时候，仲叫我将歌词入面一句‘枯萎的根部’改做‘枯萎的X毛’，佢话‘我原来心入面系谂住咁填，不过惊你顶唔顺我先改做枯萎的根部。’，如果佢原本真系咁填落去，我作为一个女仔都觉得有啲难唱出口。”话虽如此，但何超亦对今次两位大师的合作相当满意：“两位大师级嘅人帮你写词，呢份词要我等4年都等。”

何超一边把歌曲的故事娓娓道来，享受着音乐人的幻想空间，另一边亦不忘自己在商业上的身份：“跳返去老板嘅身份，我又要好理性话畀人听只歌要点宣传，当然我真正向往就系演戏唱歌啦。不过现实讲我哋做呢类独立制作，就系唔想畀人局限只可以进军某一啲地区。打个比喻可能我喺马来西亚识咗个朋友，佢叫我哋去唱，咁分分钟我哋就可能会打入𠮶边个市场。就算我系香港人，好想Promote自己嘅嘢畀香港，但香港唔受嘅话，咁我都要谂办法，因为我队Band都要揾食。所以好老实讲，地球任何一个地方邀请我哋去出骚，我都一定会飞去。”说到这里，何超也不自觉地商家上身，大谈生意经：“而家全亚洲嘅新兴市场，第一个一定系泰国，跟住系新加坡，而呢个地方其实一早就追过咗香港。点解呢？因为新加坡、马来西亚、印尼、菲律宾、越南，全部已经接轨，去到呢啲地方，只要你识唱英文，就可以打入市场。就算唱广东话，除咗香港，去到马来西亚都一样有得表演，咁点解我哋个眼光净系识得望住中港台？”

流行音乐即使如何理念崇高也好，总不得不考虑商业因素，今次何超出碟只出黑胶，原来是见过鬼怕黑：“我上一张碟《摇滚妹子》其实有出CD，亦有出黑胶。结果反应系黑胶卖断市要补货，嗱我讲明唔系我去做个市，我自己都只系得20张，所以个反应唔错。但系CD就大把货，卖唔到，所以我哋得返嚟嘅教训就系唔好出CD啦，反正啲人都系Download，就算系Fans都系上网买数位版。所以黑胶就系留畀真系喜欢我哋嘅Fans，而佢哋系有心去收藏我哋啲碟嘅，所以我哋尽量将只黑胶碟做到最靓，做7吋碟，录完攞去日本畀一间专帮Metallica做Mastering嘅公司去做，等啲真系储碟嘅Fans会觉得物有所值。”