【收视分析师】《 降魔的》正式成为神剧　大结局收视跌又如何？

欢迎收睇逢星期三嘅《收视分析师》，上周剧集《降魔的》仍是市场的焦点，昨晚收视业绩亦全面做好，平日平均收视报25.2点，照计大结局应该仲好啲㗎？加上尾二𠮶集又冇烂尾，点知得24.9点，呢个系综合收视，已计埋手机及其他平台的收视，点解大家结局收视反而低咗呢？最大原因系隔一日先播，呢下真系累死《降魔的》！

隔日播大结局　流失观众

点解隔一日对剧集播好蚀？以今年6月逢播出的《踩过界》为例，原本只放在周末播出，而最终大结局破天荒安排在星期四至日连续播出，最后收视仲去到27点，所以咪好成功令全城观众陷入煲剧模式，亦证明今次TVB宣传策略好式。照计应该copy自己成功方程式㗎?世事就系咁难料，《降魔的》真系命苦，TVB竟然打窒佢到气....

将大结局隔一日，星期日(26日)先播，因为星期六(25日)要播马来西亚星光荟萃颁奖典礼，根据观众睇电视嘅习惯，你星期五睇完《降魔的》最后一下高潮位，超期待大结局，成个fb，讨论区、WhatsApp群组，讲紧大结局点?有冇season 2，吹奏紧马明视帝，完全进入降魔mode，你走嚟断我条气？要我隔一日？哗！真系好嬲㖞，即系连买５铺大都中，第六铺谂住重锤都系大，因为偷睇到两粒骰都系六，都知一定中，但同你讲唔俾买，要你隔一铺先俾买，你话扯唔扯火？

希望TVB下次唔好咁样安排，尤其当全城都讲紧你套剧嘅时候，而家唔系７、８０年代，观众会扑返屋企睇电视，大家娱乐选择多咗，隔一日，就过咗淡气，难得今次《降魔的》咁成功，连𠮶班话唔睇TVB嘅都有捧场，好心就配合下啦，你播完个颁奖礼，再播大结局都好啦。

虽然大结局收视不似预期，不过只是数字上美中不足，《降魔的》已是本年度神剧，下年颁奖礼有没有奖？老实讲，多数冇，因为无线特登将颁奖礼放喺下年１月２１日举办，食正《溏心风暴３》大结局后两日，动机呼之欲出，但唔紧要，奖座喺大家心目中已颁咗，马明就算攞唔攞到视帝都唔紧要，一个演员最重要是有代表作，仲要喺令人一世记得嘅作品，５年后或者１０年后甚至更耐都有人记得《降魔的》，会记得小马、龙猫、啤啤、些粉、力哥、加嫂....呢班曾经令你好感动嘅角色。

《夸世代》分分钟有反身机会

至于现在才播到17集的《夸世代》，虽然收视敌不过《降魔的》，上周平均报24点，相隔一个星期仅仅上升一点。但今个星期开始睇怕有劲敌了，因为日前播出《溏心风暴3》，对于呢套已有10年历史嘅“老字号”剧集，虽然今次都系同头两辑一样讲“争产”，只不过争嘅唔再系争鲍鱼同月饼，而系争奶茶，题材方的确系闷咗少少，但起码有班师奶like先，仲要有不少老戏骨演员好似夏雨、李司棋、米雪同菊姐坐阵，对于die-hard观众层来说“点都会睇”！究竟创新台庆剧《夸世代》同师奶剧《溏心风暴3》最终效果会系点？至少要一个月先知，唯有同《夸世代》讲句，你要俾啲心机喇，话唔定有反身机会！