【任噏乐评】《中国有嘻哈》变速配节目　Freestyle系冧女绝招？

《中国有嘻哈》去到第5集，Hip Hop Man去留亦终于揭晓，答案当然系有得留低啦，记住一句说话“一切都是套路”。

“套路”又点止咁少？同HipHop Man battle嘅双胞胎组合OBi & MO3，于节目尾声败部复活成功，唔知过几集会唔会又整多次“复仇Battle”，然后吴亦凡再讲多次“真的很难选，太难了！”而且今集加咗啲“暧昧”元素落去，令到有两pair参赛者好似萤幕情侣咁。

内地HipHop团体“红花会”的大热Rapper“PG One万磁王”于今集与女Rapper“Yamy”battle，节目中回顾前几集片段时，参赛者见到佢哋两个要battle都大叫“结婚！结婚！”，冲淡一下节目嘅火药味。

PG One同Yamy一齐造歌𠮶阵，PG One都迁就晒Yamy嘅口味，曲风要funky就畀funky，要old school就畀old school，就连Yamy都对住镜头甜笑大赞“这个男生不错！”两人同台一啲都冇battle嘅感觉，而且答问题一齐天然呆真系够晒可爱。

除咗PG One同Yamy呢一对，仲有Bridge同女Rapper二毛，佢哋嘅“情愫”真系出晒面，两人合作写一首Hip Hop情歌，潘玮柏都话“谈恋爱！谈恋爱！”两人准备对阵时，张震岳都忍唔住问：“你们这首写的是情歌吗？”然后Brige就解画话两人商量完要写一首成都女与重庆男耍花枪的歌，甜一点的歌曲，潘玮柏都忍唔住讲一句：“缘份就是这样开始！”MC HotDog都话呢一组就好似系情场老手想追情窦初开嘅少女一样。其实回顾片段𠮶阵，Bridge已经有锡二毛只手，又话“然后一起”，充满暗示咁款。Battle完二毛仲要揽住Bridge话：“我想哭”，Bridge又俾佢拎住象征胜出嘅“R!CH”帽，唔通真系有啲嘢？

另外，张震岳又喺节目中段爆Yamy系MC HotDog杯茶，而MC HotDog又爆潘玮柏最近有拖拍。

虽然节目名叫《中国有嘻哈》，不过大家当作一个综艺节目去睇心理会平衡啲，当系一个认真音乐去睇就一定会有落差。一个综艺节目如果冇节目效果你都唔会追去啦系咪？MC Jin化身“HipHop Man”系一个效果，上一集讲MC Jin要俾人淘汰又系一个效果，评判之间有矛盾系咁讲“很难选”又系一个效果，今集营造到参赛者“互生情愫”又系一个效果，只系估唔到咁快就洒盐花啫。除咗要记住“一切都是套路”，仲要记住集嘅新金句：“缘份就是这样开始！”

妈呀！我已经分唔到系睇紧《中国有嘻哈》定系《中国有速配》！

今集《中国有嘻哈》仲有好多精彩镜头㗎！(点击放大)