【任噏乐评】谭顺生“忍痛”低调为爱女赚人气　转技俩系乜套路？

有“小巨肺”之称的Celine妹妹谭芷昀年仅9岁，早前凭Celine Dion名曲《My Heart Will Go On》于真人骚《全美一叮》一炮而红。在最新一集，Celine妹妹暂时放下Celine Dion，改唱Michael Bolton的《How Am I Supposed to Live Without You》获评判按下“Golden Buzzer”，更是首位港人获此殊荣。Celine妹妹所属公司的老板萧定一更表示希望为她举办红馆骚。

虽然Celine妹妹成绩骄人，可谓“英雄出少年”，但外界对其父谭顺生的批评不绝，家燕姐更斥“此人居心叵测”。谭顺生被爆出涉嫌学历造假、网站得奖纪录“坐时光机”、抢家燕姐学生、硬屈《中国好声音》港区冠军为自己学生作招来、有传父凭女贵“捆绑式”一并签约萧定一旗下、唱功被质疑是否值收一万蚊四堂等等。

连串事件爆出后，谭顺生忽然转玩低调潜水成个几月，未知是否觉得自己之前树大招风要收俭一下。都啱嘅，其实每人都可以有改过嘅机会。点知转个头，佢星期一预告女儿会再次现身《全美一叮》，星期二出席活动又唔接受传媒访问，到今日Celine获评判按下“Golden Buzzer”片段喺网络疯传，再次备受关注。到底谭顺生系真心转低调，定系另一个宣传套路？

谭顺生之所以会让人猜测是否“真心低调”，皆因佢都系生意人，所开办嘅音乐学校亦甚具规模，相信佢都知晓呢个市场嘅游戏规则同观众嘅口味。而且讨论区，网民嘅言论嘅反应一向都系“逢红必反，逢黑必捧”。之前太过高调，被爆出黑材料，导致网民一致负评，正正中咗“逢红必反”；相反，近日低调处事，没有过度曝光，网民目光集中在Celine再夺佳绩上。虽然偶有暗讽谭顺生嘅留言，但都只系抽下水，而非以往负评汹涌丧插。话唔定可以乘机洗底呢？

话说回来，睇番Celine获“Golden Buzzer”条片，谭顺生喺观众席支持囡囡时笑得好甜，都睇得佢系真心锡个女嘅。既然Celine有天份当然要栽培啦，让女儿出国比赛吸收经验亦无可厚非，但时机与手法就系问题，所以外界先会批评佢“视女儿为摇钱树”。

再讲，谭顺生有开办歌唱学校，将女儿视作生招牌亦理所当然，话晒系出自己名门，宣传下都唔过份。但Celine只得9岁经常四周演出，每日刻苦练习，为保靓声戒零食，就好似冇咗童年一样。可能有人会话“子非鱼焉知鱼之乐”，话唔定Celine妹妹享受四出表演呢？话虽如此，但人生有好多面向，童年应该无忧无虑探索嘅黄金时间，如果只侧重于歌唱，实在太单一。况且，已故天后梅艳芳曾表示，回想自己童年只顾忙着表演亦有所遗憾。

所以，无论谭顺生系真心低调，定系转另一种宣传套路都好，希望佢可以多啲照顾番Celine嘅感受。有时过份将长辈嘅期望加诸下一代身上，分分钟会弄巧反拙，制造无法修补嘅裂痕。