【任噏乐评】神级MC Jin都要拍师奶剧　返香港可能系佢最错决定！

最近内地节目《中国有嘻哈》突然让Hip Hop在中国各地火了起来，节目中出现了不少知名的人气Rapper，表现实在令人眼前一亮，不过让香港观众产生最大反应的，莫过于Hip Hop Man嘻哈侠这一号神秘人物。虽然戴著面具也认得他是MC Jin，但的的确确比起以前在香港发展的时期，这阵子的欧阳靖的形象更似是一位英雄，但原因并不是他的技术和表现比以前好，只是他的才华终于有机会让更多人看到。

提起MC Jin，大家最有印象仍是2002年MC Jin喺美国完美击败了不少黑人Rapper，连续7个星期获得“Freestyle Friday”环节冠军，Rap出一句“你返屋企啦”真系听到都激动到打冷震，所以连吴亦凡见到佢嘅时候都唔敢问“你有Freestyle吗？”

不过问题就嚟啦，除咗佢N年前Rap赢黑人为香港人同广东话争光外，到底大家仲记得佢啲乜？2003年佢开始喺美国拍戏，专辑又上埋Billboard，事业顺风顺水，但偏偏喺2008年决定回流“同声同气”嘅香港发展，但系直到而家大家都净系记得一句“ABC系我系我　横睇点睇都系我”，仲要落井下石笑佢广东话Rap得唔好。在于外人看来，返香港可能系佢人生中一个最错嘅决定，一个令人戥佢唔抵嘅决定。

呢条MC Jin Rap赢黑人嘅片段，无论隔几多年都系咁好睇！

回港后，每年佢都会做一张Mixtape，但一年比一年少人支持，后来佢去咗TVB，不过并唔系因为TVB赏识佢嘅音乐才华，而系安排佢去拍剧，最威风𠮶次就系喺《潜行狙击》入面饰演“蜡青”，仲比佢攞埋当年《万千星辉颁奖典礼》嘅“飞跃进步男艺员”！呢一个奖项就巴闭啦！仲叻过佢喺香港乐坛上嘅成绩，因为佢都只系攞过“叱咤十大”嘅第六位同“新城劲爆Hip Hop歌手”呢类猪肉奖。对于一个Hip Hop歌手嚟讲，呢个情景真系令人情何以堪？

讲返而家就真系今时唔同往日啦！一个《中国有嘻哈》节目，令香港人突然醒觉，系㖞！香港有一个Hip Hop之星欧阳靖㖞！“喂！同我打残班内地Rapper！”“吴亦凡行开啦！我哋香港嘅MC Jin rap赢黑人嘅时候你都唔知系边。”哗一个二个突然好似由细睇住个仔大咁，同啲怪兽家长冲出嚟周围同人讲“我个仔最叻！”无乜分别，真系唔该晒！啱嘅，有水又点能够唔抽呢？“虽然我真系无乜听过MC Jin嘅作品，不过个Friend Share咗条佢Rap赢黑人嘅片比我睇，喂真系好劲啰！”问心𠮶句，其实佢嘅Hip Hop作品你又听过几多，有无比钱买碟支持过？你可能会话：“Hip Hop嘢我听唔惯㖞。”不过佢同陈奂仁出咗只比较容易入口嘅《买一送一》你又有无尝试过听一次？

可能到而家都会有人话：“最衰TVB啦，好哋哋一个Rapper搞到佢变咗演员！两头唔到岸！”而事实上系，如果冇TVB捉佢去拍剧，佢可能喺香港人心目中连半点痕迹都留不下。起码拍完剧，的确令到有华人嘅地方都会有人认得佢。反而香港人嘅习性就好特别，之前佢做广东歌，大家就话想听佢英文Rap，到佢而家离开香港一段时间，又话好想听佢嘅广东歌。甚至最近喺内地节目出现，大家就好似投机买大细咁希望佢为广东话争返口气，Well…到底呢种贪新鲜嘅心态害死咗几多有实力嘅歌手？