【倚天屠龙记．专访】52岁周海媚重提删微博事件：唔钟意故意抹黑

武林至尊，宝刀屠龙，号令天下，莫敢不从！倚天不出，谁与争锋？

金庸小说《倚天屠龙记》总共8次被改编为电视剧集，最新一辑由曾舜晞、祝绪丹、陈鈓琪主演，而周海媚所饰演的，就是手握倚天剑的灭绝师太，剧集现于无线黄金时段播放。

早知是周海媚演周芷若，我就改结局了

在8部《倚天屠龙记》中，1994年由马景涛饰演张无忌的版本被公认为最经典的一套，而饰演女主角周芷若的，正是周海媚，当时原著作者金庸指自己最爱的角色是由她饰演的周芷若：“早知是周海媚演周芷若，我就改结局了。”早前周海媚于横店出席粉丝见面会，更化身25年前周芷若的经典造型。

点击下图欣赏当日盛况：

记者：记　周海媚：周

记：再次化身周芷若感觉如何？

周：其实冇咩特别，今次去系去一个大型嘅影迷见面会，都好开心，因为大会本来预计系一万人，但最后有三万人去到会场，因为喺系秦皇宫，一个大型好空旷嘅广场，𠮶日大家都玩得好开心。

记：1994年嘅周芷若令你红遍中港台甚至海外，你同唔同意？

周：我同意。拍完94年版本《倚天屠龙记》之后，首先系喺台湾好受欢迎，亦都因为咁而同台湾嘅制作人再合作拍多两套电视剧，然后东南亚嘅传播率都好高，同埋当年演完呢个角色，好多人都视我为经典，所以自己都好开心。

记：知道你系瓜尔佳氏嘅后裔，细个嘅时候有咩规矩要遵守？

周：其实冇咩特别，只不过系我嘅祖家其实系广州，细个嘅时候返去广州拜年，就会有好多小朋友一齐玩，不过啲大人就会讲满洲话，但我就听唔明咁。如果系风俗（习俗）都冇乜特别，因为我哋屋企人都系生活喺广州，啲祖先系县令，即系而家嘅巿长咁。

记：可唔可以解释吓点解当时要怒删微博？

周：其实当时好多人都话我怒删微博，但我唔系，我删之前系经过考虑，我系觉得呢个平台唔系太适合我玩，我唔系好钟意一啲故意抹黑，恶意去针对嘅言论。我比较钟意啲温和啲，视觉会阔啲，公平啲嘅平台去玩。其实我而家都仲系好钟意玩“头条号”，我都有一系列嘅“周海媚萌宠日记”其实都系好受欢迎，好多人好钟意睇。同埋我制作嘅时候都觉得好开心，好自由哋去表达我自己。仲有抖音啦，我钟意做咩都得，唔化妆就咁拍可以。其实仲有好多地方都可以畀艺人去发声，表达自己。

记：周海媚系咪都系一个执著嘅人呢？

周：执著？点解要样样嘢都咁介怀呢？我唔可以睇得好开？我50岁就应该样样嘢都好介怀？咁样做人会开心咩？点解要将自己束缚住呢？框喺一个框框里面呢？做人要开放去睇呢个世界，张开你嘅眼睛。我发觉而家有好多好多年轻人，佢哋嘅世界就喺手机，连过马路都要DUP低头，咁好危险㗎嘛，然后你同佢讲嘢，佢又会望住个手机嚟答你，咁好唔尊重人，点解会咁呢？点解呢个世界会变成咁呢？我钟意系望住人对眼睛去讲嘢，咁样沟通大家先至舒服。

记：点解近年你都长驻内地工作？

周：其实我决定嚟北京发展同长住，最初我都会惊唔适应，唔习惯，但后尾住落咗先发觉自己好适应北方嘅生活，虽然我系南方出身，但我系流住北方嘅血，我系满族人。

记：对于美魔女／冻龄女神呢啲称号，会唔会有压力？

周：冇乜压力，大家讲，就系你哋讲，但我又唔觉得要有啲咩压力去保持，例如咩打针呀，我冇呢啲，顺其自然就系最好。

记：所以先经常素颜拍片？

周：点解要介意呢？咁你唔会老咩？你都会老，你都有皱纹㗎啦！

记：睇返资料，除咗1988年嘅“台湾金龙奖香港杰出电视女演员奖”之外，基本上未得过任何“演技”上嘅肯定，其实你觉得自己嘅演技如何？

周：其实我见到好多网上嘅粉丝，佢哋都好钟意睇我嘅作品，亦经常去搜索返我嘅作品翻睇，好多时都会喺评论度讲觉得我演得好好。我认为有呢啲评论就系最真实，比起一个奖项仲要好，我仲开心。