【专访】十年是非无损唱歌梦　江若琳：咁多年我都无咩赚过钱

歌手江若琳（Elanne），自2014年开始，因与前经理人公司有合约纠纷而对簿公堂，至今案件仍未解决，更透露每个月要努力赚6位数才能够解决律师费。江若琳不经不觉已经入行十年，由她成为新人开始，虽然曝光率高，但是非不断，到现在更卷入官司之中，虽然十年发生种种经历，但全因她有倔强的性格令她永不言弃：“我唔想向不公平，不公义低头！”摄影：黄国立服装：Wardrobe_MARYLING / BORA AKSU场地：Candies Foodies

2007年出道的江若琳，可以说是比同期的新人走得较快，除了可以出唱片，又为多部电影担正，更被封为“新一代少男杀手”，以初出道的歌手来说，曝光机会多的是，但后来却因为与前经理人公司有合约纠纷影响工作，问到她有感觉得起步快，却跑得比其他人慢，因为“黄金时间”都花在打官司上，对此她似乎很豁达：“我觉得时也命也，如果上天要我呢十年经历咁多嘢，我觉得无问题，我个人好知足，我唔觉得行慢咗。我见到我同期嘅朋友成功，我都好替佢哋开心。我系一个唔会同人比较嘅人，如果我日日都谂点样大红大紫，我会令到自己好辛苦。掉番转谂我反而会多谢我过去十年有呢啲经历，因为有过呢啲经历，令我识得享受现在，令我依家睇嘢睇得好轻，只要我有得继续唱歌演戏，我就已经好满足。”

Elanne在出道时被封为“新一代少男杀手”，标志的“大眼”依然电力十足！唔信？睇相啦！

每次见到江若琳在娱乐版出现，都是一些是是非非，到现在更卷入官司之中，话虽如此，但她依然“超硬正”：“我承认我每一次遇到嘅事都好大起大落，一系唔跌，一跌就跌入谷底，甚至啲新闻或者网民嘅舆论都系好负面。我认我系有一刻谂过放弃，好似前几年被人屈，甚至系近年有官司纠纷都好，我好多谢自己有一份好倔强嘅性格，我觉得呢个世界唔应该系咁，我唔想向不公平，不公义低头，如果就咁就放弃，就等于向恶势力低头，所以我觉得如果我仲有力气嘅话我会继续去抗争。”

（对于种种指控有无唔甘心？）

“又唔系唔甘心嘅，只不过呢啲事件直接影响我个人声誉仲有我嘅人格，所以我先有咁大反应，如果我单纯为钱，我一早放弃做歌手啦，反正做咗咁多年我都无咩赚过钱，而打官司又要洗咁多钱，不过我觉得依家系幸福嘅，因为虽然有官司在身，但我依然可以合法地去实验我嘅梦想。”江若琳笑言。

提到江若琳最近推出的新歌《我只不过是我》，歌词提到她如何在各种勉励自己走过每一个难关，Elanne坦言这首歌就是真正的“江若琳”: “呢首歌系嚟紧音乐会嘅主题曲，亦系我过去入行咁多年最钟意嘅一首歌，因为真系好代表到我自己，亦系我过去十年嘅一个纪录。今次系由一班麻甩佬帮我制作呢首歌。呢首歌嘅制作班底都系由萧润邦（男友Oscar）揾番嚟，作曲由乐队MR嘅Dash仲有音乐人Jerald，而填词人我当时就紧系想揾啲好劲嘅大师啦，因为呢首歌真系好重要，点知我身边𠮶条友（Oscar）就突然发声话‘其实填呢首歌嘅人一定要系了解你内心世界嘅人啰’，跟住佢就话‘其实我咪识得填词啰’，跟住我就谂，可能真系无一个好似佢咁了解我嘅人，于是我就叫佢帮我写，当然细so（苏耀宗）都有帮手，所以就有呢首歌。大家可以留意下歌词，呢首歌系少有地无重复过歌词，就连副歌都无重复，因为填词𠮶个人话有太多嘢想表达，每一句都系我嘅故事。呢首歌想话畀人听，其实我只不过系江若琳，我从来无高人一等，我唔系明星亦都唔系偶像，我只不过一个想实验自己梦想嘅女人仔。”

谈到9月一连两日音乐会，Elanne愈讲愈兴奋：“依家音乐会到排练得如火如荼，今年系我入行十周年，我唱好多以前嘅歌曲，不过好耐无唱，依家谂起都有啲惊。今次音乐会我都会跳舞，但大家唔好期望系我会劲歌热舞，而系一啲好有故事性嘅舞步，我亦都会有一啲才艺表演，不过呢个就保持神秘先，总之依个骚都系以party感觉为主，我希望真系可以个个入场观众都可以一齐玩，大家可以笑住走。”

在圈中人缘甚好的江若琳，希望籍著今次十周年音乐会去多谢每一位支持及帮助过她的人：“呢个骚我都好希望会邀请一啲喺过去十年有帮过我嘅朋友嚟一齐玩，犹其系当年一齐出道𠮶班同期朋友，仲有希望请到一班喺过去十年对我好有影响嘅前辈做我嘅嘉宾，其实做唔做嘉宾都系其次，最想系借今次呢个舞台去一一多谢呢班人。”