E-kids找数送iPhone　fans锡锡10秒攞到奖玩咁大？

有“MK Pop始祖”之称的组合E-kids上月推出新歌《一二三四》，歌曲节拍强劲但歌词唔啱音而且MV拍到天旋地转，观众小啲忍耐力都好难一次睇晒，不过当时Tommy接受访问时表示：“睇得晒当你赢！因为我哋3个成14年冇一齐拍MV，想挑战观众听歌嘅底线，而且有‘官能刺激’。”事隔14年E-kids三子再聚头出新歌重新出发，为咗隆重其事仲举办“睇MV送iPhone”活动，当时仲实牙实齿话会找数，话咁快就嚟到“找数日”喇！

日前E-kids facebook专页贴出礼物相，写道：“讲过就系～恭喜晒所有得奖者”，不过成员阿Tim就冇现身，换咗另一位“阿添”客串，所以“送出湿吻30秒”今日就唔成事，真系戥得奖者“可惜”喇。Tommy问到三位得奖者创作咩对联先赢到奖品，估唔到答案分别系“一二三四，充满惊喜”、“一二三四，一飞冲天”同“一二三四，型爆到死”，Tommy同Alan听到答案都忍唔住话：“哗！咁流㗎！咁就有呀？有冇搞错呀！”

话虽如此，重点当然系放喺送大礼上面，Tommy就话今次系“送旧迎新送iPhone”。Tommy同Alan又点会咁易放过啲fans呢，两位中咗iPhone7 plus嘅朋友要锡锡10秒先可以攞到iPhone，令到气氛即时变得好刺激，两位女fans神情尴尬，扰攘咗一段时间先肯锡锡。

不过最后喺Tommy同Alan软硬兼施之下终于氹到两位锡锡，本身讲到明hold住10秒，最后都要分开3次锡。明白嘅，镜头面前锡锡系会怕丑嘅。Tommy同Alan又宣布继《一二三四》之后会出第二首歌，叫大家“咪谂”，唔知系咩玩法呢？又讲笑话2月个骚叫做“Spider Man”，食字玩“失败的Man”演唱会。

大家如果觉得自己冇份攞iPhone有啲嬲猪，唔紧要，睇番个MV开心下。