【专访】入行28年幸得圈中人接济　梁汉文：人生唔会一直都好顺！

入行28年的梁汉文，事业经历多次高低，常常被指是香港最不走运歌手之一，他是那种走出街大家会认得记得，也曾经有红极一时的歌曲，如《衣柜里的男人》、《缠绵游戏》及《七友》等，好的歌曲多不胜数，但人气始终不如歌曲那样，对于常被指“不够运”，梁汉文表示：“人生唔会一直都好顺，其实咁样都几正！”摄影：黄国立发型：Moe @Fifth Salon化妆：Maggie Lee场地：New World Millennium Hong Kong Hotel

歌手梁汉文（Edmond）将在8月举行《梁汉文我的另一半演唱会》，他表示今次音乐会将会唱出演唱会未有唱过的歌曲：“我前年做完《梁汉文中场表演演唱会2015》，事隔两年筹备呢个《梁汉文我的另一半演唱会》，目的系想借今次呢个机会，想将我曾经忽略嘅歌送比我嘅歌迷。”

Edmond续说：“其实我有好多歌，之前喺红馆未唱过例如系《错先生》，《找我》，《移情别恋》等。希望可以透过今次音乐会，可以一次过唱哂𠮶啲歌比观众听。今次呢个音乐会我想同歌迷有多啲互动，所以会特别搭建一个T型Catwalk舞台，到时一班嘅乐手同我就会喺条catwalk台上玩音乐及唱歌，而歌迷朋友就会围住Catwalk台坐，相信呢个形式可以为歌迷带嚟新鲜感。”Edmond续说：“其实我有啲歌互相系有关系而又好多人都唔知，好似《普通朋友》佢系同我之前首《好朋友》系有关系，而我首《角度》亦都系同我首《呼吸》有关系，其实我有好多呢啲兄弟歌，所以我都好希望到音乐会嘅时候可以演绎出嚟畀大家听。

谈到Edmond今年推出的歌曲《终身赞助》，歌曲满是人情味，而且找来从小到大都影响著Edmond的街坊，朋友，同事以至圈中好友参与MV拍摄：“呢首歌系讲人情味，每一个人喺成长过程入面都会遇到影响你嘅人，其实从你喺屋企出门口一刻开始，你已经接触到影响你嘅人和事，而且𠮶啲事都会离不开人情味呢三个字。而喺我身上，我会谂起学校，而且我会谂起当年嘅班主任，谂完学校，我又会谂起曾经有一个阶段我成日喺一日茶记食嘢，经营呢间茶记嘅一家人好俾到我温情，之后又谂起我嘅网球教练等等，虽然呢个MV唔系用上好复杂嘅制作，我虽然喺入面都只系行行企企，但每一个画面对于我嚟讲都有佢嘅意义系到。”

梁汉文：我觉得人生唔会一直都好顺

梁汉文这个名字，相信好多人都识，出街也会有人认得，而且他有很多经典作品。但有好多人会觉得梁汉文的星途总是遇到阻滞，人气未如歌曲红，对此Edmond看得很开：“好多人都觉得我嘅歌唱事业欠缺运气，其实我觉得自己入行遇到咁多好歌，计埋卡拉ok及合辑数数手指都出咗40张唱片，其实除咗我，我都见过有其他人有咁样嘅遭遇，我觉得人生唔会一直都好顺，对于我嚟讲最紧要系喺唔同嘅事入面都有所学习，其实咁样都几正！我自己一向都好正面，乐天，好少会钻牛角尖，唔会因为咁而好sad。”

入行28年的梁汉文向来有“娱乐圈好好先生”之称，人缘极好，当过去28年在工作上经历多番事业低潮，Edmond总会有圈中好有支持，例如在2001年“华星唱片”结业，梁汉文变成“孤儿仔”有旧同事为他义务工作；到2002年，Edmond要靠拍一些不会上映而直接发行的电影维持生计，当时曾志伟曾出手帮忙接工作并签他为旗下艺人，到Edmond后来获得当时“金牌唱片”的黄柏高赏识，志伟哥再无条件解除合约等；Edmond每次经历低潮都会有人支持，在这个充满是非的娱乐圈能有这么好人缘真的不是人人做到：“其实我都唔知点样做到，我谂系因为平时真系攞个心出嚟待人接物，相信咁多位同我做朋友嘅人会感觉到，我系一个唔会同人计较嘅人，有啲嘢系好相辅相成，大家识我咁多年会知我对朋友系真诚，唔会谂啲复杂嘢，唔会有私心。”

（你觉唔觉自己性格好和善而好易俾人虾，喺娱乐圈会成日俾人占便宜？）

“算系啦，可能因为我个人易商量，但我都会为应该要做嘅嘢而争取，只不过我唔会用恶嘅态度，反而系用温和嘅方式，我会讲道理啰。其实我明白每样嘢都有好有唔好，但我觉得呢种处事先系真正嘅梁汉文。”

问到就快开骚，有没有什么特别养声方法，Edmond边笑边分享了一件趣事：“有啲人成日话要养声所以要禁辣，我就无呢啲嘢嘅，我都几钟意食辣嘢嘅，不过我就会饮花旗参，老婆就会煲牛蒡水或者一啲中药咁。不过我仲记得一样保声嘢，但我已经好耐无试过，大概9几年演唱会嘅时候，我记得我，Sammy（郑秀文），安仔（许志安），当时唔记得边个教我哋食蛇胆保声！听到都觉得劲呢！仲要系生蛇胆，直接啪落去。我都唔记得点解会有食蛇胆保声呢个传闻，而我哋三个当时又胆粗粗走去试，我印象中当时喺开骚两三个钟前我哋一人一粒，但有无真正功效我就真系唔记得啦，而𠮶件事发生之后𠮶两三年，就有人流传我哋三个成日食蛇胆。依家谂起我都觉得我哋好劲！好勇！不过我依家就唔系好敢试，点知食咗会唔会有咩事，但每次谂起都觉得呢件事好有趣。”