自资搞活动唔靠客户　狄易达：唔想下下都咁被动

狄易达自从开办跳舞学校、创立室内设计配对平台后，达仔的“跳舞歌手”身份在大众心目中越飘越远，取而代之，“老板”的身份现在似乎更贴近达仔。不过在他自己的心目中，他仍是当天那位热爱舞蹈的小伙子，只是除了舞台上自己的表演部份外，他现在能参与及掌握的事情比以前更多。摄影：杨晴

最近达仔自资筹办活动，8月26、27一连两日在中环海滨活动空间举行《赏想放空市集》，更邀请行内好友到场演出，他表示这个概念是回复自由身后的构思：“当我变返自由身嘅时候，我第一样嘢系同自己讲，唔想咁快做自己嘅歌曲住。因为咁样不停做落去，我只会依然系𠮶个我，都系做紧同样嘅嘢，每个月接几个跳舞骚、唱歌骚、拍节目，唔会有咩变化。所以当时我就去咗法国、荷兰揾当地嘅朋友带我去佢哋练习跳舞嘅地方，感受吓唔同地方嘅表演方式。过咗呢半年之后，我谂咗一啲关于自己表演风格嘅事情，所以就想喺呢个前提下再次做公开表演。”

其实每年达仔的跳舞学校也会有机会给学生进行汇演，今次一连两日的表演正是每年一度的汇演放大版，达仔更邀请了圈中好友如陈慧敏、刘威煌、火鸡姐可欣等参与演出。虽然有心，不过纵是天王黎明也试过在同一场地开骚，更因不合条例而“挞Q”需要取消演出，到底达仔有否作好准备，了解开骚的条文？他谓：“其实我哋系完全唔会明佢系点处理，例如我哋唔会明点样先为之‘唔得’。好坦白讲，同呢类型嘅场地做嘢，其实佢最想你乜都唔好搞，最好个骚揾人上去唱，唱完两只歌就走。不过我哋最后都花咗好多时间去同相关部门沟通，知道有咩做得，有咩唔做得。”

深信大家最想知道，在这类型的场地进行表演到底有什么规距要跟，达仔表示：“其实有好多零零碎碎嘅事情我哋都唔会估到原来系唔得，例如我想有幅LED墙升上去，最后我哋系好难做到，唔系话唔得，系钱嘅问题。因为原来幅LED Wall一过咗三米，佢又要另外批一个牌比你，搭多个台可能又要倾点样过到佢嘅批核。”话虽如此，达仔仍是对当局非常感激：“始终佢哋都帮咗我哋好多，提供一个咁好嘅场地，非常低成本，佢哋又好乐意协助我哋去做一个尽量完美嘅骚，我觉得当然都系跟返政府规距啦。”

回到香港落手筹备再次表演，达仔便发现一个问题：“以往歌手做表演其实也是处于一个被动角色，因为每每也要依靠电台、媒体搞骚，我们才有表演机会。而当然这些表演大多也要因应客人要求而订，歌手没太多自主权，甚至演出当日你才发现，上到台上可能唱两首歌，Say个Hi就要Say Bye走人。但作为表演者有时候上到台见到一啲好好嘅设备同制作，啲台灯声好靓，最后原来根本冇咁多时间比你表演，十分钟就走人，我会觉得好可惜。所以我就希望可以自己做到一啲好嘅表演出嚟，唔洗下下靠人哋搞骚先有机会表演，最后我就决定自己去试下创造呢啲机会。”

访问当日，达仔一身黑衫黑裤戴帽现身，脸上还留有浓密的胡须，感觉相当不羁。这样一个造型放在一向“青靓白净”的达仔身上，似乎让人不太习惯，难道是尝试新造型？怎料达仔却回复了一个“成功人士”Feel的答案：“其实我留须冇咩特别意思，只系太忙冇打理。有时我会觉得剪头发、剃须、衬衫系几烦嘅一件事，可能人大个咗，每日起身要顾虑自己架车有冇整好，有冇买到咩衫，要Set咩头，都好阻碍到自己做嘢。作为一个歌手，可能我而家要好好去选取咩时候做咩嘢，所以我分配咗呢段时间好好去谂下点样做好个表演，到真正同大家见面嘅时候我又会执返好个形象。”这样一个Steve Jobs式的回答，似乎达仔距离一位成功老板又迈进一大步。