周殷廷演唱会｜落泪多谢家人　嘉宾GinLee喊得更劲仲为一事道歉

周殷廷（YT）入行9年首个演唱会《WHO IS YAN TING LIVE 2024》 ，今晚（14日）在九展Star Hall 举行，在第一组嘉宾JFFT离场后，YT跳完舞便唱出首次演唱的《晨星》，再迎来情深剖白的环节。他说自己自15岁就想做歌手，今晚终于可以开演唱会，鼓励各位正在追梦的人不要放弃。甚少流下男儿泪的YT，突然伤感落泪说：“老窦，妈咪，阿哥，我希望我有令到你哋骄傲。”

然后嘉宾Gin Lee（李幸倪）出场，跟YT合唱《日出时让街灯安睡》，而她竟然比YT喊得更犀利，直言：“我自己演唱会都唔会喊到咁，我喺台下面听到你喊，我真系搞唔掂，因为我识咗你好耐，真系好少好少见到你喊，但系你就成日见我喊。”YT回应：“我系喺Gin Lee世界被称之为令佢喊得最多次嘅男人。”

二人以往是环球唱片同事，但就透露识于微时，于邮轮上认识，双方父母都在场，因此两家人亦有交情。后来YT帮Gin执导了《Dear Secret》的纪录片和MV，听了很多她的秘密，陪她度过了人生低潮。Gin Lee坦言：“𠮶阵对生活、生命失去所有动力，我𠮶时好绝望，唔知点样，但系又要做歌，又要继续出碟。我好多晚同你倾偈，我话我真系搞唔掂，唔知应该点做，完全冇晒心机去做，你不停鼓励我。好多次倾偈我都话真系好攰，唔想再唱，𠮶段时间系我人生最低谷嘅时候，佢（YT）话唔紧要，佢会帮我去做呢个Project，用尽所有精神，拍晒所有人膊头，出钱出力帮我做呢个微电影同MV。𠮶时我冇乜勇气，我写咗两首歌畀我猫猫，我冇办法唱，好似音乐一起我就会喊，好崩溃，录咗好多日都录唔到。佢话你虽然呢一刻未平复，但系你要做，因为过咗呢个低谷你揾唔返个感觉，所以佢好畀心机帮我制作呢一个MV、Documentary，好感激！”

Gin Lee续说：“多谢佢鼓励我做呢一个MV嘅所有嘢，冇你喺后面推住我，我未必行到咁远。”她又指，除了多谢，还要跟YT讲对唔住，Gin Lee表示：“因为我自己𠮶段时间状态非常之差，我自己都顾唔掂自己，但系我呢排见你好活跃，我会睇你啲访问，谂返起𠮶段时间，你自己都经历紧好Massive嘅Challenge，你自己都经历好低好低嘅低谷。因为我知道成件事，我唔可以体会你嘅痛，但我可以幻想你𠮶时系几咁痛，但你喺垂死嘅最后一口气，都要扶我一把，我要多谢你，亦都要讲对唔住，我应该要关心你多啲。你应该都好唔容易，我而家状态好好，我可以扶你，Anytime ！我永远都会支持你！”

Gin表示，一知道对方要开演唱会，就追问YT为何不请自己做嘉宾，YT笑说：“肯定就是你！”他觉得现时Gin Lee发展得好好，虽然少了时间见面，但见证对方由谷底爬起来，YT向全场观众说：“如果你冇完成𠮶样嘢（Project），我会代所有香港人觉得可惜，所以虽然你话你扶我一把，但系我号召我所有认识嘅，现场嘅3000位、7000位，所有人！我哋帮Gin一把好唔好？因为我要摆佢上台，你红馆系咪会请我呀？”Gin Lee 和YT互相说要去对方的红馆演唱会做嘉宾，而在一片感性气氛下，YT返回后台换衫，Gin Lee再唱《开灯．熄灯》。

YT换上黑西装，顺序唱出三步曲《迟了悔改》、《三生有幸》、《意外现场》，然后在徐浩和Teddy Fan（范梓谦）伴奏下合唱《Louder》，他感谢徐浩在自己一无所有时，写了《迟了悔改》给自己，让自己事业有了起色。

演唱会尾声，YT读出致谢名单，包括所属的环球唱片，他说：“我知你哋成日喺连登闹环球，话佢害YT，but⋯⋯be grateful，things can always be better , but can be worse.”他感谢环球香港董事总经理Gary Chan及当日把自己签回来的前大中华区董事总经理黄剑涛（Duncan），他表示：“环球最近系炒咗批人，有啲同伴去咗英国，有啲坐喺度，环球嘅同事，我要逐个多谢你哋每一位。Also Duncan，Duncan was the one who signed me。”虽然他对环球十分感恩，但亦抱怨说：“边有人卖merch（周边商品）仲用cash only，我哋系咪70年代呢？”而最后他要多谢一个人，就是YT导演，即是他自己。

虽然观众很期待见到YT除衫骚肌，不过最终未能如愿，YT说：“除衫？唔好啦，你见唔到咩？我件衫中间已经冇咗忽布。”演唱会以《My Everything》作结，YT向每一面观众逐边鞠躬讲多谢，徐徐离开舞台。

更多周殷廷演唱会头场花絮：