【专访】《中国有嘻哈》入屋 本地rapper Heyo 挨十年北上挑机？
内地节目《中国有嘻哈》卷起一股Hip Hop热潮，人人口头禅都变成：“你有Freestyle吗？”但早在节目出街前，香港已经有一班Rapper默默耕耘做Hip Hop，而Heyo就是其中一人。虽然香港市场仍未将Hip Hop视为主流，但Heyo月前推出歌曲《盛夏的舞》的MV，歌曲中featuring卫诗，哪观众又会如何区分“主流”、“地下”，还需要那么壁叠分明吗？
摄影：黄国立
再现“Hip Hop热”？
《中国有嘻哈》出街后令Hip Hop音乐再次进入主流观众耳朵，仿佛Hip Hop再次变成潮流？坚持玩Hip Hop十年的Heyo对此有何看法？Heyo的态度是：“对我嚟讲Hip Hop唔系潮流，我都做咗10年，我本身唔会有潮唔潮流呢个谂法。”
“Hip Hop文化”一早已在香港存在，但近日突然被炒热，是否反映香港受众只会跟风？Heyo认为这与香港的教育有关：“系嘅，佢哋好少接触音乐、多元文化嘅机会，一兴起就变成潮流；同埋都关教育事。好似外国人细个就有得接触音乐，但香港嘅家长好多就俾接触细路古典音乐；学习模式都唔同，学古典跟谱弹，但外国就着重数理逻辑、自由发挥。”
《中国有嘻哈》中制作人的资格一直是网民讨论的焦点，而吴亦凡更是被“针对”的对象，Heyo对几位制作人有何感觉？
“我会觉得佢后面有好多商业考虑嘅，可能吴亦凡后面同呢个节目制作部门有关系，你唔知㗎嘛！张震岳𠮶啲位又冇咩嘢嘅，因为佢都系一个制作人，虽然佢唔系Rapper，但系佢都会制作Hip Hop音乐，几好㗎反而！因为可以由唔系咁inside嘅角色睇番一啲inside嘅嘢。由以外或附近嘅范畴去睇番Hip Hop呢样嘢，都系一种多角度思考嘅象征。”
《中国有嘻哈》玩反渗透？
经常都会听到有人话“冇歌啱听”、“依家啲歌都唔知唱乜”等等的声音，而且大多都出自长辈的口中，是否意味年轻音乐人不受重视？Heyo却认为不用气馁，只是现阶段会艰苦一点：“音乐如果有‘反渗透嘅能力’就更加劲，如果可以令到长辈都会听都系好处。就好似《中国有嘻哈》出咗嚟将会有好巨大嘅转变，一定有好大嘅转变！因为佢令到一班长辈，甚至年青，十几岁嘅人会再接触呢个文化！呢个以往被称为‘次文化’嘅Hip Hop将会向主流行咗一大步！你睇番《Show Me The Money》就知，喺韩国已经同主流混为一体。”
睇《中国有嘻哈》如睇“三国”
《中国有嘻哈》节目如此声势浩大，Heyo也有留意而且觉得像看“三国”一样：“入面有个选手叫‘鬼卞’，摆到明佢系有Style啦！佢玩紧嘅系Core腔‘呕泥声’嘅Rap㖞；仲有我钟意阿Gai，佢哋两个根本就系奇才。阿Gai系玩紧‘道家Hip Hop’，用道家嘅诗词歌赋㖞！鬼卞又系正！佢系一个小学语文老师嚟㗎嘛！几吸引呀佢个身份！所以我依家睇上面好似睇紧‘三国’咁款！”
用三国去形容内地的Hip Hop分布，顿时有画面，亦更易理解，Heyo续道：“蜀国𠮶边玩紧嘅成都话系点嘅呢，有啲西域啲嘅感觉嘅！官府啲𠮶边，南方广东𠮶边又玩咩Style呢？我依家系咁样睇佢哋！”
“另外你又睇到官府𠮶边‘辉子’佢哋，以往中国Hip Hop嘅battle系劲到去武汉㗎咋，跟住就北京、上海官府啲嘅Hip Hop。到最近Trap爆起上嚟，成都、雾都𠮶边嘅Hip Hop，都系两种形态嘅Hip Hop，仲有啲零散啲Reggae啲嘅Rap好似潮汕𠮶边𠮶啲，数到方言Rap，一定系蜀国𠮶边，潮汕、广东甚至去到新彊都有。蒙古Hip Hop都好劲，自成一格㗎！同埋佢哋有啲交杂得好癫㗎！新彊维吾尔𠮶边会用几种语言Freestyle，一定有英文啦，国语、地区方言、甚至维吾尔语！”
Heyo咁讲，大家会唔会将节目入面嘅Rapper幻想成三国武将，MC Jin系吕布，PG One系赵云，艾福杰尼系许褚，鬼卞系张角等等，净系FF下都过瘾，而每次Battle就好似佢哋征战沙场一样！
Heyo将会打入内地？
Heyo又补充一句：“所以中国个Hip Hop会好乱，一定会经历一个好混沌嘅时期，所以就要趁乱！”这一句难道意味着Heyo已经有计划进军内地市场？
Heyo表示：“呢个一定要！因为香港搞音乐本身已经好困难，个市场唔系好大，同埋香港音乐不断地‘内耗’紧，你一定要去将香港嘅音乐变番大个market去打周边嘅地区。中国亦系一个周边地区，为咗香港音乐好系应该将佢发扬开去，俾更多人听到香港嘅声音。”
要打入内地又会面对不同的问题，除此之外Heyo还有甚么大计？想知更多记得留意下一篇报道！
话时话，咩系Freestyle？
到底咩系Freestyle？
人人都讲“你有Freestyle吗？”到底甚么才算Freestyle，与数白榄又有何分别？
Heyo话：“数白榄系正拍嘢，Hip Hop系非正拍嘢。用16分音符去数，一拍有4下，‘1 、e、 n、 a’，数白榄就系正拍个‘1’去入，Hip Hop就会喺‘e、 n、 a’位入，‘e、 n、 a’收，或者正拍收都冇所谓，简单讲就系Rap比起数白榄嘅节奏更讲究。而Freestyle系其中一个techniqe，好考你点样即刻set punchline，一个练习嘅方法。”
点样去评论一段Rap？
Heyo话：“首先，个Flow嘅变化啦，会唔会加入啲melodic(旋律性)嘅嘢啦，因为有啲Rap来来去去得两、三粒音，更加‘说唱’。再者有冇画面啦，歌词令人一听完会觉得‘哗！我睇到你讲紧嘅嘢㖞！’可以启动到个联觉。Punchline系画龙点精嘅位，可能系同周遭环境有关。”