【父亲节】离婚拖小朋友落水　律师爸爸：造成不能修补嘅伤害！

男女双方情投意合，成婚组织家庭，携手步入人生另一阶段，又是否必然白头偕老？家事法律师高昆峰（Billy）的工作主责为处理各项离婚案件、家庭纠纷。眼见不少夫妇在婚姻关系走到尽头之际，往往忽略了孩子的感受，作为新手爸爸，他感受尤深。“夫妻间出现婚姻危机，最重要系多啲沟通，无论你对一个人系几咁憎恨，都唔好将小朋友拉落水，可以影响佢哋成世！”
摄影：龚嘉盛（部分相片由受访者提供）

疫情下离婚咨询增多

作为家事法律师，Billy专责处理离婚个案、办理婚前协议，以及担当婚姻调解，协助处理家庭纠纷。“多数客人前来咨询，唔系个个都话要立即离婚。可能屋企有啲唔开心，想知点样保障自己。”

他解释，在香港办理离婚，要处理两件事，包括小朋友的抚养安排及资产分配。“除非一致同意安排，否则也要搬上法庭审判。”但他补充，因为审讯时间长、诉讼费用昂贵，“十单有九单”案件也会在审讯前达成协议。“离婚案件长则可以审六、七年，仔女都长大晒，即使已协商好财产及子女安排，仍需等待约九个月才完成离婚程序。”

疫情期间离婚咨询增多

婚姻出现问题，背后原因各色其色。“男人烂赌；对方长期喺外地、只顾工作唔理我；工作时间长，完全照顾唔到小朋友；出面有男、女朋友，呢啲都系原因。”而近来的新冠肺炎疫情，更令离婚咨询增多。“屋企空间不足，困住太耐，加埋小朋友唔使返学，一定有意见分歧，就会多咗争拗。”

不可修复的伤害

处理为数不少的离婚个案，Billy坦言，不少家长在处理婚姻问题时，忽略孩子的感受。“好多时我哋会见到其中一方讨厌对方，会专登做好多动作，令小朋友同对方嘅距离愈来愈远。例如讲啲好难听嘅说话，‘系呢个人唔好，佢做错嘢令我哋家庭破裂’，又或者好多时其中一方会投诉，对方唔俾我见小朋友，而对方就一定有理由。‘小朋友见你之前喊得好犀利㖞’、‘见完你返嚟之后瞓唔著㖞’。其实好睇家长点样灌输离婚概念俾小朋友，要好小心去处理。”

当婚姻出现危机，Billy认为，应把对小朋友的影响减至最低。“从心理医生撰写嘅报告，就知道家长呢啲行为对小朋友嘅影响系好长远。闹紧交嘅时候，最好先离开冷静一下，听日返嚟再倾，去作下一个决定。特别系有小朋友在场，造成嘅伤害系不能修补。无论你对一个人系几咁憎恨，都唔好将小朋友拉落水，唔系离完婚就冇事，而系影响成世！”

新手爸爸的启示

Billy于去年成为爸爸后，工作更为他带来不一样的感受。“香港法庭系好传统，会觉得由妈妈去照顾小朋友系比较适当，所以妈妈喺审讯中系有优势。有啲爸爸会花好多时间、金钱，揾最好嘅大状，向法庭争取一个星期多一日嘅子女探视权。未做爸爸之前觉得，‘其实系咪可以悭返啲钱呢？’做咗爸爸之后，出差冇见小朋友几日，终于明白点解𠮶一日系咁重要！”

他更体会到，幸福的家庭、健康的婚姻也不是必然，需要双方共同努力维系。“亦都愈来愈明白，家长点样合作去照顾、教育小朋友系非常之重要。大家要有个共同目标，多啲沟通，一同努力。”

夫妻间坦诚相对

他又分享，自孩子出生后，无可避免的与太太多了意见分歧，但他们之间亦有一套相处之道。“我和太太会有不同意见，儿子读咩学校，甚至周末去边个沙滩！我哋咩都拎出嚟讲，亦唔会拖太耐。我扯咗火，会道歉，‘我唔应该咁大声讲嘢’，太太也会发长篇讯息，解释‘当日我咁样做，系因为咩原因，希望你明白’，我会尝试站企喺佢角度，达成共识。”

为了见证孩子的成长过程，Billy时刻提醒自己要多花时间在孩子身上，同时避免把日间工作引起的负面情绪带回家，影响亲子关系。今年父亲节，他笑言正期待家人为他预备的惊喜。而对于孩子，则不会过分期望。“生命太多不如意的事，最紧要开心。我长大都系咁，屋企人唔会迫我、要求我做啲咩嘢。做咩都唔重要，由佢自由发挥，灌输正确知识俾佢，等佢做一个好人。”