红馆骚重现《美少女战士》?　周慧敏好重视：用好特别嘅形式再现

“玉女掌门人”周慧敏入行30周年，早前宣布将于2018年1月26及27日于红馆举行《一万天荒爱未老　周慧敏30周年演唱会》。自2011年的25周年演唱会后，周慧敏已事隔6年没开演唱会，所以26、27号的场次开售不久已被全数秒杀。有见反应热烈，今日下午周慧敏举行演唱会记招，正式宣布在1月28日加开一场，并于9月26日开售。

演唱会记招上，Vivian以一身白色连身裙现身。她表示今次的演唱会班底动用了不少友情牌，所以有一系列的行内朋友要多谢。首先是曾经一起合唱《爱得太迟》的古巨基，因为基仔今次为演唱会担任总监，Vivian笑说：“成个演唱会佢咩都要睇晒，好大责任。所以我都要出动我嘅经理人，古太去帮手。我唔知佢哋两公婆点倾，不过好开心最后可以成事。因为基仔由拣歌、编曲、服装、舞台效果都要比意见。点解会揾佢去帮手呢？其实我从来都觉得佢系一个好creative嘅人嚟，要求亦非常高，最重要系佢了解我，如果啲嘢过到佢𠮶关，我就好放心。”

最近Vivian频频亮相TVB节目《流行经典50年》，但迟迟也未与汤宝如、王馨平合唱《美少女战士》，不少网民也相当期待她们三人有合体的一日。一再追问下，Vivian终于回应：“其实我早于个节目未出现之前，大概6月嘅时候我已经邀请咗Linda同Karen两位做我今次呢个演唱会嘅嘉宾，而佢哋都好爽快答应咗我。我觉得《美少女战士》系一个经典嚟嘅，我唔想随便做咗佢，而系希望我团队可以花啲时间，用一个特别嘅形式重现喺舞台上面。”至于问到以前《美少女战士》那条裙是否亦会重现，她笑说：“大家唔好谂呢啲过咗去嘅嘢啦，今次我希望系一个升级版，可以再Cool啲、型啲。不过就要等基仔谂吓啦！”

Vivian的首本名曲《天荒爱未老》大家也应该不会陌生，而今次演唱会主题《一万天荒爱未老》可能令不少乐迷摸不著头脑，但她表示原来这个演唱会名称也是有段故的：“呢个名系俞琤(商台前副主席)帮我改嘅，有一次我同佢讲开我会开一个30周年演唱会，不过未有名。佢突然好快就改咗《一万天荒爱未老》，我当时都唔识反应，因为我都唔知咩嚟。原来谂真啲，一万天，即系三十年，我就觉得好浪漫好感动，返去同啲团队讲，个个都好钟意，所以就用咗呢个名。”

至于演唱会的poster方面，原来是由林海峰操刀，Vivian分享了难忘的经历：“我从未有机会试吓，咩都唔知、无得准备嘅情况下就去到Studio。呢个信任只系林海峰先比到我，𠮶日我去到Studio都仲未知会点影，不过我同阿Jan同一代人，我一向睇佢嘅作品都好有品质保证。”看见Poster中，Vivian头戴婚纱头饰，手穿盖掩指环，她表示很喜欢这个概念：“我谂有一种‘那些年’嘅情怀啦，𠮶种幸福系嚟自心中富有。”她更大爆原来林海峰相当喜欢《大时代》，甚至把剧集翻看了十几次：“佢𠮶日影影吓相同我讲‘悭妹，你咪当方展博约你去街啰。’原来又真系几有悭妹嘅感觉。”