外佣厨艺了得炮制生日惊喜　妈妈分享相处之道：要视她为家人

香港不少家庭雇有外佣，以减轻在职父母的家庭负担。惟网络上常见雇主吐苦水，指与外佣相处时有磨擦。一位妈妈最近在社交平台群组贴出外佣的拿手小菜，又分享与外佣的相处日常，既会一起做运动，又会为囡囡扎辫扮靓，令人羡慕！她在接受访问时表示，雇主与外佣相处要有良好沟通，双方取得信任，互相关怀，能请到一位好外佣，更是一个家庭的福气！

用心做好每件事

妈妈Christy分享，在聘用外佣前，她与丈夫跟其他雇主一样，有著不同的挣扎和忧虑。“难接受屋企多个外人，怕阻碍自己嘅日常生活，亦听过太多身边朋友话工人差，但现实生活又必须有个帮手，协助照顾日常起居。”

她怀孕后，与丈夫达成共识，先由奶奶帮忙照顾小朋友至1岁半。“待小朋友成长，有表达能力时才聘用工人姐姐。最起码如果不幸请咗位唔合格嘅工人姐姐，小朋友都有基本语言能力表达。”至今她先后聘用了两位外佣，均是得力好助手。“两任工人姐姐都令我好有安全感，卫生同安全意识达标，厨艺顶呱呱，无谂过我比中六合彩来得更加幸运。”

妈妈形容，外佣个性平和，开朗正面，又懂得观人于微。“作为雇主嘅我，若要评价佢嘅工作态度，就相等于喺后勤工作，但提供前线服务质素。姐姐好识得待人接物，例如每次递嘢俾我哋，都会双手奉上，由此可见一个人嘅修养。佢会不断求进步，用心做好每件事。有时唔喺自己工作范围内，都会主动帮忙。人总会犯错，当犯错时，佢会检讨、反思、道歉。”

预备惊喜被意外撞破

她不时在社交平台群组分享与外佣的相处日常，展示外佣了不起的厨艺。“佢刚嚟到嘅时候，每日会问我想煮咩𩠌，我会上YouTube揾菜式食谱，再提议佢点煮，互相交流煮𩠌技巧。日复日之后，佢每日下午时段就会谂好当晚菜式，然后上YouTube揾食谱，自己钻研，我就全权交俾佢负责。最主要都系佢有心做呢份工，亦乐于入厨。”

而令她最深刻的，是外佣曾为她预备特别的生日惊喜。“工人姐姐趁我出街，谂住为我预备惊喜，制作印式生日蛋糕，点知我早咗返屋企，破坏咗佢安排俾我嘅惊喜，佢极之生气，我亦系第一次见到有人会为呢啲事情而嬲，非常有趣！”

按图即睇与外佣相处之道：

助外佣树立权威

谈到外佣与孩子的相处，她表示，要小朋友接受一个陌生人，是需要点时间。“我囡囡4岁半，呢个阶段系好需要有人陪玩，亦需要灌输正确待人处事嘅态度。姐姐耐心跟随我哋嘅教育方针，协助一齐照顾小朋友。佢好肯同小朋友玩，容易融入小朋友世界。”

与孩子相处融洽的另一窍门，是助外佣树立权威。“我哋尊重姐姐，同时教育小朋友尊重姐姐。小朋友对姐姐冇礼貌时会制止，要向姐姐道歉，树立姐姐喺小朋友面前嘅权威。姐姐会更有信心同小朋友独处，更用心凑好小朋友。”

将心比心　互相包容了解

她直言，与外佣的关系是基于信任，入门时跟她沟通好要求的职责与期望，而外佣亦乐意配合。“我信任佢过往多年来累积嘅工作经验，可以运用自己嘅方式去处理日常工作。佢哋放弃家人，千里迢迢来到异地，要花几年时间喺陌生地方工作和生活，将心比心，视佢为异鄕嘅一家人，畀佢一个温暖的家，感情自然慢慢深厚。大家主仆关系好，合作自然顺畅。”要维持良好的主仆关系，亦要定清界线。“唔会有太多要求，始终佢哋薪金只有4千多元，系人唔系神，只要做好工作本份，已经足够。有好表现，系雇主嘅额外收获。”

与外佣同一屋簷下，她认为需要包容和了解。“有表现良好嘅外佣，同时要有容易相处嘅佣主，先可达到双赢局面。人心肉做，关系系双向嘅，沟通、包容、了解，每个家庭都可以共融和谐。人无完美，更何况工人姐姐系廉价劳工，遇著多才多艺，兼尽心尽力嘅工人姐姐，当然要赞！假若请咗唔合格嘅姐姐，同样可以俾佢哋一个训练机会，改善、进步，得益者一定系我哋雇主。请到一位好嘅工人姐姐，系一个家庭嘅福气。”

相关文章：绝世好姐离职　港妈网上PO文抒发挂念之情　网民：简直中咗头奖