与母关系差曾想自杀 育儿勾起童年 抑郁妈妈：要与家人坦诚相对
诞下孩子后，既要照顾家庭，又要应付工作，生活骤然改变，令不少新手妈妈承受无形压力，甚至引起情绪病。16岁患上抑郁症的Coco，多年来经历情绪跌荡，令她更懂得自我觉察。成为新手妈妈后，更重燃她的赤子之心，以孩子角度重新认识世界。“Take it one day at a time（活在当下），要同自己讲，几坏嘅情况，都总会过去。”
摄影：黄舒慧
16岁患抑郁症
Coco的妈妈是香港人，爸爸是苏格兰人，16岁时从香港到美国留学，不久后患上抑郁症。“突然之间送我到寄宿学校，与香港的生活差天共地。一个学年，有半年落紧雪，剩系留喺两座大厦入面。当时网络没现时发达，同家人一个礼拜都冇联络一次，感觉被人孤立咗，开始有负面思想，‘点解屋企人要掉我去咁远嘅地方？’感觉与世界愈来愈有距离。”
当时她的学业开始出现问题，不能专注，亦不愿上课，学习态度差，父母察觉到她的不妥，遂让她去看心理医生。“我每个星期都很期待去见心理医生，因为终于有个人明白我，肯听我讲嘢。”
曾萌生自杀念头
Coco大约20岁回流香港，任职公关，长时间的工作令她日夜颠倒，过度疲劳，同时抑郁情绪卷土重来。“觉得自己好劲，可以冲呀冲，有几次喺公司晕低，要坐白车去急症室。有次医生同我讲‘你咁样唔得㖞，你而家系过度疲劳，咁落去身体机能可以shut down’，𠮶时廿几岁，我当然好惊。”
医生的当头棒喝，令她决心辞掉工作，休息两个月。“睇返心理医生，亦回望返自己嘅生活习惯，原来系好唔健康，根本冇时间抖，于是尝试改变，做运动、食得健康啲。”她形容，情绪最低落的时候，曾萌生自杀念头。“试过想死，但又未真系跳落街。会谂，但又唔会做。我本身唔觉得生命系一件好儿戏嘅事，所以当我脑里有这些想法，就觉得‘我的天呀，发生什么事？’。”
怀孕期的情绪起伏
Coco于9个月前成为妈妈，她忆述，怀孕期间曾经历情绪起跌。“陀住我个女三个月𠮶时，我婆婆去世，佢凑大我，系我最亲嘅人。身边个个人都话，‘你唔好咁唔开心啦，会动胎气。’𠮶阵唔系伤心，系好嬲，点解你唔俾我有情绪？我知我而家陀紧女，我都唔想影响到，但呢啲嘢系控制唔到，如果你死咗父母，你都会唔开心啦，我觉得身边啲人讲呢啲说话好奇怪。”
除了家人突如其来的离世，Coco怀孕时，更担心自己会成为产后抑郁的患者。“4个女人生完仔，3个都系有抑郁，只系程度不同，呢个系全球性嘅事实。我本身已经有过抑郁，𠮶时担心生完之后会唔会更加严重？女性生完之后，荷尔蒙大变，通常7日后开始出现征状，但好好彩，我又冇乜。”
责任不在一个人
随著年纪渐长，Coco明白并不能完全根治抑郁症，重要的是学懂管理。“我谂我由细到大，最大嘅问题系成日觉得‘都冇人理我㗎啦’，乜都摆哂上身，自己解决。你问我而家有冇抑郁，我冇，但抑郁系唔会完全消失，而家系识得点样管理。最紧要be realistic（现实一点），你系一个普通人，唔会完成到所有事情。觉得自己处理唔到，就识得去ask for help（求助）。唔只系医生，可能系朋友、老公、工人姐姐。确保自己瞓得够，多与正面的人一起，饮食健康，做运动，俾多啲时间自己平衡生活和情绪。”
作为新手妈妈，Coco认为，照顾孩子是团队工作，责任不能落在某一人身上。“接触很多妈妈，刚生完重返工作，有很多相似之处，就系妈妈唔舍得，觉得内疚。照顾小朋友的责任唔应该落哂去一个人身上，我哋唔系超人嚟㗎嘛，无论家庭成员的组合如何，你都要坦诚去倾，点样去做，互相协调。”
与父母打开心扉
她提到，在照顾孩子时，不时勾起自己的童年回忆，认为妈妈于怀孕时，不妨与自己的父母坦诚相对。“我同我嘅生母关系唔好，所以我由细到大都视佢为反面例子，我望住佢，然后就做完全相反嘅事情。有时自己心情唔好，发小朋友脾气，我会好炆自己，点解变咗我最唔钟意𠮶个人。”
“好多时自己做妈妈，会忆起自己过去、如何长大。怀孕系一个好好嘅平台，俾自己睇返，我有咩系好被童年影响到。临生之前，疗愈与父母之间的感情也很重要。你未疗愈呢一部分，你同你小朋友做乜都好，都会勾起童年回忆，然后放在孩子身上。坐底同佢哋倾，‘妈咪，我都就嚟做妈咪，想同你倾吓，细个你好多时会咁做，系点解呢？’”
Coco补充，对于亚洲人来说，家人之间很少会作这种倾谈，然而这种对话十分重要。“如果两母女、两父女倾唔到呢啲，唔舒服，咪揾中间人帮手，可以系家人，可以系专业人士。你可以系generational cycle breaker，你唔想呢一样嘢循环，就喺你𠮶代停咗佢，开展一个全新的教养方式，养育一个开心、正面的小朋友。”
察觉病征 主动求助
遇上情绪问题的妈妈，部分会如Coco般，意识到自己的情绪状况，部分则徘徊在深渊中。Coco表示，如有病征，要主动求助。“现时人们24小时在线上，但事实我们的思绪不能长时间运作，所以而家全世界咁多人都有焦虑、抑郁。以前一讲情绪病，啲人会话系痴线，要入青山，而家就很普遍。起唔到床、长期好攰，乜都唔想做，唔想见人，都系病征。察觉自己有需要，可以告诉信任的人，如朋友、家人、伴侣。如果那人觉得自己唔够资格去同你倾呢啲嘢，就可以去见专业人士。”
Coco补充，除了专业咨询，亦有社福机构及各种应用程式为有情绪问题的人提供支援，丰俭由人。她又分享，女儿的出生为她带来正面影响，“大人好多时忘记咗自己嘅赤子之心，见到佢，会从佢嘅角度去睇呢个世界，明白好多嘢其实好简单。”她又鼓励在职妈妈要活在当下。“Take it one day at a time，我哋唔系机械人，会有情绪，尤其小朋友头一年有好多变化，要提醒自己总会过去。”