放唔到工的原因
明明你只系想做好本份，准时返工、放工，远离办公室是非。但一样米养百样人，总有啲人系唔阻住人唔安落，点解啲嘢做极都唔完？好多时唔系份project复杂，更加唔系你办事能力低，而系总有以下呢啲人……
1. 遇上认真L 认真累街坊
一条team总有一两个好用心工作嘅人，用心到……令你无奈。因为你心知佢系善良人，佢唔想害任何人，只系认真工作但又无主见，想件事做到“最好”，不过佢又唔知点先系最好，所以就喺同一个位不停试、不停试、不停试、不停试，结果件事就进展得好慢。正常人用3个钟对一盘数，佢用5个钟去对。如果佢系文科人就仲大镬，一篇新闻稿，佢逐只字同你细味，仔细到某行字应该用逗号定句号佢都同你讨论廿分钟。
个客已经将个Design改咗万七次，又唔系咩大改㖞，每次就改少少，改两行字，试吓摆左啲，然后下转又移返右啲，个底用红色？黄色？最后话要粉红色，好啦以为佢收货，你一output file，佢就话只粉红色要浅少少。少少？即系几少？结果你又做多个几钟。
2. 我的字典里没有“放工”
对唔住，呢类人真系好多系年过30又无家庭嘅女人。死唔放工嘅原因包括上述——佢太用心工作，尽善尽美，正常用8个钟做完嘅事佢要16个钟先研究完。
而深层啲嘅原因就系佢闷。
放工无人约，又不屑返屋企睇师奶剧，留喺公司搏上位又好、畀人觉得佢好忙、公司无咗佢唔得都好啦，总之工作系佢生活唯一乐趣、唯一得到满足感嘅事。佢投入到，都唔记得交份嘢比你𠮶阵已经系6点，佢无心留难你，只系佢唔记得人生系有“放工”呢回事。
遇到以上两类人，就只有无奈，但有种人死磨烂磨，因为香港人眼中“OT＝勤力”，佢纯粹唔想做第一个放工嘅人，而且佢约咗人食饭未够钟，当你忙到放唔到工，但佢明明无嘢做又唔走，喺度行来行去，见到呢啲人留低扮OT真系好想打佢。
3. 天生奴隶 志愿卖身做太监
乖宝宝，老板叫佢做咩都做，遇到任何不公都唔敢反抗。同事W，每朝都会主动帮个senior officer拎饭盒去pantry雪，无人叫佢做，佢自己做，重点系个senior officer成日呼喝W的，有时仲会叫W lunch time出去帮佢买奶粉比个女。有一日我忍唔住问W，其实个senior有手有脚，可以自己将个饭盒放入雪柜吖，点知佢话：
“唉，算啦，呢度算好好，我喺旧公司个老板仲变态，只系畀半个钟我哋lunch，我仲要帮佢买完外卖先可以开始食，有时迟咗少少落街，餐厅排满人，我就用廿分钟帮佢买外卖，十分钟自己食。”
哦！原来佢惯咗行奴隶制。
不过佢自己做奴隶关我咩事？无事发生𠮶阵就影响唔到人，但当老板提出不合理要求，大家想团结一齐唔执行，奴隶就会坏哂成件事。
仲唔明？你睇吓香港，有人为你同你下一代嘅民主、自由而瞓街、被人打，总有一班乖宝宝出嚟话唔好搞事，要听话先有得继续捞。
4. 恶人先告状，你要收工，所以我无得收工？
呢啲人唔知咩事，你一叫佢做嘢，佢就会恶咗先，通常佢都系account或者admin果啲婶婶。
“唔该…张票出到未呢？vendor追咗两个月，我哋又要揾佢帮手做下单project啦，上单都未找数好难叫人做嘢…”
你有礼地问，佢一定系大大声闹咗先：
“痴线！好等钱洗咩佢？有生意唔好接吖笨，我大把嘢做，未得闲出佢张票呀！”
明明系欠人钱𠮶个，但可以咁大声，真系无耻便无敌，结果你就要浪费时间去同vendor解释，仲要无辜地讲唔好意思。
如果佢系你直属上司，就更加灰，上司话：
“你同佢讲，另一间物流公司个价比佢平5%，如果佢唔减，我哋就转用另一间公司。唉，唔明你点解搞咁耐都讲唔到个价返嚟，等我自己同佢讲。”
结果，阿上司高高在上咁打去叫人减价，人地真系唔肯减，你焗住转用平啲𠮶间，但一分钱一分货，间新物流又迟到又态度差，有屎𠮶阵咪又系你食，进度又这样被拖延了。
做嘢啫，唔使小小事就“起弶”嘅，学子华神所讲：“你一出世就更年期！”咁会累街坊㗎你明唔明呀……我只系想放工咋！
（本文纯属作者意见，不代表香港01立场。）