Celine唱情歌原来无得拣　攞Golden Buzzer有压力：但唔系好多啰

年纪小小就扬威国际9岁“小巨肺”Celine妹妹谭芷昀，早前她在美国节目《全美一叮》（America’s Got Talent）中，一鸣惊人，并在最新一集，以Michael Bolton的《How Am I Supposed to Live Without You》获评判按下“Golden Buzzer”直送到“Live Show”，成为首位港人获此殊荣。

眼见Celine妹妹为港人争光，其经理人萧定一（阿一）今日就在铜锣湾为她举行见面祝捷会。Celine妹妹在萧定一陪同下以花花连身裙配高跟鞋出场。不过她的爸爸谭顺生因为工作为由，未有出席活动。

见到Celine妹妹接受访问嘅时候，大方得体又不失童真，系几可爱嘅！

Celine妹妹拎“Golden Buzzer”萧定一：无寄望过

见面会结束后，Celine妹妹在经理人萧定一陪同下接受传媒访问，Celine妹妹对于今次在《全美一叮》中 ，获评判按下“Golden Buzzer”感到非常开心：“我觉得好开心啦，屋企人都有恭喜我，但未有celebrate（庆祝）。”至于问到会唔会叫爸爸送礼物，Celine就话无不过已经好开心。阿一补充：“佢第一round无攞到Golden Buzzer，所以去到次圈嘅时候真系无谂过可以拎到，因为通常都系第一round会易攞Golden Buzzer，因为第二round只有客席评判先会有Golden Buzzer嘅权利，所以要第二round有机会相对会好低，仲要每晚只可以得一个，所以我哋都无寄望过。”Celine续说：“如果可以继续晋级就好，不过我依家已经好开心。压力都有少少，但唔系好多啰。”

到萧定一早前接受《香港01》访问时表示有意为Celine申办红馆，萧定一表示：“其实当时签佢（Celine）嘅时候佢已经有呢个梦想，我谂所有歌星都会好希望喺红馆开演唱会，咁大家都知道要申请红馆真系好难，要早一年申请仲要未必批畀你，依家睇下有无啲积极啲嘅方法可以早啲开到红馆，概念都系想做慈善，而唔系想赚钱，想畀多啲人知道Celine拎到呢个殊荣之余，同步畀人知道佢唱歌嘅实力，同埋帮助到有需要嘅人。”问到如果可以开红馆，Celine会唔会同爸爸（谭顺生）合唱，Celine也表示想与爸爸合唱。

讲到嚟紧比赛歌曲选择方面，萧定一表示其实拣歌源自大会：“赛制其实系参赛者可以提议想唱咩歌，而大会会补充一啲佢哋嘅意见，例如系，我哋拣咗十首歌，佢哋会减走五首，再畀多五首佢哋拣嘅畀我哋，而呢十首歌系要到最后比赛前两三日先知道系真系唱边只嘅。好似啱啱参赛呢首《How Am I Supposed to Live Without You》就系大会所提议俾我哋唱。所以，如果可以俾我哋拣我哋都唔会拣呢首歌啰老老实实，因为呢首系一首情歌，我哋都明白对佢嚟讲唱一首情歌系好唔着数，但可能佢哋（大会）有佢哋考虑嘅嘢啦。”

问到Celine知唔知道《How Am I Supposed to Live Without You》有咩意思，Celine似乎用咗另一个方式去代入呢首歌：“爸爸同我讲，系讲我同我妹妹..”阿一马上声音护航：“佢系代入咗亲情，我觉得呢个做法系啱嘅，起码同妹妹嘅感情一定有，始终经历唔到《How Am I Supposed to Live Without You》𠮶种失去，佢同妹妹日日都喺到开开心心，所以唔会有失去感。”

Celine妹妹被点评唱歌无感情

谈到音乐监制Eric Kwok（郭伟亮）曾经点评Celine妹妹唱功了得但情感不足，阿一神回：“我明白佢哋嘅意见，其实我自己都有咁嘅睇法，睇法系一致，但系个问题系；第一，歌我哋无得拣，我哋只可以喺范围入面做到最好；第二系，一个9岁嘅小朋友，如果将失恋嘅感觉唱到淋漓尽致，我相信佢父母都会好担心，但我当然系会听Eric嘅意见啦，喺感情上我哋会尽量落多啲功夫去解释畀佢听，希望佢下次可以明白多好多。”