【栋仁．专访】赖慰玲唔想做虎妈 但承认身边太多虎妈好易受感染
撰文： 梁子健
出版：更新：
“虎妈”一词大家都不陌生，更何况赖慰玲。初为人母，她希望儿子的成长随缘就好。
“我系一个超级随缘嘅人，因为我屋企人都系咁凑我，我由细到大想做咩就做，只要你系确保到自己安全，我揾你揾得到，咁就得架喇。我系希望睇下个小朋友性格系点先，跟住再去开发佢啰，即系最紧要系佢自己想点样。”
话是这么说，但一街虎妈，难免耳濡目染。
“系架，最近有个迟我两个礼拜生小朋友嘅朋友，佢都问我：‘帮佢报咗Playgroup未呀？’我话佢4个月咋㖞，使乜咁快？佢话：‘报得嚟差唔多架喇。’我身边有好多虎妈，我唔知佢哋会唔会传染埋我，搞到我都变埋虎妈。”
+2
多问两句，再提提孩子成长后读书时的情况，随时被其他虎妈养育的小朋友比下去，赖慰玲就由最初“唔知会唔会”，变成“我觉得自己好大可能变虎妈”。
“就系因为身边啲人啰，当我话是但啦入边间学校都得，身边人就话：‘唔得架，呢个学校咩咩咩啲架。’当你身边好多呢啲人嘅时候，我就会：‘咁好啦，咁我拣间好啲架啦。’跟住入咗一间好学校，可能头一星期佢唔识一至十，但啲同学识晒一至十嘅时候，我就会：‘死喇！阿仔快，阿妈同你补习。’真系可能会咁样。不过，我始终希望唔好忘记自己所讲嘅就系，我希望先发掘佢，即系佢要配合呢个社会，某程度上都系需要架喇，但我希望佢喺配合呢个社会嘅时候唔好失去咗佢自己嘅本性。”
“理想与现实”五只字，你懂的。