【专访】有机会要返内地发展？ 本地Rapper Heyo：唔好故步自封
本地Rapper Heyo坚持玩Hip Hop十年，对于近日因为《中国有嘻哈》Hip Hop再次被炒热，他的态度依旧：“对我嚟讲Hip Hop唔系潮流。”既然Hip Hop音乐于内地突然受到主流观众注视，Heyo认为有机会就要到内地发展，而且香港音乐不断地“内耗”，借机到周边地方继续发扬香港的声音。
摄影：黄国立
唔怕“被禁声”？
Hip Hop的态度就是“有𠮶句讲𠮶句”，但要到内地发展大部人第一时就会联想到掣肘处处，“被禁声”等等，Heyo却不太担心：“睇你点讲啦，向来中国嘅诗人都系隐晦啲嘛，中国呢个土地系啲咁嘅养分，出嚟嘅嘢就系咁。再讲，都系睇你点样去表达同包装入面嘅message。向来历史都有好多，例如摄张纸仔落个包都系一个方法。有啲嘢要讲就要讲，因为想讲吖嘛，但系睇你点讲㗎啫！”
于上一篇报道，Heyo形容《中国有嘻哈》似三国一样，而且认为中国的Hip Hop会经历一段混沌的时期，要“趁乱”发围。那Heyo会否转型Rap国语？
Heyo却认为：“呢个关生活事，如果我真系多咗机会上去生活，咁我自然会用啲国语啦。咁我国语咪自然会熟啲，自然有嘢会同国语族群讲嘢，我会睇下我想讲啲咩嘢然后去决定用咩语言；会决定个受众先再决定语言。”
“挥动紧一面我哋群体嘅旗帜”
既然生活体验会影响Rap的语言和内容，Heyo会否计划到内地生活一段时间？他表示：“睇机会啦，因为你唔去揾佢，佢都会嚟揾你，呢个咪就系香港嘅状况。就算我净系想做好广东话啫，但系国语仍然会攻过嚟，咁点解唔主动啲呢？咁我哋都可㗎嘛！佢哋又唔系唔俾我返去，咁咪返去，又讲啲嘢俾你听，讲啲感受俾你听啰！唔好故步自封最紧要！”
Heyo又讲到：“赚外汇吖嘛！因为香港嘅乐坛太内耗，唔好净系话中国，台湾、马来西亚我都要打(入)，甚至其他有华人嘅地方我都要打。”Heyo续道：“旧时广东话喺所有唐人街可以用，但系依家好似贬咗一贬㖞，全部人都讲普通话；但系入面啲公公婆婆都系讲紧广东话，证明仲有一条线牵引喺到，咁我哋就要做啲嘢突显番我哋文化嘅宝贵，如果唔系呢个文化就冇㗎喇。”
Heyo认真地说：“要话俾佢哋听，我哋都仲系好有价值。其实Hip Hop都好讲社区性，我哋系挥动紧一面我哋群体嘅旗帜！”
相隔10年的Call and Response
Heyo坚持10年，于上年推出首张个人大碟《花华》，而上月尾才推出《盛夏的舞》MV，Heyo表示接下来的时间正筹备其他歌曲的MV。虽然新MV对乐迷来说的是惊喜，但始终最期待还是希望听到新歌。Heyo透露正准备将09年写的旧歌《走》重新编曲：“𠮶阵2字头啱啱玩Hip Hop，首歌写点样睇自己，觉得Hip Hop系咩，写低咗当时嘅态度。到依家重新编过首歌，同10年前嘅自己作回应，以前睇嘅嘢系对未来嘅揣测，依家去到呢个位听番啲词会觉得‘唔系咁㗎㖞！’，睇番以前嘅揣测有啲偏差，点解会形成㗎呢？我依家要点样看待，点样去修正。”
《喜爱射毛》＝《悼鹃》？
相信有不少人认识Heyo都是因为《喜爱射毛》一曲，歌词、曲风、MV讲夜蒲生活非常“上脑”，事隔几年再回望这首歌，Heyo认为是一个成展的路口：“《喜爱射毛》系一个成长嘅路口，因为我完成咗样嘢，我可以好口没遮拦，可以讲到一种反讽，写party歌去反讽party；首歌听落好hyper，但系歌词讲紧我唔系好钟意party，亦讲紧party现况系点。”
“同埋当时出《喜爱射毛》系想冲击班卫道之士，好虚伪𠮶班人，我就系好真实咁呈现落去party咪就系啰！你哋唔使再猜测夜蒲系点喇，个音乐就系咁‘Boom Boom Boom’，同时间就好似歌词就系好颓废，所以首歌好错配㗎！曲风好hyper再配以一啲好颓废好嘲讽嘅meaning，我就系唔钟意𠮶种伪善。”
“跟住‘哦，你哋唔钟意吖嘛’同一个题材我就用啲诗情画意去包装，就有《悼鹃》呢首歌，其实两个故事想讲嘅嘢系一样，但系后尾我发现佢哋都唔care嘅，但系我对自己有一个交代。即使你唔钟意hyper好低俗嘅风格，我包装到有诗意我都写到！”
唔知大家听完呢两首歌有咩谂法？