【专访】夏韶声乱弹俾领班掴到流鼻血 你估“摇滚之父”咁易做？
提到“夏韶声”这个名字，部份年轻读者可能联想到“讲UFO㗎嘛”；部份资深乐迷会想起“弹结他唱《童年时》𠮶个嘛”，但也只是答对一半。
夏韶声于60年代当乐手出身，于一间又暗又小的歌厅“边学边弹”，而且并非一开始就当结他手。时至今日能被称“摇滚之父”、“夏爷”，夏韶声也吃过不少苦头，更试过被领班打到流鼻血。时至今日夏爷继续摇滚，本月更会推出新概念专辑《2020 Arrival》， 向听众展示“夏韶声的世界观”，当中歌曲《沉睡启示录》有一把“天使声音”为大家带路。
夏韶声出身可谓“有血有汗”，他忆述：“我出身喺60年代，65、66年左右，当时未正式出身，喺一啲好黑好细间嘅舞厅跟人学嘢。𠮶时我弹Bass(低音结他)，有一首歌叫《Love is Many Splendored Thing》，全世界都系弹Eb Key，我师傅问就我‘你知唔知自己弹紧咩Key？’”
想不到这普通的问题令夏韶声“一句见红”，他续说：“我弹咗几下，就断估答‘C！’我师傅打鼓嘅，一手揸鼓棍，另一只手就一巴打落嚟，咁就梗系流鼻血啦！”这两行鼻血令夏韶声离开原来的歌厅。
“60年代香港歌舞升平，歌厅、舞厅、酒吧，周围都听到有音乐，而且系人弹出嚟，即系代表有嘢做啦！”夏韶声回想当时遍地机会，不愁冇工开，但到底他如何入行？答案竟出人意表。
夏韶声道：“最弊就系我哋练都冇练过就入咗嚟做，因为太需要人，你系半入嚟做半学嘅，变咗半桶水，喺屋企识弹几个Chord仔就入嚟。因为你半桶水嘛，咁就俾领班闹啦，闹得多你就有进步。”
“我第一件乐器系Bass，第二件系琴，第三件系打鼓，打鼓系最耐嘅，有5年时间我都坐喺鼓凳上面。”
夏韶声之后接触其他乐器，不过还未执起结他，又形容自己“周身刀咩都识，但又唔系好利”，原来是当时环境所逼的：“喺我哋𠮶个年代识弹一样嘢都系冇乜用，有时就帮人补位，当时有乐手话‘埋嚟同我顶一part，我出去食口烟！’咁就开始咗打鼓。跟住个领班又唔知走去边度煮面，我就走去弹琴，咁就变咗周身刀咩都识，但又唔系好利。”
“我宁愿做一个结他手，唔使因为语言问题去唔得远。”
夹Band用到的乐器都涉猎过，但数来数去也未见结他，到底夏韶声何时才执起结他，还成为了他的标志？
夏韶声弹结他的起点始于80年代：“我82年认识竹田和夫，加入乐队Creation tour完日本，佢送咗支ESP(结他)畀我，同我讲‘如果你想唱好啲Blues，你要弹下结他㗎！’就系咁我由83年先至孭起支结他，一直到依家。”
演奏结他超过30年，至今仍坚持每天练习，但夏韶声仍未觉得自己能独当一面，还后悔太迟执起结他：“我宁愿做一个结他手，我可以全世界周围去，我唔使因为语言问题去唔得远。可惜因为我嘅出身我咩都弹，到我咁后期先执起支结他，我成为唔到一个独当一面嘅结他手。”
虽然夏韶声认为自己“唔系一个好结他手”，但他也包办了新碟《2020 Arrival》中大部结他录音，包括《Nightmare》一曲前奏超过一分钟的结他solo。能够由“半桶水”到今日我手弹我心，不断演出累积经验，取他人之长是方法之一。
夏韶声形容当时乐手会互相“取经”：“听到隔离酒吧玩紧《Soul Finger》㖞，我哋唔识玩唔得㗎㖞！咁我哋又要学喇。行过𠮶间玩Jimi Hendrix㖞，我哋又要学，就系你影响我，我影响你，一路大家行上去。”
夏韶声于乐坛打滚数十年，曾为不少band友抱不平，又慨叹现时夹band、当手仍未受尊重，他谓：“好多人对Band嘅眼光当你好似系喽啰咁，差唔多系‘你想嚟弹吖嘛，你畀番钱我’咁滞。今时今日我哋养唔起啲音乐人，依家呢个年代夹band嘅人真系好辛苦，佢哋冇咩好嘅收入。”又指现时环境难以让新乐队成气候。
想知夏韶声如何为band友出头、新碟《2020 Arrival》与以往漫画《天眼》有何关系、甚么原因令夏韶声64岁仍然有灵感创作？请留意下回分解。