容祖儿演唱会｜曾因病情严重感害怕沮丧 建议公司取消余下场次
《ANOTHER SIDE...... JOEY · MY SECRET · LIVE》 容祖儿演唱会第30场，昨晚（23/8）继续在香港演艺学院举行，完骚后祖儿接受访问，讲到演出期间一度因病而要停工十日，心情曾相当沮丧和迷惘，演出三度改期，她甚至想过不如取消余下的全数场次。
容祖儿在演唱会后指，每场内容虽然差不多，但想表达的说话、感觉都有调整，每日都会检讨演出流程，见观众反应大好，她都非常开心，并谓：“点解想去演艺学院搞Show？就系钟意𠮶种好亲切、亲密嘅感觉，得到晒我想要嘅效果。”每场祖儿都会摆不同甫士与观众大合照，日前就试过扮薛家燕跳“十字步×开花舞”，昨晚家燕姐都有到场，祖儿再摆出这个甫士，更获家燕姐送花和飞吻。
祖儿受访时声线明显很累，她说唱歌时还好，但讲话确实少少攰，尤其是病好后要追赶进度，一场接一场冇得放假，对心理质素、身体状态都是一个挑战，她说：“我哋作为一个表演嘅演出者，自己要好冷静，我试过有几场个人攰， Energy Level冇咁高。今次系一个好好嘅学习机会，点样平均分配自己嘅体力，点样去传递畀观众，我开头冇谂过，都真系吸收咗好多经验嘅一次。”
她坦言生病期间的确很惊，因当时只做了7、8场，仍有廿几场未做，感冒又迟迟都未好，加上食完西药精神散涣、声线未回复等等，都令她十分害怕。祖儿更透露：“我已经延期咗三次，延无可延，我心情都已经去到一个‘唉，死啦，好颓、好沮丧’嘅一个阶段。我𠮶日就同我啲同事讲不如取消晒佢，我都冇信心做喇。”
幸好有演唱会导演彭秀慧开解，分享自己以往做舞台剧的经验，令迷惘的她打消了取消的念头，“每个人都有病嘅时候，但系今次撞啱有咁多场喺后面，有一刻系有啲迷惘，但系好彩佢同我讲，我哋做演出嘅其实一上到台，个舞台就系一个医生嚟，佢就会帮到你！所以就睇我自己愿唔愿意、有冇勇气踏出呢一步，事实证明我Restart返个Show之后，头一个礼拜把声都仲病病哋，但系观众好锡我、好包容，畀咗好多力我，慢慢都愈嚟愈好。”
祖儿指自己和幕后团队都望住同一个目标冲过去，“𠮶种感觉系冇其他选择，大家努力啰，过咗一日，然后第二日又嚟过。我谂呢个系一个都几励志嘅故仔，到而家个全马都行到过咗西隧，见到朋友为我呐喊欢呼拍手掌！”
今次演唱会的舞台机关、布置和效果获观众激赞，祖儿指自己最爱就是中场休息前和后的两幕，能充分利用地理环境制造一个独一无二的舞台效果，再配合歌单主题，是很宏伟的画面。不过演出时祖儿都发生不少虾碌事，其中一场就整支咪飞落台，她笑说：“对于飞咪𠮶件事，我都系一头雾水，但系你又谂吓，冇乜嘢喺我身上发生唔到。”
今次除了唱歌外，祖儿也大量剖白自己的内心世界、童年与生活趣事等，不时引起观众大笑，被问会否做栋笃笑，挑战黄子华与林海峰，她形容是越级挑战，不过能令大家开心，做什么都冇所谓。祖儿表示：“其实要讲成个Show，又冇歌唱，咁咪仲难？我都系讲两Part嘢，都系去到个Show中段先掌握到，会每晚都紧张胃痛。我好愿意接受任何挑战，但系就希望可以同返同一样嘅团队，有佢哋嘅支持，我谂会事半功倍。”